ಕೊರೊನಾ ಬಿಕ್ಕಟ್ಟಿನ ಮಧ್ಯೆ ಮುಕೇಶ್ ಅಂಬಾನಿ‌ ಆದಾಯ ಗಂಟೆಗೆ ಎಷ್ಟು ಏರಿಕೆಯಾಗಿದೆ ಗೊತ್ತಾ?

ಮುಂಬಯಿ: ಲಾಕ್‌ಡೌನ್‌ ಸಮಯದಲ್ಲಿ ರಿಲಯನ್ಸ್‌ ಇಂಡಸ್ಟ್ರೀಸ್‌ ಅಧ್ಯಕ್ಷ ಮುಕೇಶ್‌ ಅಂಬಾನಿ ಗಂಟೆಗೆ ಸರಾಸರಿ 90 ಕೋಟಿ ರೂ. ಸಂಪತ್ತು ಗಳಿಸಿದ್ದಾರೆ.

ಹುರುನ್‌ ಇಂಡಿಯಾ ಮತ್ತು ಐಐಎಫ್‌ಎಲ್‌ ವೆಲ್ತ್‌ ಮ್ಯಾನೇಜ್ಮೆಂಟ್‌ ಲಿಮಿಟೆಡ್‌ ವರದಿ ಬಿಡುಗಡೆಯಾಗಿದ್ದು, ಅದರಲ್ಲಿ ಮುಕೇಶ್‌ ಸಂಪತ್ತಿನ ಬೆಳವಣಿಗೆಯನ್ನು ನಮೂದಿಸಲಾಗಿದೆ. ಅಲ್ಲದೇ, ಹುರುನ್‌ ಇಂಡಿಯಾ ಶ್ರೀಮಂತರ ಪಟ್ಟಿಯಲ್ಲಿ ಸತತ 9ನೇ ವರ್ಷವೂ ಮೊದಲ ಸ್ಥಾನವನ್ನು ಅವರು ಕಾಯ್ದುಗೊಂಡಿದ್ದಾರೆ. ವಿಶ್ವದ ನಾಲ್ಕನೇ ದೊಡ್ಡ ಶ್ರೀಮಂತ, ಏಷ್ಯಾದ ನಂ.1 ಕುಬೇರ ಎಂದೂ ಗುರುತಿಸಲಾಗಿದೆ.

ಕೋವಿಡ್‌ ಬಿಕ್ಕಟ್ಟಿನ ಸಂದರ್ಭದಲ್ಲಿ ಅನೇಕ ಉದ್ಯಮಗಳು ಸಂಕಷ್ಟಕ್ಕೆ ಸಿಲುಕಿದ್ದರೆ, ಮುಕೇಶ್‌ ಅವರ ಉದ್ಯಮಗಳು ಹೊಸ ಹೂಡಿಕೆ ಮತ್ತು ವಹಿವಾಟಿನ ಮೂಲಕ ಗಮನ ಸೆಳೆದಿವೆ.

63 ವರ್ಷದ ಮುಕೇಶ್‌ ಅವರ ವೈಯಕ್ತಿಕ ಸಂಪತ್ತು ಕಳೆದ 12 ತಿಂಗಳಲ್ಲಿ 2,77,700 ಕೋಟಿ ರೂ.ನಿಂದ 6,58,400 ರೂ.ಗೆ ಏರಿಕೆಯಾಗಿದೆ. ಇಂಧನದಿಂದ ದೂರ ಸಂಪರ್ಕದ ತನಕ ಅವರ ಉದ್ಯಮ ವಿಸ್ತಾರಗೊಂಡಿದೆ.

ಅವೆನ್ಯೂ ಸೂಪರ್‌ ಮಾರ್ಟ್‌ಗಳ ಸಂಸ್ಥಾಪಕ ರಾಧಾಕಿಶನ್‌ ದಮಾನಿ, ಸೆರಮ್‌ ಇನ್‌ಸ್ಟಿಟ್ಯೂಟ್‌ ಆಫ್‌ ಇಂಡಿಯಾದ ಸೈರಸ್‌ ಎಸ್‌. ಪೂನವಾಲಾ, ಕೋಟಕ್‌ ಮಹೀಂದ್ರಾ ಬ್ಯಾಂಕಿನ ಉದಯ್‌ ಕೋಟಕ್‌, ಸನ್‌ ಫಾರ್ಮಾದ ದಿಲೀಪ್‌ ಶಾಂಘ್ವಿ ಮತ್ತು ಪಲ್ಲೊಂಜಿ ಗುಂಪಿನ ಸೈರಸ್‌ ಪಲ್ಲೊಂಜಿ ಮಿಸ್ತ್ರಿ ಮತ್ತು ಶಾಪೂರ್ಜಿ ಪಲ್ಲೊಂಜಿ ಮಿಸ್ತ್ರಿ ಟಾಪ್‌ 10 ಪಟ್ಟಿಯಲ್ಲಿದ್ದಾರೆ.

ಹುರುನ್‌ ವರದಿಯ ಪ್ರಕಾರ ಮುಕೇಶ್‌ ಅಂಬಾನಿಯ ಒಟ್ಟು ಆದಾಯ 6,58,400 ಕೋಟಿ ರೂಪಾಯಿ. ಕೋವಿಡ್‌ ಬಿಕ್ಕಟ್ಟಿಗೂ ಮೊದಲು ಮುಕೇಶ್‌ ಅಂಬಾನಿ ಸಂಪತ್ತು ಶೇ.28ರಷ್ಟು ಅಂದರೇ 3.50 ಲಕ್ಷ ಕೋಟಿ ರೂ. ಕುಸಿದಿತ್ತು. ಆದರೆ ಫೇಸ್‌ಬುಕ್‌, ಗೂಗಲ್‌, ಸಿಲ್ವರ್‌ ಲೇಕ್‌ನಿಂದ ಜಿಯೊ ಮತ್ತು ರಿಲಯನ್ಸ್‌ ರಿಟೇಲ್‌ಗೆ ಹೂಡಿಕೆ ಹರಿದು ಬಂದಿದ್ದು, ಕೇವಲ 4 ತಿಂಗಳಲ್ಲಿ ಅಂಬಾನಿ ಸಂಪತ್ತಿನ ಮೌಲ್ಯವು ಶೇ. 85% ವೃದ್ಧಿಸಿದೆ. ರಿಲಯನ್ಸ್‌ನ ಮಾರುಕಟ್ಟೆ ಬಂಡವಾಳವು 10 ಲಕ್ಷ ಕೋಟಿ ರೂ. ದಾಟಿದ್ದರೇ, ಮುಕೇಶ್‌ ಸಂಪತ್ತು ಶೇ. 73ರಷ್ಟು ವೃದ್ಧಿಸಿದೆ.

ಪ್ರಸಕ್ತ ವರ್ಷದ ಆಗಸ್ಟ್‌ 31ರ ಹೊತ್ತಿಗೆ 1,000 ಕೋಟಿ ಅಥವಾ ಅದಕ್ಕಿಂತ ಅಧಿಕ ಸಂಪತ್ತು ಹೊಂದಿರುವ 828 ಕುಬೇರರು, ಹುರುನ್‌ ಪಟ್ಟಿಗೆ ಸೇರಿದ್ದಾರೆ.