ಕರ್ನಾಟಕ

ರಕ್ಷಣಾ ಕ್ಷೇತ್ರದಲ್ಲಿ ಸ್ವಾವಲಂಬನೆ; ವೈಮಾನಿಕ ಪ್ರದರ್ಶನಕ್ಕೆ ಚಾಲನೆ ನೀಡಿದ ಪ್ರಧಾನಿ ಮೋದಿ ಪ್ರತಿಪಾದನೆ

Pinterest LinkedIn Tumblr

MODI-@-aero-show2015

ಬೆಂಗಳೂರು: ‘ರಕ್ಷಣಾ ಸಾಮಗ್ರಿಗಳ ಆಮದು ಕ್ಷೇತ್ರ­ದಲ್ಲಿ ಜಗತ್ತಿನಲ್ಲಿಯೇ ನಂ. 1 ರಾಷ್ಟ್ರ ಎಂಬ ಹಣೆಪಟ್ಟಿಯನ್ನು ಭಾರತ ಆದಷ್ಟು ಬೇಗ ಕಳಚಿ­ಕೊಳ್ಳ­ಬೇಕಿದ್ದು, ಮುಂದಿನ ಐದು ವರ್ಷಗಳಲ್ಲಿ ಶೇ 70ರಷ್ಟು ರಕ್ಷಣಾ ಸಲಕರಣೆಗಳನ್ನು ದೇಶದಲ್ಲೇ ತಯಾರಿಸುವ ಅಗತ್ಯವಿದೆ’ ಎಂದು ಪ್ರಧಾನಿ ನರೇಂದ್ರ ಮೋದಿ ಪ್ರತಿಪಾದಿ­ಸಿದ್ದಾರೆ.

ಯಲಹಂಕದ ಭಾರತೀಯ ವಾಯು­ಪಡೆ ನೆಲೆ­ಯಲ್ಲಿ ಬುಧವಾರ 10ನೇ ‘ಏರೋ ಇಂಡಿಯಾ’ ವೈಮಾನಿಕ ಪ್ರದರ್ಶನ ಉದ್ಘಾಟಿಸಿ ಅವರು ಮಾತನಾ­ಡಿದರು.

‘ಆಮದು ಕ್ಷೇತ್ರದಲ್ಲಿ ನಾವು ನಂ. 1 ಎನ್ನುವುದು ವಿದೇಶಿ ಉದ್ದಿಮೆದಾರರ ಕಿವಿಗಳಿಗೆ ಸಂಗೀತದಂತೆ ಬಲು ಇಂಪಾಗಿ ಕೇಳಬಹುದು. ಆದರೆ, ಈ ವಲಯದಲ್ಲಿ ನಮಗೆ ಅಗ್ರಪಟ್ಟ ಬೇಕಿಲ್ಲ’ ಎಂದು ಚಟಾಕಿ ಹಾರಿಸಿದರು. ರ

ಕ್ಷಣಾ ಸಾಮಗ್ರಿ ತಯಾರಿ­ಕೆ­ಯಲ್ಲಿ ಸ್ವಾವಲಂಬ­ನೆಯ ಅಗತ್ಯವನ್ನು ಬಲವಾಗಿ ಪ್ರತಿಪಾದಿಸಿದ ಅವರು, ‘ವಿದೇಶಿ ಕಂಪೆನಿಗಳು ಕೇವಲ

ಮಾರಾಟ ಮಾಡುವ ವ್ಯಾಪಾರಿಗಳಾಗದೆ ದೇಶದ ರಕ್ಷಣಾ ಸಾಮಗ್ರಿಗಳ ತಯಾರಿಕೆ ಕ್ಷೇತ್ರದ ಪಾಲುದಾರ­ರಾಗಬೇಕು. ನಮಗೆ ಅವು­ಗಳ ತಂತ್ರಜ್ಞಾನ, ಕೌಶಲ ಹಾಗೂ ಉತ್ಪಾದನಾ ಶಕ್ತಿ ಮೂರೂ ಬೇಕು’ ಎಂದು ಹೇಳಿದರು.

