ಬೆಂಗಳೂರು: ಯಲಹಂಕದ ವಾಯುನೆಲೆಯ ರನ್‌ವೇಯಿಂದ ಬೆಳಕಿನ ವೇಗದಲ್ಲಿ ವಿಮಾನದ ಜೋಡಿಯೊಂದು ಆಗಸಕ್ಕೆ ಜಿಗಿಯುತ್ತಿದ್ದಂತೆ, ಜನರ ಹೃದಯಬಡಿತದ ವೇಗವನ್ನೂ ಹೆಚ್ಚಿಸಿದವು. ಈ ವಿಮಾನಗಳ ರೆಕ್ಕೆಯ ಮೇಲಿದ್ದ ಸುರಸುಂದರಿಯರೇ ಇದಕ್ಕೆ ಕಾರಣ.
ಬರೊಬ್ಬರಿ 200 ಕಿ.ಮೀ. ವೇಗದಲ್ಲಿ ವಿಮಾನಗಳು ಆಗಸದಲ್ಲಿ ಸಾಗುತ್ತಿದ್ದಾಗ ಬೆಡಗಿಯರು ಅದರ ರೆಕ್ಕೆಯನ್ನೇ ವೇದಿಕೆಯನ್ನಾಗಿ ಮಾಡಿಕೊಂಡು ರಮ್ಯ ನರ್ತನ ಮಾಡಲಾರಂಭಿಸಿದರು. ವಿಮಾನ ಗಿರಿಗಿಟ್ಲೆ ಹೊಡೆದಾಗಲೂ ಅವರದ್ದು ಅದೇ ತಾಕತ್ತು ಹುಮ್ಮಸ್ಸು ಧೈರ್ಯ!
ಯಲಹಂಕ ವಾಯುನೆಲೆಯಲ್ಲಿ ಬುಧವಾರ ಆರಂಭಗೊಂಡ ‘ಏರೋ ಇಂಡಿಯಾ–2015’ ವೈಮಾನಿಕ ಪ್ರದರ್ಶನದಲ್ಲಿನ ಒಂದು ಝಲಕ್ ಇದು. ಈ ಸಲದ ಪ್ರದರ್ಶನದಲ್ಲಿ ಜನರಿಗೆ ಭರ್ಜರಿ ರಂಜನೆ ನೀಡಿದ್ದು ಸ್ಕ್ಯಾಂಡಿನೇವಿಯಾದ ಬ್ರೆಟ್ಲಿಂಗ್‌ ‘ವಿಂಗ್‌ ವಾಕರ್ಸ್’ ವಿಮಾನಗಳು.
ಜೊತೆಗೆ ಅಲ್ಲಿ ಝೆಕ್ ರಿಪಬ್ಲಿಕ್‌ನ ‘ಫ್ಲೈಯಿಂಗ್ ಬುಲ್ಸ್’ಗಳ (ಹಾರುವ ಹೋರಿಗಳು) ಘರ್ಜನೆಯೂ ಇತ್ತು. ಅಮೆರಿಕದ ಸಿಡಿಲಬ್ಬರದ ಕೂಗುಮಾರಿಗಳು ಮಿಂಚನ್ನೇ ಹರಿಸಿದವು. ನಡುವೆ ನಡುವೆ ಭಾರತದ ಟೈಗರ್‌ ಮಾತ್‌ (ಹುಲಿ ಮರಿ) ಜೋರಾಗಿ ಸದ್ದೆಬ್ಬಿಸುತ್ತಾ ಸಾಗಿತು.
ವಾಯುನೆಲೆಯಲ್ಲಿ ಉಕ್ಕಿನ ಹಕ್ಕಿಗಳು ನಡೆಸಿದ ಕಸರತ್ತು, ಪ್ರದರ್ಶಿಸಿದ ಚಮತ್ಕಾರ ಮತ್ತು ವೇಗವು ಬಾನಂಗಳದ ಹಕ್ಕಿಗಳನ್ನೂ ನಾಚಿಸುವಂತಿತ್ತು. ಶರವೇಗದಲ್ಲಿ ನಭಕ್ಕೆ ಚಿಮ್ಮಿದ ‘ಭಾರತೀಯ ವಾಯುಸೇನೆಯ ಅಧಿಪತಿ’ ಎಂದೇ ಬಿಂಬಿತವಾಗಿರುವ ಲಘು ಯುದ್ಧ ವಿಮಾನ ತೇಜಸ್, ರೆಪ್ಪೆ ಬಡಿಯುವ ಮುನ್ನವೇ ಆಗಸದಲ್ಲಿ ಕಳೆದು ಹೋಗುತ್ತಿತ್ತು. ಭಾರತದ ‘ಸಾರಂಗ್’ ಹೆಲಿಕಾಪ್ಟರ್‌ಗಳು ಒಂದರ ಪಕ್ಕ ಒಂದು, ಒಂದರ ಮೇಲೆ/ ಕೆಳಗೆ ಮತ್ತೊಂದು ಹಾರಾಡಿ ರಂಜಿಸಿದವು.
