ಗುಜರಾತ್‌ ಚುನಾವಣೆ: ಮತ್ತೆ ಕಮಲ ಕಮಾಲ್‌?

ಹೊಸದಿಲ್ಲಿ: ಗುಜರಾತ್‌ ಚುನಾವಣೆಯಲ್ಲಿ ರಾಜಕೀಯ ಪಕ್ಷಗಳ ಅಬ್ಬರದ ಪ್ರಚಾರಕ್ಕೆ ಇನ್ನೂ ಕೆಲವೇ ದಿನಗಳಲ್ಲಿ ತೆರೆಬೀಳಲಿದೆ. ಇದರ ನಡುವೆಯೇ ವಿಜಯಮಾಲೆ ಯಾರಿಗೆ ಎಂಬ ಲೆಕ್ಕಾಚಾರಗಳು ಶುರುವಾಗಿವೆ. ಟೈಮ್ಸ್‌ ನೌ-ವಿಎಂಆರ್‌ ಸಂಸ್ಥೆ ನಡೆಸಿದ ಚುನಾವಣಾಪೂರ್ವ ಸಮೀಕ್ಷೆಯ ಪ್ರಕಾರ ಬಿಜೆಪಿ ಮತ್ತೊಮ್ಮೆ ಅಧಿಕಾರದ ಗದ್ದುಗೆ ಏರಲಿದೆಯಾದರೂ ಸೀಟುಗಳ ಗಳಿಕೆಯಲ್ಲಿ ಕಳೆದ ಬಾರಿಗಿಂತ ಈ ಸಲ ಹಿಂದೆ ಬೀಳಲಿದೆ.

182 ಸ್ಥಾನಗಳ ಪೈಕಿ ಬಿಜೆಪಿ 111ರಲ್ಲಿ ಗೆಲುವು ಸಾಧಿಸುವ ನಿರೀಕ್ಷೆ ಇದೆ. ಇನ್ನು ಕಾಂಗ್ರೆಸ್‌ 68 ಸೀಟುಗಳಲ್ಲಿ ಗೆಲ್ಲುವ ಮೂಲಕ 2012ಕ್ಕೆ ಹೋಲಿಸಿದರೆ ತನ್ನ ಸ್ಥಾನಬಲದಲ್ಲಿ 7 ಸೀಟುಗಳ ಹೆಚ್ಚಳ ಕಂಡುಕೊಳ್ಳುವ ಸಾಧ್ಯತೆ ಇದೆ.

ಹಾಗೆಯೇ ಬಿಜೆಪಿ ಮತ ಗಳಿಕೆ ಪ್ರಮಾಣದಲ್ಲಿ ಶೇ.3ರಷ್ಟು ಇಳಿಕೆಯಾದರೆ, ಕಾಂಗ್ರೆಸ್‌ ಮತಗಳಿಕೆಯಲ್ಲಿ ಶೇಕಡ 1ರಷ್ಟು ಏರಿಕೆಯಾಗಿದೆ ಎನ್ನಲಾಗಿದೆ.

ಬಿಜೆಪಿ ಎಲ್ಲಾ ಪ್ರಾಂತಗಳಲ್ಲೂ ತನ್ನ ಗೆಲುವು ಕಾಯ್ದುಕೊಂಡಿದೆ. ಕಛ್‌-ಸೌರಾಷ್ಟ್ರ ವಲಯದಲ್ಲಿ ಕಾಂಗ್ರೆಸ್‌ ಬಿಜೆಪಿಗೆ ಪ್ರಬಲ ಪೈಪೋಟಿ ನೀಡಿದೆ. ಆದರೆ, ಕೇಂದ್ರ ಮತ್ತು ದಕ್ಷಿಣ ಗುಜರಾತ್‌ನಲ್ಲಿ ಬಿಜೆಪಿ ಕಾಂಗ್ರೆಸ್‌ಗಿಂತ ಅತ್ಯುತ್ತಮ ಪ್ರದರ್ಶನ ಕಾಯ್ದುಕೊಂಡಿದೆ.

