ಇಸ್ಲಾಮಾಬಾದ್: ಹೇ ಮೋದಿ! ನಿನ್ನನ್ನು ನರಕಕ್ಕೆ ಕಳುಹಿಸಲು ಪಾಕಿಸ್ತಾನದಿಂದ ಬರಲಿವೆ ನಾಲ್ಕು ಹೆಬ್ಬಾವುಗಳು ಮತ್ತು ಒಂದು ಮೊಸಳೆಯ ಉಡುಗೊರೆ… ಅವು ನಿನ್ನನ್ನು ಕಬಳಿಸುತ್ತವೆ ನೋಡುತ್ತಿರು ಎಂದು ಪಾಕಿಸ್ತಾನದ ಪಾಪ್ ಗಾಯಕಿಯೊಬ್ಬರು ಬೆದರಿಕೆ ಹಾಕಿದ್ದಾಳೆ. ತನ್ನ ಸಾಮಾಜಿಕ ಜಾಲತಾಣಗಳ ಮೂಲಕ ಈ ಎಚ್ಚರಿಕೆಯ ಸಂದೇಶ ನೀಡಿರುವ ಆಕೆ ಸದ್ಯ ಪಾಕಿಸ್ತಾನದ ಜೈಲು ಸೇರಿದ್ದಾಳೆ!
ರಬಿ ಪೀರ್ಜಾದಾ ಬಂಧನಕ್ಕೆ ಒಳಗಾಗಿರುವ ಪಾಕಿಸ್ತಾನದ ಪಾಪ್ ಗಾಯಕಿ. ಜೀವಕ್ಕೆ ಅಪಾಯಕಾರಿಯಾದ ಜಂತುಗಳನ್ನು ಅಕ್ರಮವಾಗಿ ಸಾಕುಪ್ರಾಣಿಗಳನ್ನಾಗಿ ಇರಿಸಿಕೊಂಡಿದ್ದ ಹಿನ್ನೆಲೆಯಲ್ಲಿ ಪಾಕಿಸ್ತಾನದ ಪೊಲೀಸರು ಆಕೆಯನ್ನು ಬಂಧಿಸಿದ್ದಾರೆ ಎನ್ನಲಾಗಿದೆ.
ಈ ಅಪಾಯಕಾರಿ ಜಂತುಗಳೊಂದಿಗೆ ಸಾಮಾಜಿಕ ಜಾಲತಾಣದಲ್ಲಿ ಎಚ್ಚರಿಕೆಯ ಸಂದೇಶ ರವಾನಿಸಿದ್ದ ಆಕೆ, ನಾನಿ, ಒಬ್ಬ ಕಾಶ್ಮೀರಿ ಯುವತಿ, ಭಾರತವನ್ನು ಹಣಿಯಲು ಹಾವುಗಳೊಂದಿಗೆ ಸಜ್ಜಾಗಿದ್ದೇನೆ… ಈ ಉಡುಗೊರೆಗಳು ವಿಶೇಷವಾಗಿ ಮೋದಿಗಾಗಿ ಮೀಸಲು… ನೀನು ಕಾಶ್ಮೀರಿ ಜನರನ್ನು ಬಾಧಿಸುತ್ತಿರುವ ಹಿನ್ನೆಲೆಯಲ್ಲಿ ಈ ಉಡುಗೊರೆಗಳನ್ನು ನಿನಗಾಗಿ ಸಿದ್ಧಪಡಿಸಿದ್ದೇನೆ… ಆದ್ದರಿಂದ, ನರಕದಲ್ಲಿ ಸಾಯಲು ಸಿದ್ಧನಾಗು… ಆಯಿತಾ? ನನ್ನ ಈ ಸ್ನೇಹಿತರು ನಿನ್ನನ್ನು ಆ ನರಕದಲ್ಲಿ ತಿಂದು ತೇಗಲಿವೆ… ಎಂದು ಹೇಳಿದ್ದಳು.
ರಬಿ ಪೀರ್ಜಾದಾಳ ಈ ಎಚ್ಚರಿಕೆಯ ಸಂದೇಶವನ್ನು ಗಮನಿಸಿದ ಪಾಕಿಸ್ತಾನದ ಪಂಜಾಬ್ ವನ್ಯಜೀವಿಗಳ ರಕ್ಷಣೆ ಮತ್ತು ಉದ್ಯಾನಗಳ ಇಲಾಖೆಯ ಅಧಿಕಾರಿಗಳು ಆಕೆಯ ವಿರುದ್ಧ ಕಾನೂನು ಕ್ರಮ ಕೈಗೊಳ್ಳಲು ಮುಂದಾದರು. ಆಕೆಯ ಬ್ಯೂಟಿಪಾರ್ಲರ್ ಮೇಲೆ ದಾಳಿ ಮಾಡಿದ ಅವರು ಅಲ್ಲಿದ್ದ ಹೆಬ್ಬಾವು, ಮತ್ತಿತರ ವಿಷಕಾರಿ ಹಾವುಗಳು ಹಾಗೂ ಮೊಸಳೆಯನ್ನು ವಶಕ್ಕೆ ಪಡೆದು ಸುರಕ್ಷಿತವಾಗಿ ಅರಣ್ಯ ಪ್ರದೇಶದಲ್ಲಿ ಬಿಡುಗಡೆ ಮಾಡಿದರು. ಜತೆ ಆಕೆಯನ್ನು ಬಂಧಿಸಿ, ಕೋರ್ಟ್ಗೆ ಹಾಜರುಪಡಿಸಿದರು ಎನ್ನಲಾಗಿದೆ.
Comments are closed.