ಕೇಬಲ್‌ ದರ 50 ರೂ. ಏರಿಕೆ?

ಶ್ರೀಕಾಂತ್‌ ಹುಣಸವಾಡಿ

ಬೆಂಗಳೂರು: ಸರಕು ಮತ್ತು ಸೇವಾ ತೆರಿಗೆ-ಜಿಎಸ್‌ಟಿ ಜಾರಿ ನೆಪವೊಡ್ಡಿ ಕೇಬಲ್‌ ಆಪರೇಟರ್‌ಗಳು ಬೆಂಗಳೂರು ನಗರದಲ್ಲಿ ಕೇಬಲ್‌ ದರವನ್ನು ಮತ್ತೆ ಏರಿಸಲು ಮುಂದಾಗಿದ್ದಾರೆ. ಈಗಾಗಲೇ ಕೆಲವು ಕಡೆ ದರ ಏರಿಕೆ ಮಾಡಲಾಗಿದೆ. ಇನ್ನು ಕೆಲವೆಡೆ ಮುಂದಿನ ತಿಂಗಳಿಂದ, ಇಲ್ಲವೇ ಜನವರಿಯಿಂದ ಹೆಚ್ಚಿಸಲು ತೀರ್ಮಾನಿಸಿದ್ದಾರೆ.

ಗ್ರಾಹಕರು ಹಾಲಿ ನೀಡುತ್ತಿದ್ದ ದರದ ಜೊತೆಗೆ ಶೇ.18ರಷ್ಟು ಹೆಚ್ಚುವರಿ ತೆರಿಗೆ ಸೇರಿಸಿ ಪಾವತಿಸಬೇಕಾಗುತ್ತದೆ. ವಾಸ್ತವವಾಗಿ ಹೇಳಬೇಕೆಂದರೆ ಮೊದಲು ಕೇಬಲ್‌ ಆಪರೇಟರ್‌ಗಳ ಮೇಲೆ ಶೇ 25ರಿಂದ 28ರಷ್ಟು ತೆರಿಗೆ ಬೀಳುತ್ತಿತ್ತು, ಆದರೀಗ ಜಿಎಸ್‌ಟಿ ಜಾರಿ ನಂತರ ಜು.1ರಿಂದ ಆ ಪ್ರಮಾಣ ಶೇ.18ಕ್ಕೆ ಇಳಿದಿದೆ. ಹಾಗಾಗಿ ಅವರಿಗೆ ಸುಮಾರು ಶೇ.8 ರಿಂದ 10ರಷ್ಟು ತೆರಿಗೆ ಉಳಿತಾಯವಾಗುತ್ತದೆ. ಆದರೂ ಸಹ ಅವರು ಆ ಹೊರೆಯನ್ನು ಭರಿಸದೆ ಅದನ್ನು ಗ್ರಾಹಕರ ಮೇಲೆ ಹಾಕುವ ಯತ್ನ ನಡೆಸಿದ್ದಾರೆ.

ಜಿಎಸ್‌ಟಿ ಜಾರಿಗೂ ಮುನ್ನ, ರಾಜ್ಯ ಸರಕಾರ ಶೇ.10.5ರಷ್ಟು ಮನರಂಜನಾ ತೆರಿಗೆ ಮತ್ತು ಶೇ.15ರಷ್ಟು ಸೇವಾ ತೆರಿ ವಿಧಿಸುತ್ತಿತ್ತು.ಅವರೆಡೂ ಸೇರಿ ಶೇ.25.5ರಷ್ಟು ತೆರಿಗೆಯನ್ನು ಪಾವತಿಸಬೇಕಿತ್ತು ಮತ್ತು ಅದನ್ನು ಆಪರೇಟರ್‌ಗಳೇ ಪಾವತಿಸುತ್ತಿದ್ದರು. ಇದೀಗ ಜಿಎಸ್‌ಟಿ ಜಾರಿ ನಂತರ ಆ ಎರಡೂ ಸೇರಿ ಸೇರಿ ಒಟ್ಟಿಗೆ ಪಾವತಿಸಬೇಕಾಗಿರುವುದು ಶೇ.18ರಷ್ಟು ಮಾತ್ರ. ಮೊದಲು ತೆರಿಗೆ ಹಣವನ್ನು ತಾವೇ ಪಾವತಿಸುತ್ತಿದ್ದ ಆಪರೇಟರ್‌ಗಳು,ಇದೀಗ ತಾವ್ಯಾಕೆ ತೆರಿಗೆ ಹೊರೆ ಹೊರಬೇಕೆಂದು ಅದನ್ನು ಗ್ರಾಹಕರ ಮೇಲೆ ಹೊರಿಸಲು ಮುಂದಾಗಿದ್ದಾರೆ.

