ಬೆಂಗಳೂರು: ಜೂ.21ರಂದು ಸಂಜೆ ರೆಸಾರ್ಟ್ನಲ್ಲಿ ಆಟವಾಡುತ್ತಿದ್ದ ಮಕ್ಕಳತ್ತ ಗುರಿಯಿಟ್ಟು, ನಿಮ್ಮ ಅಮ್ಮನನ್ನು ಫೈರ್ ಮಾಡಿ ಮುಗಿಸಿದ್ದೇನೆ. ಈಗ ನಿಮ್ಮನ್ನು ಮುಗಿಸುತ್ತೇನೆ ಎಂದು ಇಬ್ಬರ ಮೇಲೆ ಗುಂಡು ಹಾರಿಸಿದ್ದಾನೆ. ಈ ವೇಳೆ ಗುಂಡುಗಳು ಕಾಲು, ಹೊಟ್ಟೆ ಸೇರಿದಂತೆ ದೇಹದ ವಿವಿಧೆಡೆ ತಾಗಿವೆ. ಆಗ ಮಕ್ಕಳು ಕಣ್ಣೀರಿಡುತ್ತ, ನಮ್ಮನ್ನು ಏಕೆ ಸಾಯಿಸುತ್ತಿದ್ದಿಯಾ ಅಪ್ಪ, ತುಂಬಾ ನೋವಾಗುತ್ತಿದೆ ಎಂದು ಗೋಗರೆದಿದ್ದಾರೆ. ಹೀಗಾಗಿ ಮಕ್ಕಳನ್ನು ಕೊಲೆ ಮಾಡುವ ನಿರ್ಧಾರದಿಂದ ಉದ್ಯಮಿ ಗಣೇಶ್ ಹಿಂದೆ ಸರಿದಿದ್ದ.
ಕೊಲೆ ಮಾಡುವುದರಿಂದ ಹಿಂದೆ ಸರಿದ ಗಣೇಶ್, ಏನು ಮಾಡಬೇಕೆಂದು ದಿಕ್ಕು ತೋಚದೆ ಅವರನ್ನು ಮತ್ತೆ ಕಾರಿನಲ್ಲಿ ಕೂರಿಸಿಕೊಂಡು ಕನಕಪುರ, ಬಿಡದಿ, ರಾಮನಗರ ಸೇರಿದಂತೆ ವಿವಿಧೆಡೆ ಸುತ್ತಾಡಿದ್ದಾನೆ. ಅಂತಿಮವಾಗಿ ಜಯನಗರ ಪೊಲೀಸರ ಬಲೆಗೆ ಬಿದ್ದಿದ್ದಾನೆ.
ಸಾಲ ಪಾವತಿಗೆ ತೀವ್ರ ಒತ್ತಡ
ಪತ್ನಿಗೆ ಗುಂಡು ಹಾರಿಸಿ ಕೊಲೆ ಮಾಡಿ, ನಂತರ ಮಕ್ಕಳಿಬ್ಬರ ಮೇಲೆ ಗುಂಡು ಹಾರಿಸಿರುವ ರಿಯಲ್ ಎಸ್ಟೇಟ್ ಉದ್ಯಮಿ ಗಣೇಶ್ ಮಾಡಿದ್ದ ಕೊಟ್ಯಂತರ ರೂ. ಸಾಲಕ್ಕೆ ಪ್ರತಿ ತಿಂಗಳು ಕಂತು ಕಟ್ಟುವಷ್ಟು ಕೂಡಾ ಆದಾಯ ಬರುತ್ತಿರಲಿಲ್ಲ. ಹೀಗಾಗಿ, ಸಾಲ ಪಾವತಿಸುವಂತೆ ಬ್ಯಾಂಕ್ ನೀಡುತ್ತಿದ್ದ ನೋಟಿಸ್ನಿಂದ ಗಣೇಶ್, ತೀವ್ರ ಒತ್ತಡಕ್ಕೆ ಒಳಗಾಗಿದ್ದ ಎಂದು ಜಯನಗರ ಪೊಲೀಸರ ವಿಚಾರಣೆಯಲ್ಲಿ ತಿಳಿದು ಬಂದಿದೆ.
