ಪಾಕಿಸ್ತಾನದ ಮಾಜಿ ಪ್ರಧಾನಿ ನವಾಜ್ ಷರೀಫ್ಗೆ 10 ವರ್ಷಗಳ ಜೈಲು ಶಿಕ್ಷೆ ವಿಧಿಸಿ ಪಾಕಿಸ್ತಾನ ಕೋರ್ಟ್ ಆದೇಶಿಸಿದೆ. ನವಾಜ್ ಷರೀಫ್ ಪುತ್ರಿ ಮರಿಯಮ್ಗೆ 7 ವರ್ಷಗಳ ಶಿಕ್ಷೆಯನ್ನೂ ಸಹ ಕೋರ್ಟ್ ವಿಧಿಸಿದೆ. ಈ ಮೂಲಕ ಪನಾಮ ಪೇಪರ್ನಲ್ಲಿ ಬೆಳಕಿಗೆ ಬಂದ ಭ್ರಷ್ಟಾಚಾರ ಪ್ರಕರಣಕ್ಕೆ ತಾರ್ಕಿಕ ಅಂತ್ಯ ಸಿಕ್ಕಿದ್ದು, ಮಾಜಿ ಪ್ರಧಾನಿ ಮತ್ತು ಪುತ್ರಿ ಅಪರಾಧಿಗಳೆಂದು ಕೋರ್ಟ್ ಅಧಿಕೃತ ಷರಾ ಬರೆದಿದೆ.
ಪಾಕಿಸ್ತಾನದ ಹೊಣೆಗಾರಿಕಾ ನ್ಯಾಯಾಲಯದ ನ್ಯಾಯಾಧೀಶ ಮೊಹಮ್ಮದ್ ಬಶೀರ್ ಈ ಮಹತ್ವದ ತೀರ್ಪನ್ನು ನೀಡಿದ್ದಾರೆ. ನವಾಜ್ ಷರೀಫ್ಗೆ 10 ವರ್ಷ, ಮರಿಯಮ್ಗೆ 7 ವರ್ಷ ಹಾಗೂ ಷರೀಫ್ ಅಳಿಯ ಸಫ್ದಾರ್ಗೆ 1 ವರ್ಷ ಶಿಕ್ಷೆಯನ್ನು ವಿಧಿಸಿರುವ ನ್ಯಾಯಾಲಯ 8 ಮಿಲಿಯನ್ ಪೌಂಡ್ಸ್ ದಂಡವನ್ನೂ ವಿಧಿಸಿದೆ.
ಭ್ರಷ್ಟಾಚಾರದ ಆರೋಪವನ್ನು ಒಪ್ಪದ ಷರೀಫ್ ಬುಧವಾರ ನ್ಯಾಯಾಲಯಕ್ಕೆ ಮನವಿ ಪತ್ರ ಸಲ್ಲಿಸಿದ್ದರು. ಪ್ರಕರಣದ ತೀರ್ಪನ್ನು ನಿಧಾನವಾಗಿ ನೀಡುವಂತೆ ಷರೀಫ್ ಮನವಿ ಮಾಡಿದ್ದರು. ಷರೀಫ್ ಸದ್ಯ ಲಂಡನ್ನಲ್ಲಿದ್ದು, ಪತ್ನಿಯ ಕ್ಯಾನ್ಸರ್ ಟ್ರೀಟ್ಮೆಂಟ್ ನಡೆಯುತ್ತಿರುವುದರಿಂದ ನ್ಯಾಯದಾನವನ್ನು ನಿಧಾನ ಮಾಡಬೇಕು ಎಂದು ಕೋರಿದ್ದರು.
