ಬೆಂಗಳೂರು: ಬೆಂಗಳೂರಿನ ಇಂದಿರಾನಗರದ ಮೆಟ್ರೋ ನಿಲ್ದಾಣದಲ್ಲಿ ಬೀಕಾನ್ ಎಂಬ ಬ್ಲೂಟೂತ್ ಸಾಧನ ಪತ್ತೆಯಾಗಿದ್ದು, ಅದನ್ನು ಗುಟ್ಟಾಗಿ ಅಡಗಿಸಿಟ್ಟಿದ್ದ ಭದ್ರತಾ ಸಿಬ್ಬಂದಿಯನ್ನು ಪೊಲೀಸರು ಬಂಧಿಸಿದ್ದಾರೆ.
ಜು.14ರ ಬೆಳಗಿನ ಜಾವ 5 ಗಂಟೆ ಸುಮಾರಿನಲ್ಲಿ ನಿಲ್ದಾಣಕ್ಕೆ ಬಂದಿದ್ದ ಭದ್ರತಾ ಸಿಬ್ಬಂದಿ ವೆನಕಂಡಿ ಸರುಣ್ ಎಂಬಾತ ಬೀಕಾನ್ ಬ್ಲೂಟೂತ್ ಸಾಧನವನ್ನು ಇರಿಸಿದ್ದು ನಿಲ್ದಾಣದಲ್ಲೇ ಇದ್ದ ಸಿಸಿಟಿವಿ ಕ್ಯಾಮೆರಾದಲ್ಲಿ ದಾಖಲಾಗಿದೆ. ಇದನ್ನು ಮೆಟ್ರೋ ಅಧಿಕಾರಿ ಫಾರೂಕ್ ಹುಸೇನ್ ಎಂಬವರು ಗಮನಿಸಿದ್ದು, ಪೊಲೀಸರಿಗೆ ಮಾಹಿತಿ ನೀಡಿದ್ದಾರೆ.
ಫಾರೂಕ್ ಅವರ ಮಾಹಿತಿ ಮೇರೆಗೆ ಸ್ಥಳಕ್ಕೆ ಬಂದ ಪೊಲೀಸರು ಬ್ಯೂಟೂತ್ ಸಾಧನವನ್ನು ವಶಕ್ಕೆ ಪಡೆದಿದ್ದು, ಅಡಗಿಸಿಟ್ಟಿದ್ದ ಭದ್ರತಾ ಸಿಬ್ಬಂದಿ ವೆನಕಂಡಿ ಅವರನ್ನು ಬಂಧಿಸಿದ್ದಾರೆ.
ಏನಿದು ಬೀಕಾನ್
ಬೀಕಾನ್ ಬ್ಲುಟೂತ್ ಸಾಧನ ಬಳಸಿ ನಿರ್ಧಿಷ್ಟ ಅಂತರದ ಸ್ಮಾರ್ಟ್ ಫೋನ್ಗಳಿಗೆ ಮಾಹಿತಿ, ದತ್ತಾಂಶಗಳನ್ನು ರವಾನಿಸಬಹುದು ಅಥವಾ ಅಲ್ಲಿಂದ ಪಡೆಯಬಹುದು. ಆದರೆ, ಇದನ್ನು ಮೆಟ್ರೋ ನಿಲ್ದಾಣದಲ್ಲಿ ಅಡಗಿಸಿಟ್ಟ ಕಾರಣ ಈವರೆಗೆ ಗೊತ್ತಾಗಿಲ್ಲ. ಯಾವ ಉದ್ದೇಶಕ್ಕಾಗಿ ಈ ಸಾಧನವನ್ನು ಅಡಗಿಸಡಲಾಯಿತು ಎಂಬುದರ ಬಗ್ಗೆ ವೆನಕಂಡಿ ಬಾಯಿ ಬಿಡುತ್ತಿಲ್ಲ. ಈ ಹಿನ್ನೆಲೆಯಲ್ಲಿ ಇಂದಿರಾ ನಗರ ಪೊಲೀಸರು ಈ ಪ್ರಕರಣವನ್ನು ಸೈಬರ್ ಪೊಲೀಸರಿಗೆ ಒಪ್ಪಿಸಿದ್ದಾರೆ.
Comments are closed.