ಕೊರೊನಾ, ಕಚ್ಚಾತೈಲ ದರ ಸಮರದಲ್ಲಿ ದಶಕದ ಅತೀ ದೊಡ್ಡ ನಷ್ಟ ಹೊಂದಿದ ಅಂಬಾನಿ!

ಮುಂಬಯಿ: ಸೌದಿ ಅರೇಬಿಯಾ ಮತ್ತು ರಷ್ಯಾದ ನಡುವಿನ ಕಚ್ಚಾತೈಲ ದರ ಸಮರದಿಂದ ಅಂತಾರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಕಚ್ಚಾತೈಲ ದರಗಳು ಕುಸಿದಿವೆ. ಪರಿಣಾಮ ಜಾಮ್‌ನಗರದಲ್ಲಿರುವ ವಿಶ್ವದ ಅತೀ ದೊಡ್ಡ ಕಚ್ಚಾ ತೈಲ ಸಂಸ್ಕರಣಾ ಘಟಕ ಮತ್ತು ಕೃಷ್ಣಾ ಗೋದಾವರಿ ಕಣಿವೆಯ ಕೆಜಿ-ಡಿ6ನ್ನು ನಿರ್ವಹಣೆ ಮಾಡುವ ರಿಲಯನ್ಸ್‌ ಇಂಡಸ್ಟ್ರೀಸ್‌ ಭಾರಿ ನಷ್ಟ ಅನುಭವಿಸಿವೆ.

ಸೋಮವಾರ ರಿಲಯನ್ಸ್‌ ಶೇರುಗಳಲ್ಲಿ ಶೇಕಡಾ 10 ರಷ್ಟು ಕುಸಿತವಾಗಿದ್ದು, ಕಳೆದ 10 ವರ್ಷಗಳಲ್ಲೇ ಮೊದಲ ಬಾರಿಗೆ ರಿಲಯನ್ಸ್‌ ಶೇರುಗಳು ಈ ಪಾಟಿ ಕುಸಿತ ಕಂಡಿವೆ. ದಿನದ ಕನಿಷ್ಠ ಶೇರು ದರ 1,143 ದಾಖಲಾಗಿದೆ. ಸರಕಾರಿ ಸ್ವಾಮ್ಯದ ಒಎನ್‌ಜಿಸಿ ಶೇರುಗಳೂ ಶೇಕಡಾ 13 ರಷ್ಟು ಕುಸಿತವಾಗಿದ್ದು 77.80 ರೂಪಾಯಿಗೆ ಇಳಿಕೆಯಾಗಿವೆ.

ಒಪೆಕ್‌ ರಾಷ್ಟ್ರಗಳು ಕೊರೊನಾ ವೈರಸ್‌ ಭೀತಿಯಿಂದ ಉತ್ಪಾದನೆ ಕಡಿತ ಮಾಡಲು ಮುಂದಾಗಿದ್ದವು. ಆದರೆ ಇದಕ್ಕೆ ರಷ್ಯಾ ಅಡ್ಡಿಯಾಗಿದ್ದರಿಂದ, ಸೌದಿ ಅರೇಬಿಯಾ ರಷ್ಯಾದ ಜೊತೆ ಕಚ್ಚಾ ತೈಲ ದರ ಸಮರಕ್ಕೆ ಇಳಿದಿದೆ. ಪರಿಣಾಮ ಅಂತಾರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಕಚ್ಚಾತೈಲ ದರ ಶೇಕಡಾ 30 ರಷ್ಟು ಕುಸಿತವಾಗಿದೆ.

1991 ರ ನಂತರ ಇದೇ ಮೊದಲ ಬಾರಿಗೆ ಅಂತರಾಷ್ಟ್ರೀಯ ಮಟ್ಟದಲ್ಲಿ ತೈಲ ದರ ಭಾರಿ ಕುಸಿತ ಕಂಡಿದೆ. ತನ್ನ ಉತ್ಪಾದನೆಯನ್ನು ಮುಂದಿನ ದಿನಗಳಲ್ಲಿ ಹೆಚ್ಚಿಸಲಿರುವ ಸೌದಿ ಅರೇಬಿಯಾ, ಕೊರೊನಾ ವೈರಸ್‌ ಅಬ್ಬರದ ನಡುವೆ ಬೇಡಿಕೆ ಕುಸಿಯಬಾರದು ಎಂಬ ಕಾರಣಕ್ಕೆ ದರವನ್ನು ಇಳಿಕೆ ಮಾಡಿದೆ. ಪೈಪೋಟಿಗೆ ಇಳಿದಿರುವ ರಷ್ಯಾ ಕೂಡ ಬೆಲೆ ಇಳಿಕೆ ಮಾಡಿದ್ದರಿಂದ ಎರಡೂ ರಾಷ್ಟ್ರಗಳು ಬೆಲೆ ಇಳಿಕೆಯಲ್ಲಿ ಪೈಪೋಟಿ ನಡೆಸುತ್ತಿವೆ.

ಬ್ರೆಂಟ್‌ ಕಚ್ಚಾತೈಲದ ಬೆಲೆಯಲ್ಲಿ 14.25 ಡಾಲರ್‌ ಇಳಿಕೆಯಾಗಿದ್ದು, ಬ್ಯಾರಲ್‌ಗೆ 31.02 ಡಾಲರ್‌ಗೆ ಇಳಿದಿದೆ. ಇದು 1991ರ ಜನವರಿ 17ರಂದು ಕೊಲ್ಲಿ ಯುದ್ಧ ಆರಂಭವಾದ ನಂತರದ ಅತೀ ದೊಡ್ಡ ಶೇಕಡಾವಾರು ದರ ಕುಸಿತವಾದರೆ, 2016ರ ಫೆಬ್ರವರಿ ನಂತರ ಇದೇ ಮೊದಲ ಬಾರಿಗೆ ಬ್ಯಾರಲ್‌ಗೆ ಕನಿಷ್ಟ ದರ ದಾಖಲಾಗಿದೆ. ಇನ್ನು ಡಬ್ಲ್ಯೂಟಿಐ ಕಚ್ಚಾತೈಲ ದರ ಬ್ಯಾರಲ್‌ಗೆ 11.28 ಡಾಲರ್‌ನಷ್ಟು ಇಳಿಕೆಯಾಗಿದ್ದು 30 ಡಾಲರ್‌ಗೆ ಬಂದು ತಲುಪಿದೆ.

ಇದೇ ವೇಳೆ ಅಂತಾರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಮಾರಾಟಕ್ಕೆ ಒತ್ತಡ ಸೃಷ್ಟಿಯಾಗಿದೆ. ಕೊರೊನಾ ವೈರಸ್‌ ಭೀತಿಯಿಂದ ಹೂಡಿಕೆದಾರರು ಹಿಂಜರಿಯುತ್ತಿರುವುದರಿಂದ ತೈಲ ಮಾರಾಟ ಶೇ. 4 ರಷ್ಟು ಕುಸಿತ ಕಂಡಿದೆ.