‘ರಕ್ಷಣಾ ವಲಯದಲ್ಲಿ ವಿದೇಶಿ ನೇರ ಬಂಡ­ವಾಳ ಹೂಡಿಕೆಯನ್ನು ಶೇ 49ಕ್ಕೆ ಹೆಚ್ಚಿಸಲಾಗಿದೆ. ಉತ್ಕೃಷ್ಟ ತಂತ್ರಜ್ಞಾನ ತರುವುದಾದರೆ ಈ ಮಿತಿ­ಯನ್ನು ಇನ್ನೂ ಹೆಚ್ಚಿಸಲು ನಾವು ಸಿದ್ಧರಿದ್ದೇವೆ’ ಎಂದು ವಿದೇಶಿ ಕಂಪೆನಿಗಳಿಗೆ ಅವರು ಭರವಸೆ ನೀಡಿದರು.

‘ರಕ್ಷಣಾ ಕ್ಷೇತ್ರದಲ್ಲಿ ದೇಶಿ ಕೈಗಾರಿಕೆ­ಗಳನ್ನು ಅಭಿವೃದ್ಧಿಪಡಿಸುವುದು ‘ಭಾರತ­ದಲ್ಲಿಯೇ ತಯಾ­ರಿಸಿ’ ಅಭಿ­ಯಾನದ ಹೃದಯ ಭಾಗವಾ­ಗಿದೆ’ ಎಂದ ಅವರು, ‘ಸರ್ಕಾರಿ, ಖಾಸಗಿ ಹಾಗೂ ವಿದೇಶಿ ಸಂಸ್ಥೆ­ಗಳನ್ನು ಒಟ್ಟಾಗಿ ಸೇರಿಸಿಕೊಂಡು ನಾವು ಕೈಗಾರಿಕೆ­ಗಳನ್ನು ಬೆಳೆಸಲಿದ್ದೇವೆ’ ಎಂದು ತಿಳಿಸಿದರು.

‘ವಿದೇಶಿ ಕಂಪೆನಿಗಳು ರಕ್ಷಣಾ ಸಾಮಗ್ರಿಗಳನ್ನು ಭಾರತದಲ್ಲಿ ತಯಾರಿಸಿ ಇಲ್ಲಿನ ಬೇಡಿಕೆಯನ್ನು ಪೂರೈಸುವ ಜತೆಗೆ ತಮ್ಮ ಜಾಗತಿಕ ಪೂರೈಕೆ ಜಾಲ­ವನ್ನೂ ವಿಸ್ತರಿಸಿಕೊಳ್ಳಬೇಕು’ ಎಂದು ಅವರು ಸಲಹೆ ನೀಡಿದರು. ‘ವಿದೇಶಗಳಲ್ಲಿ ತಯಾರಿಸಿದ ಬಿಡಿ­ಭಾಗಗಳನ್ನು ಇಲ್ಲಿ ತಂದು ಜೋಡಿಸಿದ ಮಾತ್ರಕ್ಕೆ ಅದನ್ನು ಭಾರತದಲ್ಲಿ ತಯಾರು ಮಾಡಲಾಗಿದೆ ಎನ್ನಲಾಗದು’ ಎಂದು ಹೇಳಿದರು.

‘ಬಾಹ್ಯ ಹಾಗೂ ಆಂತರಿಕ ಭದ್ರತಾ ಸವಾಲು­ಗಳು ಹೆಚ್ಚಿರುವ ಈ ದಿನಗಳಲ್ಲಿ ನಮ್ಮ ರಕ್ಷಣಾ ಪಡೆ­ಗಳಿಗೆ ತಂತ್ರಜ್ಞಾನ ಆಧಾರಿತ ಆಧುನಿಕ ಶಸ್ತ್ರಾ­ಸ್ತ್ರ­ಗಳನ್ನು ಒದಗಿಸಬೇಕಿದ್ದು, ರಕ್ಷಣಾ ಖರೀದಿ ನೀತಿ­ಯಲ್ಲಿ ಸರ್ಕಾರ ಇನ್ನಷ್ಟು ಸುಧಾ­ರಣಾ ಕ್ರಮಗ­ಳನ್ನು ತರಲು ಉತ್ಸುಕವಾಗಿದೆ’ ಎಂದು ವಿವರಿಸಿದರು.

