ಕರ್ನಾಟಕ

ದೇವನೂರು ನಿಲುವು ಅತಿರೇಕದ್ದು: ಸಾಹಿತಿ ಪ್ರೊ.ಚಂದ್ರಶೇಖರ ಪಾಟೀಲ

Pinterest LinkedIn Tumblr

champa

ಬೆಂಗಳೂರು: ಅಖಿಲ ಭಾರತ 81ನೇ ಕನ್ನಡ ಸಾಹಿತ್ಯ ಸಮ್ಮೇಳನ ಅಧ್ಯಕ್ಷರ ಆಯ್ಕೆ ವಿಚಾರದಲ್ಲಿ ಕನ್ನಡ ಸಾಹಿತ್ಯ ಪರಿಷತ್ ಅಧ್ಯಕ್ಷ ಪುಂಡಲೀಕ ಹಾಲಂಬಿ ಸ್ವಲ್ಪ ಹಾದಿ ತಪ್ಪಿದ್ದಾರೆ. ಇನ್ನು ಸಾಹಿತಿ ದೇವನೂರ ಮಹಾದೇವ ಅವರ ನಿಲುವು ಅತಿರೇಕದ್ದು ಎಂದು ಸಾಹಿತಿ ಪ್ರೊ.ಚಂದ್ರಶೇಖರ ಪಾಟೀಲ ಟೀಕಿಸಿದರು.

ಕನ್ನಡ ಮತ್ತು ಸಂಸ್ಕೃತಿ ಇಲಾಖೆಯು ಕನ್ನಡ ಭವನದ ನಯನ ಸಭಾಂಗಣದಲ್ಲಿ ಶನಿವಾರ ಹಮ್ಮಿಕೊಂಡಿದ್ದ ‘ಮನೆಯಂಗಳದಲ್ಲಿ ಮಾತುಕತೆ’ ಕಾರ್ಯಕ್ರಮದಲ್ಲಿ ಪಾಲ್ಗೊಂಡು ಅವರು ಮಾತನಾಡಿದರು.

”ಕನ್ನಡ ಸಾಹಿತ್ಯ ಪರಿಷತ್ತು ಕಾರ್ಯಕಾರಿ ಸಮಿತಿ ಸಭೆಯಲ್ಲಿ ಸಮ್ಮೇಳನಾಧ್ಯಕ್ಷರ ಆಯ್ಕೆ ವಿಚಾರದ ಬಗ್ಗೆ ಪ್ರಸ್ತಾಪ ಮಂಡಿಸಿ ಸರ್ವಾನುಮತ ಅಥವಾ ಬಹುಮತದ ನಿರ್ಣಯ ಕೈಗೊಳ್ಳಬೇಕಾಗಿತ್ತು. ಆದರೆ ಕಸಾಪ ಅಧ್ಯಕ್ಷರು ಸಾಹಿತಿಯ ಮನೆಗೇ ಹೋಗಿ, ನಿಮ್ಮನ್ನು ಸಮ್ಮೇಳನಾಧ್ಯಕ್ಷರನ್ನಾಗಿ ಮಾಡುತ್ತೇವೆ ಎಂದು ಹೇಳಿದ್ದು ಪ್ರಜಾಸತ್ತಾತ್ಮಕವಾದುದಲ್ಲ. ಈ ವಿಚಾರದಲ್ಲಿ ಕಸಾಪ ಅಧ್ಯಕ್ಷ ಪುಂಡಲೀಕ ಹಾಲಂಬಿ ಸ್ವಲ್ಪ ಹಾದಿ ತಪ್ಪಿದರು ಎಂಬುದು ನನ್ನ ಅಭಿಪ್ರಾಯ,” ಎಂದು ಹೇಳಿದರು.

”ಸಾಹಿತಿ ದೇವನೂರ ಮಹಾದೇವ ಒಳ್ಳೆಯ ವ್ಯಕ್ತಿ. ಆದರೆ ಪ್ರಾಥಮಿಕ ಹಂತದಲ್ಲಿ ಕನ್ನಡ ಭಾಷಾ ಮಾಧ್ಯಮ ಕಡ್ಡಾಯವಾಗಿ ಅನುಷ್ಠಾನಗೊಳ್ಳುವವರೆಗೆ ಸಮ್ಮೇಳನಾಧ್ಯಕ್ಷ ಸ್ಥಾನ ವಹಿಸಿಕೊಳ್ಳುವುದಿಲ್ಲ, ಬೇಕಾದರೆ ಸಾಹಿತ್ಯ ಸಮ್ಮೇಳನವನ್ನೇ ರದ್ದುಪಡಿಸಿ ಎಂಬ ಷರತ್ತು ವಿಧಿಸಿ ಗೊಂದಲ ಸೃಷ್ಟಿಸಿದ್ದು ತಪ್ಪು. ಬೇಕಿದ್ದರೆ ದೇವನೂರು ಸಮ್ಮೇಳನಾಧ್ಯಕ್ಷ ಸ್ಥಾನ ಒಪ್ಪದೆ ಸುಮ್ಮನೆ ಇದ್ದುಬಿಡಬಹುದಿತ್ತು. ಆದರೆ ಷರತ್ತು ವಿಧಿಸಿದ್ದು ಅತಿರೇಕದ ನಿಲುವು,” ಎಂದು ಟೀಕಿಸಿದರು.

