ಅಮೆರಿಕ ಅಧ್ಯಕ್ಷರ ಕಠಿಣ ವಲಸೆ ನೀತಿಯಿಂದ ಅಪಾಯ: ಅಮೆರಿಕ ಸಿಇಒಗಳ ಆತಂಕ

ನ್ಯೂಯಾರ್ಕ್‌: ಅಮೆರಿಕ ಅಧ್ಯಕ್ಷ ಡೊನಾಲ್ಡ್‌ ಟ್ರಂಪ್‌ ಜಾರಿಗೆ ತಂದಿರುವ ಕಠಿಣ ವಲಸೆ ನೀತಿಯಿಂದ ಅಮೆರಿಕ ಆರ್ಥಿಕತೆ ಮೇಲೆ ಭಾರಿ ಪರಿಣಾಮ ಬೀರಲಿದೆ.

ಹೀಗೆಂದು ಹೇಳಿರುವುದು ಬೇರಾವುದೇ ದೇಶವಲ್ಲ. ಅಮೆರಿಕದಲ್ಲೇ ಇರುವ ಪ್ರತಿಷ್ಠಿತ ಕಂಪನಿಗಳ ಮುಖ್ಯ ಕಾರ್ಯ ನಿರ್ವಹಣಾಧಿಕಾರಿಗಳು.

ಆ್ಯಪಲ್‌ ಕಂಪನಿಯ ಮುಖ್ಯ ಕಾರ್ಯ ನಿರ್ವಹಣಾಧಿಕಾರಿ ಟಿಮ್‌ ಕುಕ್‌, ಜೆಪಿ ಮಾರ್ಗನ್‌ ಚೇಸ್‌ ಮತ್ತು ಕಂಪನೀಸ್‌ನ ಜ್ಯಾಮಿ ಡೈಮನ್‌, ಅಮೆರಿಕನ್ ಏರ್‌ಲೈನ್ಸ್‌ನ ಡಗ್‌ ಪಾರ್ಕರ್‌ ಸೇರಿದಂತೆ ಇತರ 59 ಕಂಪನಿಗಳ ಮುಖ್ಯ ಕಾರ್ಯ ನಿರ್ವಹಣಾಧಿಕಾರಿಗಳು ನೂತನ ಕಠಿಣ ವಲಸೆ ನೀತಿ ಬಗ್ಗೆ ಆತಂಕ ವ್ಯಕ್ತಪಡಿಸಿದ್ದಾರೆ.

ಮುಖ್ಯ ಕಾರ್ಯನಿರ್ವಹಣಾಧಿಕಾರಿಗಳು ಈ ಸಂಬಂಧ ಪತ್ರ ಬರೆದು ತಮ್ಮ ಆತಂಕವನ್ನು ವಿವರಿಸಿದ್ದಾರೆ.

ಎಚ್‌1ಬಿ ವೀಸಾಗೆ ಸಂಬಂಧಿಸಿದಂತೆ ಕೆಲವು ಕಠಿಣ ಕಾನೂನು ನಿಯಮಗಳನ್ನು ಜಾರಿಗೆ ತರುವುದರಿಂದ ಭಾರಿ ತೊಂದರೆಯಾಗಲದೆ ಎಂದು ಹಲವಾರು ಹಿರಿಯ ಅಧಿಕಾರಿಗಳು ತಿಳಿಸಿದ್ದಾರೆ.

ಕಂಪನಿಗಳಲ್ಲಿರುವ ನೌಕರರು ಈ ನೀತಿಯಿಂದ ಸಂದಿಗ್ಧ ಪರಿಸ್ಥಿತಿಗೆ ಸಿಲುಕಿದ್ದಾರೆ. ಇದರಿಂದ ಕೆಲಸದ ಮೇಲೆ ಭಾರಿ ಒತ್ತಡ ಬೀಳುತ್ತಿದೆ ಎಂದು ಮುಖ್ಯ ಕಾರ್ಯನಿರ್ವಹಣಾಧಿಕಾರಿಗಳು ಅಮೆರಿಕ ಸರಕಾರಕ್ಕೆ ಬರೆದಿರುವ ಪತ್ರದಲ್ಲಿ ವಿವರಿಸಲಾಗಿದೆ.

ಯಾವುದೇ ನೀತಿಯನ್ನು ಮಧ್ಯದಲ್ಲಿ ಬದಲಾವಣೆ ಮಾಡುವುದರಿಂದ ಭಾರಿ ಪರಿಣಾಮ ಬೀರಲಿದೆ. ಅಮೆರಿಕದ ಬ್ಯಾಂಕಿಂಗ್‌ ಕ್ಷೇತ್ರ, ವಾಣಿಜ್ಯ ಕ್ಷೇತ್ರ ಸೇರಿದಂತೆ ಹಲವಾರು ಕ್ಷೇತ್ರಗಳು ತಮ್ಮ ಕೆಲಸ ನಡೆಯಲು ಭಾರತೀಯ ಮಾಹಿತಿ ತಂತ್ರಜ್ಞರ ಮೇಲೆ ಅವಲಂಬಿತವಾಗಿವೆ. ಒಂದು ವೇಳೆ ಕಠಿಣ ಕಾನೂನು ಕ್ರಮ ಜಾರಿಗೆ ಬಂದರೆ ಪರಿಣಾಮ ಬರಲಿದೆ ಎಂದು ಪತ್ರದಲ್ಲಿ ವಿವರಿಸಲಾಗಿದೆ.