‘ನಾವು ರಾಷ್ಟ್ರೀಯ ಉತ್ಪಾದನಾ ಸಾಮರ್ಥ್ಯದ ಬಗ್ಗೆ ಮಾತನಾ­ಡುತ್ತೇವೆಯೇ ಹೊರತು ಸರ್ಕಾರಿ ಅಥವಾ ಖಾಸಗಿ ವಲಯ ಎಂಬ ಭೇದ ಎಣಿಸುವುದಿಲ್ಲ. ಸಂಶೋಧನೆ ಮತ್ತು ಅಭಿವೃದ್ಧಿ ಚಟುವಟಿಕೆಗಳಿಗೆ ಉತ್ತೇಜನ ನೀಡಲು ತಂತ್ರಜ್ಞಾನ ಅಭಿವೃದ್ಧಿ ನಿಧಿ ಸ್ಥಾಪಿಸಿದ್ದೇವೆ’ ಎಂದು ಹೇಳಿದರು.

‘ರಕ್ಷಣಾ ಸಲಕರಣೆಗಳ ತಯಾರಿಕೆ­ಯಲ್ಲಿ ದೇಶದ ಸಣ್ಣ ಹಾಗೂ ಮಧ್ಯಮ ಕೈಗಾರಿಕೆಗಳು ಹೆಚ್ಚಿನ ಪ್ರಮಾಣದಲ್ಲಿ ತೊಡಗಿಸಿಕೊಳ್ಳಬೇಕು. ಮುಂದಿನ ಹತ್ತು ವರ್ಷಗಳಲ್ಲಿ ಈ ವಲಯದಿಂದ 20 ಲಕ್ಷ ಉದ್ಯೋಗ ಸೃಷ್ಟಿ ಗುರಿ ಹೊಂದ­ಲಾಗಿದೆ’ ಎಂದರು.

‘ನಮ್ಮ ಸರ್ಕಾರಿ ಉದ್ದಿಮೆಗಳು ಇನ್ನೂ ಉತ್ತಮ ಸಾಧನೆ ತೋರುವ ಅಗತ್ಯವಿದೆ. ತಮ್ಮ ಸೌಲಭ್ಯ ಹಾಗೂ ಸಾಮರ್ಥ್ಯವನ್ನು ಅವುಗಳು ಇದುವರೆಗೆ ಸಮರ್ಪಕವಾಗಿ ಬಳಕೆ ಮಾಡಿ­ಕೊಂಡಿಲ್ಲ’ ಎಂದು ಅಭಿಪ್ರಾಯಪಟ್ಟರು.

ಟೋಪಿ ಧರಿಸಿ ಆಕಾಶದತ್ತ ಕಣ್ಣು
ಉದ್ಘಾಟನಾ ಸಮಾರಂಭದ ಬಳಿಕ ನಡೆದ ವೈಮಾನಿಕ ಪ್ರದರ್ಶ­ನವನ್ನು ಪ್ರಧಾನಿ ನರೇಂದ್ರ ಮೋದಿ ಟೋಪಿ ಧರಿಸಕೊಂಡು ಬಿಸಿಲಲ್ಲೇ ಕುಳಿತು ವೀಕ್ಷಿಸಿ­ದರು. ದೇಶಿ ನಿರ್ಮಿತ ‘ತೇಜಸ್‌’ ಹಗುರ ಯುದ್ಧ ವಿಮಾನ ಗಗನ­ದಲ್ಲಿ ನಡೆಸಿದ ಕಸರತ್ತು ಕಂಡು ಚಪ್ಪಾಳೆ ತಟ್ಟಿದರು. ಧ್ರುವ ಹೆಲಿ­ಕಾಪ್ಟರ್‌ಗಳನ್ನು ಒಳಗೊಂಡ ‘ಸಾರಂಗ’ ತಂಡದ ಪ್ರದರ್ಶನವೂ ಅವರ ಮನಸೂರೆಗೊಂಡಿತು. ಹಿಂದೂಸ್ತಾನ್‌ ಏರೋನಾಟಿಕ್ಸ್‌ ಲಿಮಿಟೆಡ್‌ (ಎಚ್‌ಎಎಲ್‌) ಹಾಗೂ ಭಾರತ್‌ ಇಲೆಕ್ಟ್ರಾನಿಕ್ಸ್‌ ಲಿಮಿಟೆಡ್‌ (ಬಿಇಎಲ್‌) ಮಳಿಗೆಗಳನ್ನೂ ಅವರು ವೀಕ್ಷಿಸಿದರು.

Write A Comment