ಅಮೆರಿಕದಲ್ಲಿ ಮಾನವನ ಮೇಲೆ ಕೊರೊನಾ ಲಸಿಕೆ ಪ್ರಯೋಗ ಆರಂಭ

ನ್ಯೂಯಾರ್ಕ್: ಕೊರೊನಾ ವೈರಸ್ ಸಾಂಕ್ರಾಮಿಕ ರೋಗಕ್ಕ ಸಮರೋಪಾದಿಯಲ್ಲಿ ಲಸಿಕೆ ಕಂಡು ಹುಡುಕುವ ಪ್ರಯತ್ನ ನಡೆಯುತ್ತಿದೆ.

ಈ ಮಧ್ಯೆ ಅಮೆರಿಕ ಮೂಲದ ಪ್ರಮುಖ ಔಷಧ ಕಂಪನಿ ಫಿಜರ್ (Pfizer) ಮತ್ತು ಜರ್ಮನಿಯ ಔಷಧ ಕಂಪನಿ ಬಯೋಟೆಕ್ (BioNTech) ಜಂಟಿಯಾಗಿ ಅಮೆರಿಕದಲ್ಲಿ ಸೋಮವಾರದಿಂದ ಮಾನವನ ಮೇಲೆ ಕೊರೊನಾ ಲಸಿಕೆ ಪ್ರಯೋಗವನ್ನು ಪ್ರಾರಂಭಿಸಿದೆ ಎಂಬುದನ್ನು ತಿಳಿಸಿದೆ.

ಇಡೀ ಜಗತ್ತೇ ಕೊರೊನಾಗೆ ಲಸಿಕೆ ಹುಡುಕುತ್ತಿರುವ ಈ ಸಂದರ್ಭದಲ್ಲಿ ಇದೊಂದು ಉತ್ತಮ ಬೆಳವಣಿಗೆಯಾಗಿದೆ. ಅಲ್ಲದೆ ಕೊರೊನಾ ವೈರಸ್ ಲಸಿಕೆ ಸೆಪ್ಟೆಂಬರ್ ವೇಳೆಗೆ ತುರ್ತು ಬಳಕೆಗೆ ಸಿದ್ಧವಾಗಬಹುದು ಎಂಬ ಆಶಾವಾದವನ್ನು ವ್ಯಕ್ತಪಡಿಸಿದೆ.

ಈ ಎರಡು ಸಂಸ್ಥೆಗಳು ಜಂಟಿಯಾಗಿ ‘ಮೆಸೆಂಜರ್ ಆರ್‌ಎನ್‌ಎ’ ಎಂದು ಕರೆಯಲ್ಪಡುವ ಅನುವಂಶಿಕ ವಸ್ತುಗಳ ಆಧಾರದ ಮೇಲೆ ಲಸಿಕೆ ಅಭಿವೃದ್ಧಿಪಡಿಸುತ್ತಿದೆ. ಇದು ಜೀವಕೋಶಗಳಿಗೆ ಪ್ರೋಟೀನ್‌ಗಳನ್ನು ತಯಾರಿಸಲು ನೆರವಾಗುತ್ತದೆ.

ಮೆಸೆಂಜರ್ ಆರ್‌ಎನ್‌ಎ ಚುಚ್ಚುಮದ್ದಿನ ಮೂಲಕ ಶರೀರದೊಳಗೆ ಸೇರಿಸಲಾಗುತ್ತದೆ. ಇದು ಬಳಿಕ ವ್ಯಕ್ತಿಯನ್ನು ಅನಾರೋಗ್ಯಗೊಳಿಸದೆ ಜಿವಕೋಶಗಳಿಗೆ ಪ್ರೋಟೀನ್ ಉತ್ಪಾದಿಸುತ್ತದೆ.

ಕೊರೊನಾ ವೈರಸ್ ಸೋಂಕಿನ ವಿರುದ್ಧ ಹೋರಾಡಲು ಈ ಲಸಿಕೆ ಅತ್ಯಂತ ಪರಿಣಾಮಕಾರಿ ಎನಿಸಿಕೊಳ್ಳಲಿದೆ ಎನ್ನಲಾಗಿದೆ. ಇದು ರೋಗ ನಿರೋಧಕ ಶಕ್ತಿಯನ್ನು ಉತ್ಪಾದಿಸಲು ನೆರವಾಗಲಿದೆ. ಸಾಂಪ್ರದಾಯಿಕ ಲಸಿಕಗಳಿಗಿಂತ ಹೆಚ್ಚು ಸ್ಥಿರವಾಗಿ ಹಾಗೂ ವೇಗವಾಗಿ ನಿರ್ವಹಿಸಲಿದೆ.

ಮಾಡರ್ನಾ, ಇನೋವಿಯೊ, ಕ್ಯಾನ್ಸಿನೊ ಮುಂತಾದ ಔಷಧ ಸಂಸ್ಥೆಗಳು ಇದಕ್ಕೆ ಸಮಾನವಾಗಿ ಕೊರೊನಾ ವೈರಸ್‌ಗೆ ಲಸಿಕೆ ಕಂಡು ಹಿಡಿಯುವ ಪ್ರಯತ್ನದಲ್ಲಿದೆ. ಕೆಲವು ಸಂಸ್ಥೆಗಳು ಈಗಗಾಲೇ ಮಾನವನ ಮೇಲೆ ಟೆಸ್ಟಿಂಗ್ ಆರಂಭಿಸಿದೆ ಎಂಬುದು ತಿಳಿದು ಬಂದಿದೆ.

ನ್ಯೂಯಾರ್ಕ್ ಮೂಲದ ಫಿಜರ್ ಹಾಗೂ ಬಯೋಟೆಕ್ ಕಳೆದ ತಿಂಗಳು ಜರ್ಮನಿಯಲ್ಲಿ BNT162 ಎನ್ನುವ ಚುಚ್ಚು ಮದ್ದನ್ನು ಪ್ರಾಯೋಗಿಕವಾಗಿ ಮಾನವನಿಗೆ ನೀಡಿತ್ತು. ಪ್ರಾಯೋಗಿಕ ಹಂತದಲ್ಲಿ 12 ಆರೋಗ್ಯವಂತ ವಯಸ್ಕರಿಗೆ ನೀಡಿದರೂ ಬಳಿಕ 200 ಮಂದಿಯ ವರೆಗೂ ವಿಸ್ತರಿಸಲಾಗಿತ್ತು

ಅಮೆರಿಕದಲ್ಲಿ ಮೊದಲ ಹಂತದಲ್ಲಿ 360 ಆರೋಗ್ಯವಂತ ವ್ಯಕ್ತಿಗಳಲ್ಲಿ ಲಸಿಕೆ ಪ್ರಯೋಗ ಮಾಡುವ ಗುರಿಯಿರಿಸಲಾಗಿದೆ. ಎರಡನೇ ಹಂತದಲ್ಲಿ 8000 ಮಂದಿಗೆ ವಿಸ್ತರಿಸಲಾಗುವುದು.