ಎಡಬಿಡಂಗಿಗಳಿಂದ ಉದ್ಧಾರವಾಗೋಲ್ಲ
”ಎಡಬಿಡಂಗಿ ಸಾಹಿತಿಗಳು ಹಾಗೂ ರಾಜಕಾರಣಿಗಳಿಂದ ಕನ್ನಡ ಉದ್ಧಾರ ಸಾಧ್ಯವಿಲ್ಲ. ಕನ್ನಡ ಭಾಷಾ ಮಾಧ್ಯಮದ ಅನುಷ್ಠಾನ ವಿಚಾರಕ್ಕೆ ಬಂದಾಗ ಸಾಹಿತಿಗಳಲ್ಲಿ ಎಂದಿಗೂ ಒಮ್ಮತ ಮೂಡುವುದೇ ಇಲ್ಲ. ಕನ್ನಡ ಪಂಡಿತರು, ವಿದ್ವಾಂಸರು, ಜ್ಞಾನಪೀಠಿಗಳು, ಅಜ್ಞಾನಪೀಠಿಗಳಿಂದ ಕನ್ನಡದ ಉದ್ಧಾರ ಆಗಬೇಕಿಲ್ಲ. ಕನ್ನಡ ಕಟ್ಟಿ ಬೆಳೆಸುವ ಬಗ್ಗೆ ಕಳಕಳಿ ಹೊಂದಿರುವ ಕೋಟ್ಯಂತರ ಕನ್ನಡಪರ ಹೋರಾಟಗಾರರು ನಮ್ಮಲ್ಲಿದ್ದಾರೆ. ಸಾಹಿತಿಗಳು ಅವರಿಗೆ ಬೆಂಬಲ ಸೂಚಿಸುವ ಮೂಲಕ ತಮ್ಮ ಪಾಡಿಗೆ ತಾವು ಸುಮ್ಮನಿದ್ದರೆ ಒಳಿತು,” ಎಂದು ಸಲಹೆ ನೀಡಿದರು.

ಬೆಂಬಲಿಸದಿದ್ದರೂ ಪರವಾಗಿಲ್ಲ
”ನಮ್ಮ ಸಾಹಿತಿಗಳಿಗೆ ತಮ್ಮ ಮಕ್ಕಳು, ಮೊಮ್ಮಕ್ಕಳನ್ನು ಕನ್ನಡ ಮಾಧ್ಯಮ ಶಾಲೆಗಳಲ್ಲಿ ಓದಿಸುವ ಕನಿಷ್ಠ ಪ್ರಮಾಣದ ಪ್ರಾಮಾಣಿಕತೆ ಇಲ್ಲ. ಬಡವರ ಮಕ್ಕಳು ಮಾತ್ರ ಕನ್ನಡ ಶಾಲೆಗೆ ಹೋಗಲಿ, ನಮ್ಮ ಮಕ್ಕಳು ಕಾನ್ವೆಂಟ್‌ನಲ್ಲಿ ಓದಲಿ ಎಂಬ ನಿಲುವು ಸರಿಯಲ್ಲ. ಸಾಹಿತಿಗಳು ಕನ್ನಡಪರ ಹೋರಾಟಕ್ಕೆ ಬೆಂಬಲ ಸೂಚಿಸದಿದ್ದರೂ ಪರವಾಗಿಲ್ಲ, ಬೇಕಾದರೆ ಕಂಬಳಿ ಹೊದ್ದು ಮಲಗಿಬಿಡಿ. ಆದರೆ ಪತ್ರಿಕೆಗಳಿಗೆ ಪತ್ರ ಬರೆದು ಅಪಸ್ವರ ತೆಗೆಯಬೇಡಿ,” ಎಂದು ಮನವಿ ಮಾಡಿದರು.

ಕನ್ನಡ ಮತ್ತು ಸಂಸ್ಕೃತಿ ಇಲಾಖೆಯ ನಿರ್ದೇಶಕ ಕೆ ಎ ದಯಾನಂದ ಮತ್ತಿತರರು ಉಪಸ್ಥಿತರಿದ್ದರು.

