ಸ್ಪೇನ್‌ನಲ್ಲಿ 24 ಗಂಟೆಯೊಳಗೆ ಕೊರೊನಾಗೆ 950 ಸಾವು

ಮ್ಯಾಡ್ರಿಡ್‌: ಸ್ಪೇನ್‌ನಲ್ಲಿ ಕೊರೊನಾ ವೈರಸ್‌ಗೆ ಕಳೆದ 24 ಗಂಟೆಯಲ್ಲಿ 950 ಜನರು ಸಾವನ್ನಪ್ಪಿದ್ದಾರೆ. ಈ ಮೂಲಕ ದೇಶದಲ್ಲಿ ಸೋಂಕು ಆರಂಭವಾದ ನಂತರ ಇದೇ ಮೊದಲ ಬಾರಿಗೆ ಅತೀ ಹೆಚ್ಚಿನ ಜನರು ಕೋವಿಡ್‌ -19ಗೆ ಅಸುನೀಗಿದ್ದಾರೆ. ಇದೇ ರೀತಿ ಕಳೆದ ಶುಕ್ರವಾರ ಒಂದೇ ದಿನ ಇಟಲಿಯಲ್ಲಿ 969 ಜನರು ಅಸುನೀಗಿದ್ದರು.

ಸ್ಪೇನ್‌ನಲ್ಲಿ ಕೊರೊನಾ ವೈರಸ್‌ನಿಂದ ಸಾವಿಗೀಡಾದವರ ಸಂಖ್ಯೆ 10 ಸಾವಿರ ದಾಟಿದ್ದು, ದೇಶದಲ್ಲಿ ಒಟ್ಟು 10,003 ಜನರು ಸೋಂಕಿನಿಂದ ಅಸುನೀಗಿದ್ದಾರೆ. ಇದೇ ವೇಳೆ ದೇಶದಲ್ಲಿ ಕೊರೊನಾ ಪೀಡಿತರ ಸಂಖ್ಯೆ 1,10,238ಕ್ಕೆ ಏರಿಕೆಯಾಗಿದೆ. ಇನ್ನು ಜಗತ್ತಿನಾದ್ಯಂತ ಕೊರೊನಾ ಸೋಂಕಿಗೆ ಒಳಗಾದವರ ಸಂಖ್ಯೆ ದಶಲಕ್ಷ ಸಮೀಪಿಸಿದೆ. ಸದ್ಯ ಜಗತ್ತಿನಲ್ಲಿ 9,51,901 ಜನರಿಗೆ ಸೋಂಕು ತಗುಲಿದ್ದರೆ, ಸಾವಿನ ಸಂಖ್ಯೆ ಅರ್ಧ ಲಕ್ಷ ಸಮೀಪಿಸಿದೆ. ಒಟ್ಟು 48,284 ಜನರು ಕೊರೊನಾ ಸೋಂಕಿನಿಂದ ಇಲ್ಲಿಯವರೆಗೆ ಅಸುನೀಗಿದ್ದಾರೆ.

ಅಮೆರಿಕಾ, ಇಟಲಿ, ಸ್ಪೇನ್‌ ದೇಶಗಳು ಕೊರೊನಾದಿಂದ ದೊಡ್ಡ ಮಟ್ಟಕ್ಕೆ ತತ್ತರಿಸಿದ್ದರೆ, ಇದೇ ರೀತಿಯ ಮುನ್ಸೂಚನೆ ಫ್ರಾನ್ಸ್‌, ಬ್ರಿಟನ್‌ನಲ್ಲೂ ಕಾಣಿಸಿಕೊಂಡಿದೆ. ಅಮೆರಿಕಾದಲ್ಲಿ ಬುಧವಾರ ಒಂದೇ ದಿನ 884 ಜನರಿಗೆ ಕೊರೊನಾಗೆ ಬಲಿಯಾಗಿದ್ದು ದೇಶದಲ್ಲಿ ಸೋಂಕಿನಿಂದ ಸಾವಿಗೀಡಾದವರ ಸಂಖ್ಯೆ 5,137 ಕ್ಕೆ ಏರಿಕೆಯಾಗಿದೆ. ಅಮೆರಿಕಾವೊಂದರಲ್ಲೇ ಸೋಂಕಿತರ ಸಂಖ್ಯೆ ಬರೋಬ್ಬರಿ 2,16,722 ಇದೆ.