ನಿಲ್ಲದ ಸಂಘರ್ಷ: ಇನ್ನೊಂದೆಡೆ ಯಾರು ಶೇ.18ರಷ್ಟು ತೆರಿಗೆ ಪಾವತಿ ಮಾಡಬೇಕು ಎಂಬ ಬಗ್ಗೆ ನೆಟ್‌ವರ್ಕ್‌ ಪ್ರೊವೈಡರ್ಸ್‌ ಮತ್ತು ಆಪರೇಟರ್ಸ್‌ ನಡುವೆ ಸಂಘರ್ಷ ನಡೆಯುತ್ತಿದೆ. ನೆಟ್‌ವರ್ಕ್‌ ನೀಡುವ ಸಂಸ್ಥೆಗಳು, ಕೇಬಲ್‌ ಆಪರೇಟರ್‌ಗಳಿಗೆ ನೀವೇ ತೆರಿಗೆ ಪಾವತಿಸಿ ಎಂದು ಪಟ್ಟು ಹಿಡಿದಿವೆ. ಆದರೆ ಕೇಬಲ್‌ ಆಪರೇಟರ್‌ಗಳು, ಈಗಾಗಲೇ ಡಿಟಿಎಚ್‌ನಿಂದ ಪ್ರಬಲ ಪೈಪೋಟಿ ಎದುರಿಸುತ್ತಿದ್ದೇವೆ, ಇದೀಗ ಪಡೆಯುತ್ತಿರುವ ದರವನ್ನು ಮತ್ತೆ ಹೆಚ್ಚಳ ಮಾಡಿದರೆ ಗ್ರಾಹಕರು ಕೈಬಿಟ್ಟು ಹೋಗುವ ಸಾಧ್ಯತೆಗಳಿವೆ, ಹಾಗಾಗಿ ನೀವೆ ತೆರಿಗೆ ಪಾವತಿ ಮಾಡಿ ಎಂದು ಸೇವಾ ಪೂರೈಕೆದಾರರಿಗೆ, ಬೇಡಿಕೆಯೊಡ್ಡಿದ್ದಾರೆ.

ಹಾಗಾಗಿ ಕೇಬಲ್‌ ಆಪರೇಟರ್‌ಗಳು ಮತ್ತು ಸೇವಾ ಪೂರೈಕೆದಾರರ ನಡುವೆ ಇದೇ ವಿಷಯಕ್ಕೆ ಸಂಬಂಧಿಸಿದಂತೆ ಹಲವು ಸುತ್ತಿನ ಮಾತುಕತೆಗಳು ನಡೆದರೂ, ಇನ್ನೂ ಸ್ಪಷ್ಟ ನಿರ್ಧಾರ ಮೂಡಿಲ್ಲ. ಸದ್ಯದಲ್ಲೇ ನಡೆಯಲಿರುವ ಮತ್ತೊಂದು ಸಭೆಯಲ್ಲಿ ಆ ಬಗ್ಗೆ ಇತ್ಯರ್ಥವಾಗುವ ಸಾಧ್ಯತೆಗಳಿವೆ ಎನ್ನುತ್ತಾರೆ ಕೇಬಲ್‌ ಆಪರೇಟರ್‌ ಒಬ್ಬರು.

