ಕನ್ನಡದ ನಟಿಯರು ಬೋಲ್ಡ್ ದೃಶ್ಯಗಳಲ್ಲಿ ಕಾಣಿಸಿಕೊಳ್ಳುವುದಿಲ್ಲ; ಚೋಟುದ್ದದ ಉಡುಪು ತೊಡುವುದಿಲ್ಲ; ಮಡಿವಂತಿಕೆ ತೋರುತ್ತಾರೆ; ಮೈ ಚಳಿ ಬಿಡುವುದಿಲ್ಲ ಎಂದೆಲ್ಲಾ ನಿರ್ದೇಶಕರು ಮತ್ತು ನಿರ್ಮಾಪಕರು ಮಾಡುವ ಆಪಾದನೆಗಳಿಗೆ ದೂದ್ ಸಾಗರ್ ಚಿತ್ರದಲ್ಲಿ ನಟಿಸಿದ್ದ ದೀಪಿಕಾ ದಾಸ್ ಎಂಬ ನವ ನಟಿ ಸಖತ್ ಬೋಲ್ಡ್ ಉತ್ತರ ನೀಡಿದ್ದಾರೆ.
ಚಿತ್ರವೊಂದರಲ್ಲಿ ಅವರು ಟಬ್‌ನಲ್ಲಿ ಕುಳಿತು ಶ್ವೇತವರ್ಣದ ತುಂಡುಡುಗೆ ತೊಟ್ಟು ಸೋಪಿನ ನೊರೆಯ ಜತೆ ಆಟವಾಡುತ್ತಿರುವ ಸ್ಟಿಲ್‌ಗಳು ಲವಲವಿಕೆಗೆ ಲಭ್ಯವಾಗಿವೆ. ಅದರಲ್ಲಿ ಅವರು ಯಾವುದೇ ಬಾಲಿವುಡ್ ನಟಿಯರಿಗಿಂತ ಕಡಿಮೆ ಇಲ್ಲದೇ ಚಳಿ ಬಿಟ್ಟು ನಟಿಸಿದ್ದಾರೆ. ಅಲ್ಲದೇ ಇದು ಕಾಳಿ ಸ್ವಾಮೀಜಿ ಜತೆ ನಟಿಸುತ್ತಿರುವ ಚಿತ್ರ. ಆಟೋಶಂಕರ್ ಚಿತ್ರದಲ್ಲಿ ಶಿಲ್ಪಾ ಶೆಟ್ಟಿ ಮಾಡಿದ್ದ ಖಳ ನಾಯಕಿ ಪಾತ್ರದಲ್ಲಿ ಇವರು ನಟಿಸಿದ್ದಾರೆ.
ಈ ಬಗ್ಗೆ ದೀಪಿಕಾರನ್ನು ಸಂಪರ್ಕಿಸಿದಾಗ ‘ಒಂದು ಸೀನ್‌ಗಾಗಿ ಮಾಡಿದ್ದ ಶಾಟ್ ಅದು. ಆದರೆ ಆ ಶಾಟ್ ಅಷ್ಟೊಂದು ವಲ್ಗರ್ ಆಗಿಲ್ಲ. ಫಸ್ಟ್ ಟೈಂ ನೆಗೆಟೀವ್ ಶೇಡ್ ಪಾತ್ರದಲ್ಲಿ ಕಾಣಿಸಿಕೊಳ್ಳುತ್ತಿದ್ದೇನೆ. ಹಿಂದೆ ಶಿಲ್ಪಾ ಶೆಟ್ಟಿ ಕನ್ನಡ ಸಿನಿಮಾದಲ್ಲಿ ಈ ರೀತಿ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದರು. ಸೋ ಪಾತ್ರಕ್ಕೆ ತಕ್ಕಂತೆ ನಾನು ಟಬ್‌ನಲ್ಲಿ ಸ್ವಲ್ಪ ಹಾಟ್ ಆಗಿ ಕಾಣಿಸಿಕೊಳ್ಳಬೇಕಾಯಿತು’ ಎನ್ನುತ್ತಾರೆ ದೀಪಿಕಾ.
ನಟಿ ಪಾವನಾ, ನಮಗಾಗಿ ಚಿತ್ರದಲ್ಲಿ ವಿಜಯರಾಘವೇಂದ್ರ ಜತೆ ಖಳ ನಾಯಕಿ ಪಾತ್ರದಲ್ಲೇ ನಟಿಸಿದ್ದಾರೆ. ಅವರು ಕೂಡ ಇಲ್ಲಿ ಸಖತ್ ಬೋಲ್ಡ್ ಆಗಿಯೇ ಕಾಣಿಸಿಕೊಂಡಿದ್ದಾರೆ. ಖಳ ನಾಯಕಿ ಎನ್ನುವ ಕಾರಣಕ್ಕೋ ಏನೋ ಈ ನಟಿಯರಿಗೆ ಹಾಟ್ ಆನಿಸುವ ದಶ್ಯಗಳನ್ನು ನಿರ್ದೇಶಕರು ಸೇರಿಸುತ್ತಾರೆ. ಆದರೆ ಈ ವಾದವನ್ನು ದೀಪಿಕಾ ಒಪ್ಪುವುದಿಲ್ಲ. ‘ಖಳ ನಾಯಕಿ ಯಾವಾಗಲೂ ಬೋಲ್ಡ್ ಆಗಿರುತ್ತಾಳೆ. ಯಾವುದೇ ಹಿಂದಿ ಅಥವಾ ಇಂಗ್ಲಿಷ್ ಸಿನಿಮಾಗಳಲ್ಲಿ ಖಳ ನಾಯಕಿಯರನ್ನು ನೋಡಿದರೆ ಅವರು ನಾಯಕಿಯರಿಗಿಂತ ಸ್ವಲ್ಪ ಗ್ಲಾಮ್ ಆಗಿಯೇ ಕಾಣಿಸಿಕೊಳ್ಳುತ್ತಾರೆ. ಆ ರೀತಿಯ ಪಾತ್ರಗಳು ಅದೇ ರೀತಿ ಇರಬೇಕು. ಇಲ್ಲೂ ನನಗೆ ಅದೇ ರೀತಿಯ ಪಾತ್ರ ಸಿಕ್ಕಿದೆ’ ಎನ್ನುತ್ತಾರೆ ದೀಪಿಕಾ.