50 ವರ್ಷ ದಾಟಿರುವ ಪೈಲಟ್‌ಗಳೇ ಇರುವ ‘ಫ್ಲೈಯಿಂಗ್ ಬುಲ್ಸ್’ ತ್ರಿವಳಿ ವಿಮಾನಗಳು ಡಿಕ್ಕಿ ಹೊಡೆಯುವ ರೀತಿಯಲ್ಲಿ ಎದುರು ಬದುರಾಗಿ, ತಲೆಕೆಳಗಾಗಿ, ಇನ್ನೇನು ನೆಲಕ್ಕೆ ಅಪ್ಪಳಿಸುವಂತೆ ಹೆದರಿಸಿ ನೋಡುಗರ ಕಣ್ಮನ ಸೆಳೆದವು. ಇವುಗಳ ಪ್ರತಿ ಕಸರತ್ತಿಗೂ ಜನರಿಂದ ‘ವಾವ್‌’ ಎಂಬ ಉದ್ಗಾರದ ಪ್ರೋತ್ಸಾಹ!
ಬಾನಿನಲ್ಲಿ ಬಿಸಿಲೇರುತ್ತಿದ್ದಂತೆ ವೈಮಾನಿಕ ದಿಗ್ಗಜರ ‘ಪಟಾಕಿ’ಯ ಸದ್ದುಗದ್ದಲ ಶುರುವಾಯಿತು. ಆಗಸದಲ್ಲಿ ಬೆಂಕಿ ಬಿರುಗಾಳಿಯ ರೌದ್ರಾವತಾರ ಕಂಡುಬಂತು. ಜನಸಾಗರಕ್ಕೆ ಸಿಕ್ಕಿದ್ದು ರಸದೌತಣದ ತೃಪ್ತಿ. ಭಾರತವೂ ಸೇರಿದಂತೆ ನಾನಾ ದೇಶಗಳ ಯುದ್ಧ ವಿಮಾನ, ಲಘು ಯುದ್ಧ ವಿಮಾನ, ಹಗುರ ವಿಮಾನ ಮತ್ತು ಹೆಲಿಕಾಪ್ಟರ್‌ಗಳು ಅಕ್ಷರಶಃ ಆಗಸಕ್ಕೆ ಮುತ್ತಿಕ್ಕಿ ಬಂದವು. ಕೆಲವು ತಮ್ಮ ಚಮತ್ಕಾರದಿಂದ ಮನಗೆದ್ದರೆ, ಇನ್ನೂ ಹಲವು ತಮ್ಮ ವೇಗ ಮತ್ತು ಶಬ್ದದಿಂದ ಮೈನವಿರೇಳಿಸಿದವು.
ಹೊಗೆಯ ಬದಲಿಗೆ ಬೆಂಕಿ ಉಗುಳಿದ ‘ಸುಖೋಯ್‌’ ಮತ್ತು ಫ್ರಾನ್ಸ್‌ನ ‘ರಫೇಲ್’ ಯುದ್ಧ ವಿಮಾನಗಳು ಆಗಸದಲ್ಲಿ ನಡೆಸಿದ ಚಮತ್ಕಾರ ನೋಡುಗರ ಮೆಚ್ಚುಗೆಗೆ ಪಾತ್ರವಾದವು.
ರಣಹದ್ದುಗಳು ಮಾಯ: ಕಳೆದ ಬಾರಿಯ ಪ್ರದರ್ಶನದ ಮೆರುಗು ಹೆಚ್ಚಿಸಿದ್ದ ಜಗತ್ಪ್ರಸಿದ್ಧ ‘ರಷ್ಯಾದ ರಣಹದ್ದುಗಳ’ (ರಷ್ಯನ್ ನೈಟ್ಸ್ ತಂಡ) ಮೈ ನಡುಗಿಸುವ ಪ್ರದರ್ಶನ ಈ ಸಲ ಇರಲಿಲ್ಲ.
ರಣಹದ್ದುಗಳ ಕಾಟ: ಲೋಹದ ಹಕ್ಕಿಗಳ ಚಮತ್ಕಾರಕ್ಕೆ ಆಗಾಗ ಅಡ್ಡಿಪಡಿಸಲು ಪ್ರಯತ್ನಿಸಿದ್ದು ‘ರಣಹದ್ದು’ಗಳು. ಬೆಳಿಗ್ಗೆಯಿಂದಲೇ ರಣಹದ್ದುಗಳು ವಾಯುನೆಲೆಯತ್ತಲೇ ಧಾವಿಸುತ್ತಿದ್ದವು. ಅವುಗಳ ಕಿರಿಕಿರಿ ತಪ್ಪಿಸಲು ಸಿಬ್ಬಂದಿ ಹರಸಾಹಸ ಪಡುತ್ತಿದ್ದರು.
