ಗನ್ ತೋರಿಸಿ ಮಾಜಿ ಪ್ರಿಯತಮೆ ಅತ್ಯಾಚಾರ

ಬೆಂಗಳೂರು: ಗನ್ ತೋರಿಸಿ ಮಾಜಿ ಪ್ರಿಯತಮೆ ಮೇಲೆ ಅತ್ಯಾಚಾರ ಎಸಗಿದ ಆರೋಪದ ಮೇಲೆ ನಗರದ ಟೆಕ್ಕಿಯೊಬ್ಬನನ್ನು ಪೊಲೀಸರು ಬಂಧಿಸಿದ್ದಾರೆ.

ಹೆಚ್ಎಎಲ್ ಸಮೀಪದ ದೊಡ್ಡನಕುಂಡಿಯಲ್ಲಿ ಶುಕ್ರವಾರ ಈ ಕೀಚಕ ಕೃತ್ಯ ನಡೆದಿದ್ದು ಆರೋಪಿಯನ್ನು ಪ್ರವೀಣ್ ಬಾಳಾ(25) ಎಂದು ಗುರುತಿಸಲಾಗಿದೆ.

ನಿನ್ನ ಹೆಸರಲ್ಲಿ ನಮ್ಮ ಮನೆಗೆ ಪಾರ್ಸಲ್ ಬಂದಿದ್ದು, ತೆಗೆದುಕೊಂಡು ಹೋಗು ಎಂದಾತ ಕಥೆ ಕಟ್ಟಿದ್ದಾನೆ. ಅದನ್ನು ನಂಬಿ ಆತನ ಮನೆಗೆ ಬಂದಾಗ ಗನ್ ತೋರಿಸಿ ಅತ್ಯಾಚಾರ ಎಸಗಿದ್ದಾನೆ, ಎಂದು ಪೊಲೀಸರು ತಿಳಿಸಿದ್ದಾರೆ.

ಸಂತ್ರಸ್ತೆ ಗುರುಗ್ರಾಮದವಳಾಗಿದ್ದು 2017ರಲ್ಲಿ ನಗರದ ಪ್ರತಿಷ್ಠಿತ ಐಟಿ ಕಂಪನಿಗೆ ಕೆಲಸಕ್ಕೆ ಸೇರಿದ್ದಳು. ಆರೋಪಿ ಕೇರಳ ಮೂಲದವನಾಗಿದ್ದು ಅದೇ ಕಂಪನಿಯಲ್ಲಿ ಕೆಲಸ ಮಾಡುತ್ತಿದ್ದ. ಇಬ್ಬರ ಸ್ನೇಹ ಪ್ರೀತಿಗೆ ತಿರುಗಿ ಲಿವಿಂಗ್ ಟುಗೆದರ್ ಸಂಬಂಧದಲ್ಲಿದ್ದರು. ಆ ಕಂಪನಿಯನ್ನು ತ್ಯಜಿಸಿ ಬೇರೆ ಕಂಪನಿ ಸೇರಿದ ಬಳಿಕ ಇಬ್ಬರಲ್ಲಿ ವೈಮನಸ್ಸು ತಲೆದೋರಿದ್ದು ಪ್ರತ್ಯೇಕವಾಗಿ ಬದುಕಲು ನಿರ್ಧರಿಸಿದರು.

ಕಳೆದ 6 ತಿಂಗಳಿಂದ ಆಕೆ ಪೇಯಿಂಗ್ ಗೇಸ್ಟ್‌ನಲ್ಲಿ ವಾಸಿಸುತ್ತಿದ್ದಳು. ಇಬ್ಬರಲ್ಲಿ ಪ್ರೀತಿ ಮುರಿದರೂ ಒಂದೇ ಕಂಪನಿಯಲ್ಲಿ ಕೆಲಸ ಮಾಡುತ್ತಿದ್ದರಿಂದ ಸ್ನೇಹ ಮುಂದುವರಿದಿತ್ತು ಎಂದು ತಿಳಿದುಬಂದಿದೆ.