ಪನಾಮ ಪೇಪರ್ನಲ್ಲಿ ನವಾಜ್ ಷರೀಫ್ ಮತ್ತು ಪುತ್ರಿ ಮರಿಯಮ್ ಹೆಸರಿನಲ್ಲಿ ಲಂಡನ್ನಲ್ಲಿ ವಿಲಾಸೀ ಬಂಗಲೆಗಳು ಮತ್ತು ಆಸ್ತಿಗಳಿರುವ ಬಗ್ಗೆ ಉಲ್ಲೇಖಿಸಲಾಗಿತ್ತ. ಜತೆಗೆ ಸಂಬಂಧಪಟ್ಟ ಅಧಿಕೃತ ದಾಖಲೆಗಳೂ ಪನಾಮ ಪೇಪರ್ನಲ್ಲಿ ಇದ್ದವು. ಯಾವಾಗ ಷರೀಫ್ ವಿರುದ್ಧ ಬಹುಕೋಟಿ ಭ್ರಷ್ಟಾಚಾರದ ಆರೋಪ ಕೇಳಿಬಂದ ಬೆನ್ನಲ್ಲೇ ನವಾಜ್ ಷರೀಫ್ ವಿರುದ್ಧ ಪಾಕಿಸ್ತಾನದ ಜನತೆ ದಂಗೆಯೆದ್ದಿದ್ದರು. ಇಡೀ ಪಾಕಿಸ್ತಾನದ ತುಂಬಾ ಷರೀಫ್ ವಿರುದ್ಧ ಆಕ್ರೋಶ ಕೇಳಿ ಬಂದಿತ್ತು.
ಜುಲೈ 2017ರಲ್ಲಿ ಪಾಕಿಸ್ತಾನದ ಸುಪ್ರೀಂ ಕೋರ್ಟ್ ನವಾಜ್ ಷರೀಫ್ರನ್ನು ಪ್ರಧಾನಿ ಹುದ್ದೆಯಿಂದ ವಜಾಗೊಳಿಸುವ ಮೂಲಕ ಐತಿಹಾಸಿಕ ನಿರ್ಣಯ ತೆಗೆದುಕೊಂಡಿತ್ತು. ಇದೇ ಜುಲೈ 25ರಂದು ಪಾಕಿಸ್ತಾನದ ಚುನಾವಣೆ ನಡೆಯಲಿದ್ದು, ಷರೀಫ್ ಪುತ್ರಿ ಮರಿಯಮ್ ನವಾಜ್ ಚುನಾವಣಾ ಅಭ್ಯರ್ಥಿಯಾಗಿದ್ದರು. ಆದರೆ ಅಪರಾಧಿ ಎಂದು ಸಾಭೀತಾಗಿರುವ ಹಿನ್ನೆಲೆಯಲ್ಲಿ ಮರಿಯಮ್ ಚುನಾವಣೆಯಲ್ಲಿ ಸ್ಪರ್ದಿಸುವ ಅವಕಾಶವನ್ನು ಕಳೆದುಕೊಂಡಿದ್ದಾರೆ.
ವಿಚಾರಣೆಯ ವೇಳೆ ಲಂಡನ್ನಲ್ಲಿ ಷರೀಫ್ ಖರೀದಿಸಿರುವ ಬಂಗಲೆಗಳ ಬಗ್ಗೆ ಕೋರ್ಟ್ ಪ್ರಶ್ನಿಸಿತ್ತು. ಆದರೆ ಬಂಗಲೆಗಳನ್ನು ಅಧಿಕೃತ ಆದಾಯದಿಂದಲೇ ಕೊಂಡಿರುವುದಾಗಿ ಷರೀಫ್ ವಾದಿಸಿದ್ದರು. ಆದರೆ ಅಧಿಕೃತ ಆದಾಯ ಮೂಲಗಳನ್ನು ಮತ್ತು ಅಧಿಕೃತ ಖರೀದಿ ಪತ್ರಗಳನ್ನು ನೀಡುವಲ್ಲಿ ಷರೀಫ್ ಕುಟುಂಬ ವಿಫಲವಾಗಿತ್ತು. ಹಲವು ದಿನಗಳ ವಾದ ಮತ್ತು ಪ್ರತಿ ವಾದಗಳನ್ನು ಆಲಿಸಿದ ಹೊಣೆಗಾರಿಕೆ ನ್ಯಾಯಾಲಯ ಷರೀಫ್ ರಾಜಕೀಯ ಭವಿಷ್ಯಕ್ಕೆ ಅಂತಿಮ ಚುಕ್ಕೆ ಇಟ್ಟಿದೆ. ಜತೆಗೆ ಷರೀಫ್ ಪುತ್ರಿಯ ರಾಜಕೀಯ ರಂಗ ಪ್ರವೇಶಕ್ಕೂ ತಡೆಗೋಡೆಯೊಡ್ಡಿದೆ.
Comments are closed.