ಕೊರೊನಾದಿಂದ ಭಾರೀ ಹೊಡೆತ ತಿಂದಿರುವ ಇಟಲಿಯಲ್ಲಿ ಕೊರೊನಾದಿಂದ ಸಾವಿಗೀಡಾದವರ ಸಂಖ್ಯೆ 13,155ಕ್ಕೆ ಏರಿಕೆಯಾಗಿದ್ದರೆ, ಸೋಂಕು ಪೀಡಿತರ ಸಂಖ್ಯೆ 1,10,574ಕ್ಕೆ ಹೆಚ್ಚಳಗೊಂಡಿದೆ. ಜರ್ಮನಿಯಲ್ಲಿಯೂ ಬರೋಬ್ಬರಿ 78,115 ಕೊರೊನಾ ಸೋಂಕಿತರಿದ್ದಾರೆ. ಆದರೆ ವಿಶೇಷವೆಂದರೆ ಇಲ್ಲಿ ಕೇವಲ 944 ಜನರು ಕೊರೊನಾಗೆ ಬಲಿಯಾಗಿದ್ದಾರೆ. ಫ್ರಾನ್ಸ್‌ನಲ್ಲಿಯೂ ದಿನದಿಂದ ದಿನಕ್ಕೆ ಕೊರೊನಾದಿಂದ ಸಾವಿಗೀಡಾಗುವವರ ಸಂಖ್ಯೆ ಹೆಚ್ಚುತ್ತಿದ್ದು ಬುಧವಾರ ಒಂದೇ ದಿನ 509 ಜನರು ದೇಶದಲ್ಲಿ ಸೋಂಕಿನಿಂದ ಸಾವಿಗೀಡಾಗಿದ್ದಾರೆ. ದೇಶದಲ್ಲಿ ಕೋವಿಡ್‌-19ಗೆ ಬಲಿಯಾದವರ ಸಂಖ್ಯೆ 4,043ಕ್ಕೆ ಏರಿಕೆಯಾಗಿದೆ. ದೇಶದಲ್ಲಿ 57,780 ಕೊರೊನಾ ಸೋಂಕಿತರಿದ್ದಾರೆ.

ಬ್ರಿಟನ್‌ನಲ್ಲಿ ಬುಧವಾರ ಕೊರೊನಾಗೆ 499 ಜನರು ಬಲಿಯಾಗಿದ್ದು, ದೇಶದಲ್ಲಿ ಸೋಂಕಿನಿಂದ ಸಾವಿಗೀಡಾದವರ ಸಂಖ್ಯೆ 2,357ಕ್ಕೆ ಏರಿದೆ. 29,872 ಸೋಂಕಿತರು ದೇಶದಲ್ಲಿದ್ದಾರೆ. ಇಲ್ಲಿಯೂ ದಿನದಿಂದ ದಿನಕ್ಕೆ ಸೋಂಕಿತರ ಸಂಖ್ಯೆ ಏರುತ್ತಲೇ ಇದ್ದು, ಸ್ವತಃ ಪ್ರಧಾನಿ ಬೋರಿಸ್‌ ಜಾನ್ಸನ್‌ ಸೋಂಕಿಗೆ ಗುರಿಯಾಗಿದ್ದಾರೆ. ಆರಂಭದಲ್ಲಿ ಭಾರಿ ಸಂಖ್ಯೆಯ ಸಾವು ನೋವುಗಳನ್ನು ಕಂಡಿದ್ದ ಇರಾನ್‌ನಲ್ಲಿ ಕೋವಿಡ್‌-19 ಸ್ವಲ್ಪ ಮಟ್ಟಿಗೆ ನಿಧಾನವಾಗಿದ್ದು ಸದ್ಯ ದೇಶದಲ್ಲಿ 50,468 ಸೋಂಕಿತರಿದ್ದಾರೆ. ಇಲ್ಲಿ 3,160 ಜನರು ಸೋಂಕಿನಿಂದ ಅಸುನೀಗಿದ್ದಾರೆ.