ಏರಿಕೆ ಮಾಡದಿರಲು ನಿರ್ಧಾರ

ಇಂದಿರಾನಗರ, ಕೋರಮಂಗಲ ಮತ್ತಿತರ ಪ್ರದೇಶಗಳಲ್ಲಿ ಸ್ಥಳೀಯ ಕೇಬಲ್‌ ಆಪರೇಟರ್‌ಗಳು ಈಗಾಗಲೇ ದರ ಏರಿಕೆ ಮಾಡಿದ್ದಾರೆ. ಆ ಪ್ರದೇಶದಲ್ಲಿ ಮಾಸಿಕ 350 ರಿಂದ 400 ರೂ. ಸಂಗ್ರಹ ಮಾಡಲಾಗುತ್ತಿದೆ. ಇನ್ನು ಮಧ್ಯಮ ವರ್ಗದವರು, ಕೆಳ ಮಧ್ಯಮ ವರ್ಗದವರು ಹೆಚ್ಚಾಗಿ ಇರುವ ಪ್ರದೇಶಗಳಲ್ಲಿ, ಕೇಬಲ್‌ ದರ ಏರಿಕೆ ಮಾಡಿದರೆ ಇರುವ ಗ್ರಾಹಕರೂ ಕೈತಪ್ಪಿ ಡಿಟಿಎಚ್‌ಗೆ ಹೋಗಬಹುದು ಎಂಬ ಭಯದಿಂದ ದರ ಏರಿಕೆ ಮಾಡದಿರಲು ನಿರ್ಧರಿಸಿದ್ದಾರೆ ಎನ್ನಲಾಗಿದೆ.

ಕೇಬಲ್‌ ಆಪರೇಟರ್‌ಗಳ ಗೋಳು

ಡಿಜಿಟಲೀಕರಣಕ್ಕೆ ಮುನ್ನ, ಸುಮಾರು ಒಂದು ಸಾವಿರ ಕೇಬಲ್‌ ಸಂಪರ್ಕವಿದ್ದರೆ ಅದರಲ್ಲಿ ಅರ್ಧದಷ್ಟು ಅಂದರೆ ಸುಮಾರು 500 ಲೆಕ್ಕ ತೋರಿಸುತ್ತಿದ್ದರು. ಇದರಿಂದ ಸರಕಾರಕ್ಕೆ ಭಾರಿ ಪ್ರಮಾಣದಲ್ಲಿ ತೆರಿಗೆ ವಂಚನೆ ಆಗುತ್ತಿತ್ತು. ಆದರೆ ಈಗ ಡಿಜಿಟಲೀಕರಣ ಕಾರ‍್ಯ ಪೂರ್ಣಗೊಂಡಿರುವುದರಿಂದ ಎಲ್ಲ ಮನೆಗಳಲ್ಲೂ ಸೆಟ್‌ ಟಾಪ್‌ ಬಾಕ್ಸ್‌ ಕಡ್ಡಾಯವಾಗಿದೆ, ಹಾಗಾಗಿ ಎಷ್ಟು ಟಿ.ವಿ. ಸೆಟ್‌ಗಳಿವೆ, ಎಷ್ಟು ಕೇಬಲ್‌ ಸಂಪರ್ಕಗಳಿವೆ ಎಂಬುದು ಖಚಿತವಾಗಿ ಸರಕಾರಕ್ಕೆ ತಿಳಿದಿರುತ್ತದೆ, ಹಾಗಾಗಿ ಮೊದಲಿನಂತೆ ಲೆಕ್ಕದಲ್ಲಿ ಅದಲು ಬದಲು ಮಾಡಲು ಸಾಧ್ಯವಿಲ್ಲ. ಆದ್ದರಿಂದ ಕೇಬಲ್‌ ಆಪರೇಟರ್‌ಗಳಿಗೆ ಮೊದಲಿನಷ್ಟು ಹಣ ಕೈಸೇರುತ್ತಿಲ್ಲ.

”ಕೇಬಲ್‌ ಅನ್ನು ನಿರ್ವಹಿಸುವುದೇ ಕಷ್ಟವಾಗಿದೆ. ಸುಮ್ಮನೆ ಇಷ್ಟು ವರ್ಷದಿಂದ ಮಾಡಿಕೊಂಡು ಬರುತ್ತಿದ್ದೇವೆಲ್ಲಾ ಎಂದು ಮುಂದುವರಿಸಿಕೊಂಡು ಹೋಗುತ್ತಿದ್ದೇವೆ” ಎನ್ನುತ್ತಾರೆ ಕೇಬಲ್‌ ಆಪರೇಟರ್‌ ಮಂಜುನಾಥ್‌.