ಇತ್ತೀಚೆಗೆ ಪ್ರವಾಹಕ್ಕೆ ಗುರಿಯಾದ ಉತ್ತರ ಗುಜರಾತ್‌ನಲ್ಲಿ ಬಿಜೆಪಿ ಶೇ.5ರಷ್ಟು ವೋಟುಗಳ ನಷ್ಟ ಅನುಭವಿಸಿದರೆ, ಈ ಭಾಗದಲ್ಲಿ ಕೊಂಚ ಕಾಂಗ್ರೆಸ್‌ ಕೊಂಚ ಹೆಚ್ಚಿನ ಮತಗಳನ್ನು ಸೆಳೆದುಕೊಂಡಿದೆ.

ಸಮೀಕ್ಷೆಗಾಗಿ ಗುಜರಾತ್‌ನ ಎಲ್ಲಾ ನಾಲ್ಕು ಸಾಮಾಜಿಕ-ಆರ್ಥಿಕ ಪ್ರಾಂತ್ಯಗಳ 684 ಮತಗಟ್ಟೆಗಳಲ್ಲಿ 6000ಕ್ಕೂ ಹೆಚ್ಚು ಮಂದಿಯನ್ನು ಸಂದರ್ಶನ ಮಾಡಲಾಗಿದೆ.

ಸೆಕ್ಸ್‌ ಸಿಡಿ ಪರಿಣಾಮವಿಲ್ಲ: ಪಾಟಿದಾರ ಸಮುದಾಯದ ಮೀಸಲಾತಿ ಹೋರಾಟಗಾರ ಹಾರ್ದಿಕ್‌ ಪಟೇಲ್‌ ಅವರ ಸೆಕ್ಸ್‌ ಸಿ.ಡಿ ವಿವಾದವು ಚುನಾವಣೆ ಮೇಲೆ ಪರಿಣಾಮ ಎಂಬ ಪ್ರಶ್ನೆಗೆ ಶೇ. 60ರಷ್ಟು ಮಂದಿ ‘ಇಲ್ಲ’ ಎಂದು ಉತ್ತರಿಸಿದ್ದಾರೆ. ಶೇ. 24ರಷ್ಟು ಮಂದಿ ಈ ವಿವಾದದಿಂದ ಹಾರ್ದಿಕ್‌ ಇಮೇಜ್‌ಗೆ ಧಕ್ಕೆಯಾಗಿದೆ ಎಂದಿದ್ದಾರೆ. ಇನ್ನು ಶೇ. 16ರಷ್ಟು ಮಂದಿ, ಇದರಿಂದ ಹಾರ್ದಿಕ್‌ ಅವರಿಗೆ ಅನುಕಂಪ ದೊರೆತಿದೆ ಎಂದು ಅಭಿಪ್ರಾಯಪಟ್ಟಿದ್ದಾರೆ.

ಸಮೀಕ್ಷೆ-2: ಇನ್ನು ಲೋಕನೀತಿ-ಸಿಎಸ್‌ಡಿಎಸ್‌ ಸಮೀಕ್ಷೆಯ ಪ್ರಕಾರ ಬಿಜೆಪಿಗೆ 91-99 ಸೀಟುಗಳು ಬಂದರೆ, ಕಾಂಗ್ರೆಸ್‌ಗೆ 78-86 ಸ್ಥಾನಗಳು ಬರುವ ಅಂದಾಜಿದೆ. ಇತರೆ ಪಕ್ಷಗಳಿಗೆ 3-7 ಸ್ಥಾನಗಳು ದಕ್ಕಲಿವೆ. ಉಭಯ ಪಕ್ಷಗಳ ಶೇಕಡವಾರು ಮತಗಳಿಕೆ ಪ್ರಮಾಣ 43ರಷ್ಟು ಇರಲಿದೆ ಎಂದು ಅಂದಾಜಿಸಲಾಗಿದೆ.

ಸಮೀಕ್ಷೆ-3: ಎಬಿಪಿ ನ್ಯೂಸ್‌-ಸಿಎಸ್‌ಡಿಎಸ್‌ ಸಮೀಕ್ಷೆಯ ಅನುಸಾರ ಬಿಜೆಪಿಗೆ 95 ಹಾಗೂ ಕಾಂಗ್ರೆಸ್‌ಗೆ 82 ಸೀಟುಗಳು ಬರಲಿವೆ. ಇಲ್ಲೂ ಸಹ ಎರಡೂ ಪಕ್ಷಗಳ ಮತಗಳಿಗೆ ಪ್ರಮಾಣ ಶೇಕಡ 43ರಷ್ಟಿರಲಿದೆ ಎಂದು ನಿರೀಕ್ಷಿಸಲಾಗಿದೆ.