ಜಯನಗರ 4ನೇ ಬ್ಲಾಕ್ನಲ್ಲಿರುವ ಮನೆಯಲ್ಲಿ ಜೂ.21ರಂದು ಗುಂಡು ಹಾರಿಸಿ ಪತ್ನಿ ಸಹನಾರನ್ನು ಕೊಲೆ ಮಾಡಿದ್ದ ಗಣೇಶ್, ನಂತರ ಕನಕಪುರ ರಸ್ತೆ ನೆಟ್ಟಿಗೆರೆ ಗ್ರಾಮದಲ್ಲಿರುವ ವುಡ್ಸ್ ರೆಸಾರ್ಟ್ನಲ್ಲಿ ಮಕ್ಕಳಾದ ಸಿದ್ದಾರ್ಥ (14) ಮತ್ತು ಮಗಳಾದ ಸಾಕ್ಷಿ ಮೇಲೆ ಗುಂಡು ಹಾರಿಸಿದ್ದ.
ರಿಯಲ್ ಎಸ್ಟೇಟ್ ವ್ಯವಹಾರ, ರೆಸಾರ್ಟ್ ನಡೆಸಲು ಬ್ಯಾಂಕ್ ಹಾಗೂ ಪರಿಚಿತರ ಬಳಿ ಪಡೆದಿದ್ದ ಕೋಟ್ಯಂತರ ರೂ. ಸಾಲಕ್ಕೆ ಪ್ರತಿ ತಿಂಗಳು ದೊಡ್ಡ ಮೊತ್ತದ ಬಡ್ಡಿ ಹಾಗೂ ಅಸಲು ಕಟ್ಟಬೇಕಿತ್ತು. ವ್ಯವಹಾರದಿಂದ ಬರುತ್ತಿದ್ದ ಹಣದಿಂದ ಸಾಲದ ಕಂತು ಕಟ್ಟಲು ಆಗುತ್ತಿರಲಿಲ್ಲ. ಆದರೆ, ಬಡ್ಡಿ ಬೆಟ್ಟದಂತೆ ಬೆಳೆಯುತ್ತಲೇ ಇತ್ತು. ಇದರಿಂದಾಗಿ ಸಾಲ ತೀರಿಸುವ ತೀವ್ರ ಒತ್ತಡದಲ್ಲಿ ಗಣೇಶ್ ಸಿಲುಕಿದ್ದ. ಹೀಗಾಗಿ, ಮನೆ ಸೇರಿದಂತೆ ಇನ್ನಿತರ ಆಸ್ತಿ-ಪಾಸ್ತಿಯನ್ನು ಮಾರಾಟ ಮಾಡಿ ಸಾಲ ತೀರಿಸಲು ನಿರ್ಧರಿಸಿದ್ದ. ಈ ಕುರಿತು ಬ್ಯಾಂಕ್ ಅಧಿಕಾರಿಗಳ ಬಳಿ ಚರ್ಚಿಸಿದ್ದ. ಆದರೆ ನಿರೀಕ್ಷಿತ ಮೊತ್ತ ಸಿಗುವ ಲಕ್ಷಣವಿರಲಿಲ್ಲ. ಕಡಿಮೆ ಬೆಲೆಗೆ ಆಸ್ತಿ ಮಾರಾಟ ಮಾಡಲು ಪತ್ನಿ ಸಹನಾ ಒಪ್ಪಿರಲಿಲ್ಲ. ಸಾಲದ ವಿಚಾರವಾಗಿ ಪಾಲಕರು ಮಾತನಾಡುವಾಗ, ಆತ್ಮಹತ್ಯೆ ಮಾಡಿಕೊಂಡರೆ ಎಲ್ಲ ಸಮಸ್ಯೆಗಳು ಅಂತ್ಯ ಕಾಣುತ್ತವೆ ಎಂದು ಹೇಳುತ್ತಿದ್ದರು ಎಂದು ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿರುವ ಪುತ್ರ ಸಿದ್ದಾರ್ಥ ಹೇಳಿದ್ದಾನೆಂದು ಪೊಲೀಸ್ ಅಧಿಕಾರಿಯೊಬ್ಬರು ತಿಳಿಸಿದರು.
ಮಣಿಪಾಲ್ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿರುವ ಮಕ್ಕಳಾದ ಸಿದ್ದಾರ್ಥ ಮತ್ತು ಸಾಕ್ಷಿ ಆರೋಗ್ಯದಲ್ಲಿ ಚೇತರಿಕೆ ಕಂಡು ಬಂದಿದೆ ಎಂದು ಪೊಲೀಸರು ತಿಳಿಸಿದರು.
Comments are closed.