ಚಂಪಾ ಮತ್ತೇನು ಹೇಳಿದರು?
ಉತ್ತರ ಕರ್ನಾಟಕವನ್ನು ಪ್ರತ್ಯೇಕ ರಾಜ್ಯವನ್ನಾಗಿಸಬೇಕೆಂಬ ಕೂಗು ಪಾಪ ಅಥವಾ ಅಪರಾಧವಲ್ಲ. ಪ್ರತ್ಯೇಕತೆಯ ಕೂಗು ಎಂದಿಗೂ ತನ್ನಷ್ಟಕ್ಕೆ ತಾನೇ ಉದ್ಭವವಾಗುವುದಿಲ್ಲ. ರಾಜ್ಯ ಸರಕಾರ ರೋಗದ ಮೂಲ ಲಕ್ಷಣವನ್ನು ಸಕಾಲದಲ್ಲಿ ಪತ್ತೆ ಮಾಡಿ ಚಿಕಿತ್ಸೆ ನೀಡುವುದರಿಂದ ಈ ಭಾವನೆ ಹೋಗಲಾಡಿಸಬಹುದು.

– ಕರ್ನಾಟಕ ಜನತಾ ಪಕ್ಷ ಸ್ಥಾಪಿಸಿದ ಮಾಜಿ ಮುಖ್ಯಮಂತ್ರಿ ಯಡಿಯೂರಪ್ಪ, ಅದನ್ನು ಬಿಜೆಪಿ ಜತೆ ವಿಲೀನಗೊಳಿಸಿ ಮಾತೃಪಕ್ಷಕ್ಕೆ ಮರಳುವ ಮೂಲಕ ಕನ್ನಡದ ಜನತೆಗೆ ದ್ರೋಹ ಬಗೆದಿದ್ದಾರೆ.

-ದೇವರಿದ್ದಾನೆ ಎಂಬ ಪರಿಕಲ್ಪನೆಯೇ ಜಗತ್ತಿನ ಅತ್ಯಂತ ದೊಡ್ಡ ಮೂಢನಂಬಿಕೆ. ದೇವರನ್ನು ನಂಬುವುದನ್ನು ಮೊದಲು ಬಿಟ್ಟುಬಿಡಿ. ಉಳಿದ ಮೂಢನಂಬಿಕೆಗಳನ್ನು ನಿಧಾನವಾಗಿ ನಿವಾರಿಸಬಹುದು.

-ನಾನು ನಾಸ್ತಿಕ. ನನಗೆ ದೇವರು, ಸ್ವರ್ಗ-ನರಕ, ಪಾಪ-ಪುಣ್ಯದಲ್ಲಿ ನಂಬಿಕೆ ಇಲ್ಲ. ಶ್ರೀಕೃಷ್ಣ ಕೇವಲ ಕಾಲ್ಪನಿಕ. ಶ್ರೀಕೃಷ್ಣ ಎಲ್ಲಿ ಯಾವಾಗ ಹುಟ್ಟಿದ, ಎಲ್ಲಿ ಸತ್ತ ಎಂಬುದರ ಬಗ್ಗೆ ದಾಖಲೆ ಕೊಡಿ. ಆಗ ಶ್ರೀಕೃಷ್ಣನ ಬಗ್ಗೆ ಪ್ರಸ್ತಾಪಿಸುತ್ತೇನೆ.

-ವೀರಶೈವ-ಲಿಂಗಾಯತರ ಬಗ್ಗೆ ನಾನು ಗೊಂದಲ ಸೃಷ್ಟಿಸಲು ಪ್ರಯತ್ನಿಸುವುದಿಲ್ಲ. ವೀರಶೈವ/ಲಿಂಗಾಯತ ಎಂದು ಹೇಳಿಕೊಳ್ಳುವುದೇ ಉತ್ತಮ. ಏಕೆಂದರೆ ಬಾರ್‌ನೊಳಗೆ ಇಬ್ಬರೂ ಸಿಗುತ್ತಾರೆ.

– ದ ರಾ ಬೇಂದ್ರೆ, ನಾಡಿನ ಮಹತ್ವದ ಕವಿಗಳಲ್ಲಿ ಒಬ್ಬರು. ಆದರೆ ಬಹಳ ಸಣ್ಣ ಮನುಷ್ಯ. ಮಹಾನ್ ಜಾತಿವಾದಿ, ಪುರೋಹಿತಶಾಹಿ. ಜಾತಿಗೆ ಜೋತುಬಿದ್ದ ಸಣ್ಣ ಮನುಷ್ಯ. ಅವರ ಕಾವ್ಯಗಳ ಬಗ್ಗೆ ನನಗೆ ಗೌರವ ಇದೆ. ಆದರೆ ಒಬ್ಬ ಮನುಷ್ಯನಾಗಿ ಅವರನ್ನು ನಾನು ಒಪ್ಪುವುದಿಲ್ಲ.

Write A Comment