ನಾಖೋನ್ ರಾಟ್ಛಾಸಿಮಾ: ಮಣ್ಣಿನಲ್ಲಿ ಹೂತಿಡಲಾಗಿದ್ದ ಜೀವಂತ ನವಜಾತ ಶಿಶುವಿನ ಪ್ರಾಣವನ್ನು ಅಂಗವಿಕಲ ಶ್ವಾನ ರಕ್ಷಣೆ ಮಾಡಿದೆ. ಹೆತ್ತ ತಾಯಿಯೇ ಮಗುವಿನ ಪಾಲಿಗೆ ವಿಲನ್ ಆಗಿ ಮಣ್ಣಿನಡಿ ಹೂತಿಟ್ಟಿದ್ದು, ಆದರೆ ಶ್ವಾನ ಮಾತ್ರ ಗಂಡು ನವಜಾತ ಶಿಶುವಿನ ಪಾಲಿಗೆ ಹೀರೋ ಆಗಿರುವ ಘಟನೆ ಉತ್ತರ ಥೈಲ್ಯಾಂಡ್ನ ನಾಖೋನ್ ರಾಟ್ಛಾಸಿಮಾ ಎಂಬ ಗ್ರಾಮದಲ್ಲಿ ನಡೆದಿದೆ.
ಆ ಮಗುವಿನ ತಾಯಿಗೆ ಕೇವಲ 15 ವರ್ಷಗಳಾಗಿದ್ದು, ಆಕೆ ತಾನು ಗರ್ಭಿಣಿಯಾಗಿದ್ದೇನೆಂದು ಪೋಷಕರಿಂದ ಮುಚ್ಚಿಡಲು ಮಗುವನ್ನು ಮಣ್ಣಿನಲ್ಲಿ ಹೂತಿಟ್ಟಿದ್ದಳು ಎಂದು ತಿಳಿದುಬಂದಿದೆ. ಆದರೆ, ಪಿಂಗ್ ಪಾಂಗ್ ಎಂಬ ನಾಯಿ ಹೂತಿಟ್ಟಿದ್ದ ಮಗುವಿನ ವಾಸನೆ ಗ್ರಹಿಸಿ ಮಣ್ಣನ್ನು ಕೆರೆದು ಮುಚ್ಚಿದ್ದ ಗುಂಡಿಯನ್ನ ತೆಗೆಯಲು ಆರಂಭಿಸಿದೆ.
ಬಳಿಕ, ಪಿಂಗ್ ಪಾಂಗ್ನ ಮಾಲೀಕ ಸೂಕ್ಷ್ಮವಾಗಿ ಗಮನಿಸಿದಾಗ ಮಗುವಿನ ಕಾಲು ಕಾಣಿಸಿದ್ದು, ಈ ಹಿನ್ನೆಲೆ ಅವರು ಮಗುವನ್ನು ಹೊರ ತೆಗೆದಿದ್ದಾರೆ. ಜತೆಗೆ ಗ್ರಾಮಸ್ಥರೆಲ್ಲ ಸೇರಿಕೊಂಡು ಗಂಡು ನವಜಾತ ಶಿಶುವನ್ನು ಹತ್ತಿರದ ಆಸ್ಪತ್ರೆಗೆ ಸೇರಿಸಿದ್ದಾರೆ. ನಂತರ, ಮಗುವನ್ನು ಶುಚಿಗೊಳಿಸಿ ಆರೋಗ್ಯ ಪರೀಕ್ಷೆ ನಡೆಸಿದ್ದು, ಮಗು ಆರೋಗ್ಯವಾಗಿದೆ ಎಂದು ವೈದ್ಯರು ಮಾಹಿತಿ ನೀಡಿದ್ದಾರೆ.
ಅಪಘಾತವೊಂದರಲ್ಲಿ ಪಿಂಗ್ ಪಾಂಗ್ ಶ್ವಾನ ಕಾಲು ಕಳೆದುಕೊಂಡಿತ್ತು. ಅದು ಹುಟ್ಟಿದಾಗಿನಿಂದ ನಾನೇ ಸಾಕಿ ಬೆಳೆಸಿದ್ದೆ ಎಂದು ನಿಸೈಕಾ ಎಂಬ ಶ್ವಾನದ ಮಾಲೀಕರು ಮಾಧ್ಯಮಗಳಿಗೆ ತಿಳಿಸಿದ್ದಾರೆ.
Comments are closed.