ಮದುವೆ ನಿಮ್ಮ ವ್ಯಕ್ತಿತ್ವವನ್ನು ಬದಲಿಸುತ್ತದೆಯಂತೆ. ಮದುವೆಯಿಂದ ಬದಲಾದ ವ್ಯಕ್ತಿತ್ವ ಧನಾತ್ಮಕವಾಗಿ ಇರಬಹುದು ಅಥವಾ ಋುಣಾತ್ಮಕವಾಗಿಯೂ ಕಾಡಬಹುದು. ಅಧ್ಯಯನದ ಪ್ರಕಾರ, ವಿವಾಹವಾದ ಮೊದಲ ವರ್ಷದ ಅವಧಿಯಲ್ಲಿ ವಿವಾಹಿತರಲ್ಲಿ ಗಮನಾರ್ಹವಾದ ವ್ಯಕ್ತಿತ್ವ ಬದಲಾವಣೆ ಆಗುತ್ತದೆಯಂತೆ. 169 ನವ ವಿವಾಹಿತರನ್ನು ಅಧ್ಯಯನಕ್ಕೆ ಒಳಪಡಿಸಿದಾಗ ಮೊದಲ ವಾರ್ಷಿಕೋತ್ಸವದ ಸಮಯದಲ್ಲಿ ಅವರಲ್ಲಿ ಏನೆಲ್ಲ ಬದಲಾವಣೆ ಉಂಟಾಗಿತ್ತು ಎಂಬುದನ್ನು ಗಮನಿಸಿದಾಗ ಉದಾರತೆ, ಒಪ್ಪಿಕೊಳ್ಳುವಿಕೆ ಮತ್ತಿತರ ಅಂಶಗಳು ಕಂಡು ಬಂದವು.
ಸಂಬಂಧ ನಿರ್ವಹಿಸಲು ಆತ್ಮ ವಿಶ್ವಾಸ ಕೊರತೆ
ತಂತ್ರಜ್ಞಾನದಿಂದಾಗಿ ಯುವ ಜನತೆಯಲ್ಲಿ ಸಂಬಂಧವನ್ನು ನಿರ್ವಹಿಸಲು ಸಮಸ್ಯೆ ಉಂಟಾಗುತ್ತಿದೆ ಎಂದು ಎಚ್ಚರಿಸಿದೆ ಸಮೀಕ್ಷೆ. ಸಾಮಾಜಿಕ ತಾಣಗಳು ಹಾಗೂ ತಂತ್ರಜ್ಞಾನಗಳ ಮೇಲಿನ ಅವಲಂಬನೆಯಿಂದಾಗಿ ಸಂಬಂಧವನ್ನು ನಿರ್ವಹಿಸುವ ಕೌಶಲ ಹಾಗೂ ಆತ್ಮ ವಿಶ್ವಾಸ ಯುವ ಜನತೆಯಲ್ಲಿ ಕಾಣಿಸುತ್ತಿಲ್ಲ ಎಂದು ಹೇಳಲಾಗಿದೆ. ಅಪಾರ ಪ್ರಮಾಣದಲ್ಲಿ ಸಂಬಂಧಗಳು ಮುರಿದು ಬೀಳುತ್ತಿರುವುದಕ್ಕೆ ಕೂಡ ಇದೇ ಪ್ರಮುಖ ಕಾರಣ ಎಂದು ಹೇಳಲಾಗಿದೆ.
ಸಂಗಾತಿಗಿಂತಲೂ ಮೊಬೈಲ್‌ ಮೇಲಿನ ಸೆಳೆತ
ಜತೆಗೆ ಯಾರಾದರೂ ಇರಲಿ, ಬಿಡಲಿ ಆದರೆ ಪದೇಪದೆ ಮೊಬೈಲ್‌ ಚೆಕ್‌ ಮಾಡುವುದು ಹಲವರಿಗೆ ಅಭ್ಯಾಸ. ಅದು ಎಲ್ಲಿಯವರೆಗೆ ಅಂದರೆ ಸಂಗಾತಿಯೊಂದಿಗೆ ಪ್ರಣಯದ ಸಂದರ್ಭದಲ್ಲೂ ಮೊಬೈಲ್‌ ಚೆಕ್‌ ಮಾಡುತ್ತಾರಂತೆ. ಸಂಗಾತಿಯ ಮೇಲೆ ಸಂಪೂರ್ಣ ಗಮನ ಹರಿಸಲಾಗದೆ ಯಾವುದೋ ಸಂದೇಶ, ನೋಟಿಫಿಕೇಷನ್‌ಗಾಗಿ ಮೊಬೈಲ್‌ ಹುಡುಕಾಡುತ್ತಾರಂತೆ. ಶೇ. 17ರಷ್ಟು ಮಂದಿ ಲೈಂಗಿಕ ಕ್ರಿಯೆಯಲ್ಲಿ ತೊಡಗಿದಾಗಲೂ ತಮ್ಮ ಮೊಬೈಲ್‌ ಪರೀಕ್ಷಿಸುವ ಗೀಳು ಬೆಳೆಸಿಕೊಂಡಿರುತ್ತಾರಂತೆ. ಹಾಗಂತ ಸಮೀಕ್ಷೆಯೊಂದು ಹೇಳಿದೆ.
Comments are closed.