ಬೀಜಿಂಗ್‌: ಚೀನೀ ಅಧ್ಯಕ್ಷರ ಅಧಿಕಾರಾವಧಿಯನ್ನು ಅನಿರ್ದಿಷ್ಟ ಕಾಲ ಮುಂದುವರಿಸುವ ಐತಿಹಾಸಿಕ ನಿರ್ಣಯವನ್ನು ಚೀನೀ ಸಂಸತ್ತು ಕೈಗೊಂಡಿದೆ. ಆರ್ಥಿಕ ಮತ್ತು ಮಿಲಿಟರಿ ಸೂಪರ್‌ ಪವರ್‌ ಆಗಿ ದೇಶವನ್ನು ಮುನ್ನಡೆಸಲು ಅಧ್ಯಕ್ಷ ಕ್ಸಿ ಜಿನ್‌ಪಿಂಗ್‌ ಅವರಿಗೆ ಸರ್ವಾಧಿಕಾರ ದೊರೆತಿದೆ.
ಕಮ್ಯೂನಿಸ್ಟ್‌ ಚೀನಾದ ಸಂಸ್ಥಾಪಕ ಮಾವೋ ಜೆಡಾಂಗ್‌ ಅವಧಿಯಲ್ಲಿ ಪ್ರಕ್ಷುಬ್ದತೆಯನ್ನು ಕೊನೆಗೊಳಿಸಿ ಸ್ಥಿರತೆ ಸಾಧಿಸಲು ಡೆಂಗ್ ಕ್ಸಿಯೋಪಿಂಗ್‌ ಅವರಿಗೆ ಇದೇ ರೀತಿ ಅನಿರ್ದಿಷ್ಟ ಅವಧಿಯ ಅಧಿಕಾರ ನೀಡಲಾಗಿತ್ತು. ಆ ಬಳಿಕ ಇದೀಗ ಜಿನ್‌ಪಿಂಗ್‌ ಅವರಿಗೆ ಅಂತಹದೇ ಸರ್ವಾಧಿಕಾರ ದೊರೆತಿದೆ.
ರಬ್ಬರ್‌ ಸ್ಟ್ಯಾಂಪ್‌ (ಹೆಸರಿಗಷ್ಟೇ ಇರುವ) ಸಂಸತ್ತು ಅಧ್ಯಕ್ಷರ ಅಧಿಕಾರಾವಧಿಯನ್ನು ಅನಿರ್ದಿಷ್ಟ ಕಾಲ ಮುಂದುವರಿಸಲು ಸಂವಿಧಾನ ತಿದ್ದುಪಡಿ ಮಾಡುವ ನಿರ್ಣಯಕ್ಕೆ 2,958 ಮತಗಳಿಂದ ಅನುಮೋದನೆ ನೀಡಿತು. ಎರಡು ಮತಗಳು ನಿರ್ಣಯದ ವಿರುದ್ಧ ಬಿದ್ದರೆ, ಮೂವರು ಸದಸ್ಯರು ಗೈರುಹಾಜರಾಗಿದ್ದರು. ಆದರೆ ಸಾಮಾಜಿಕ ಜಾಲತಾಣಗಳಲ್ಲಿ ಈ ಕುರಿತು ವ್ಯಾಪಕ ಟೀಕೆಗಳು ವ್ಯಕ್ತವಾಗಿವೆ. ಹಾಗಿದ್ದರೂ ಸರಕಾರ ಈ ಟೀಕೆಗಳನ್ನು ಸೆನ್ಸಾರ್‌ಗೆ ಒಳಪಡಿಸಿದೆ.
ಇದುವರೆಗೆ ಚೀನಾ ಸಂವಿಧಾನದ ಪ್ರಕಾರ ಒಬ್ಬ ಅಧ್ಯಕ್ಷರಿಗೆ ಐದು ವರ್ಷಗಳ ಎರಡು ಅವಧಿಯನ್ನು ನೀಡಬಹುದಾಗಿತ್ತು.
14 ವರ್ಷಗಳಲ್ಲಿ ನಡೆದ ಮೊದಲ ಸಂವಿಧಾನ ತಿದ್ದುಪಡಿ ಇದಾಗಿದ್ದು, ಸಂಸತ್ತು ಹೊಸ ಶಾಸನ ರಚಿಸಲಿದೆ. ಚೀನೀ ಸಂಸತ್ತು ತನ್ನ ಇತಿಹಾಸದಲ್ಲಿ ಈ ವರೆಗೆ ಕಮ್ಯೂನಿಸ್ಟ್‌ ಪಕ್ಷದ ಆದೇಶಗಳನ್ನು ತಿರಸ್ಕರಿಸಿದ್ದೇ ಇಲ್ಲ.
‘ಇದು ಜನಸಾಮಾನ್ಯರ ತುರ್ತು ಅಗತ್ಯವಾಗಿತ್ತು’ ಎಂದು ಈಶಾನ್ಯ ಹೀಲೋಂಗ್‌ಜಂಗ್‌ ಪ್ರಾಂತ್ಯದ ಪ್ರತಿನಿಧಿ ಜು ಕ್ಸಿಯುಕ್ವಿನ್ ಅವರು ಎಎಫ್‌ಪಿಗೆ ತಿಳಿಸಿದರು. ಇದೊಂದು ಸರ್ವಾನುಮತದ ನಿರ್ಣಯ ಎಂದು ಕಮ್ಯೂನಿಸ್ಟ್‌ ಪಕ್ಷ ಕೂಡ ಹೇಳಿಕೊಂಡಿದೆ.
2012ರಲ್ಲಿ ಅಧಿಕಾರಕ್ಕೇರಿದ ಕ್ಸಿ ಜಿನ್‌ಪಿಂಗ್‌ (64) ಪಕ್ಷದ ಪ್ರಧಾನ ಕಾರ್ಯದರ್ಶಿಯೂ ಆಗಿದ್ದಾರೆ. ಅವರ ಹಿಂದಿನ ಅಧ್ಯಕ್ಷರಿಬ್ಬರೂ ಡೆಂಗ್ ಹಾಕಿಕೊಟ್ಟ ಪರಂಪರೆಯಂತೆ ತಲಾ ಎರಡು ಅವಧಿಗಳ ಬಳಿಕ ಅಧ್ಯಕ್ಷ ಪದವಿ ಬಿಟ್ಟುಕೊಟ್ಟಿದ್ದರು.
ಇದೇ ಪರಂಪರೆಯಲ್ಲಿ ಜಿನ್‌ಪಿಂಗ್‌ ಕೂಡ ಮುಂದುವರಿದರೆ 2023ಕ್ಕೆ ಅಧಿಕಾರ ಬಿಟ್ಟುಕೊಡಬೇಕಾಗುತ್ತದೆ. ಆದರೆ ಸಂವಿಧಾನದ ತಿದ್ದುಪಡಿಯಂತೆ ಜಿನ್‌ಪಿಂಗ್‌ ಅವರಿಗೆ ಆಜೀವಪರ್ಯಂತ ಅಧ್ಯಕ್ಷ ಪದವಿಯಲ್ಲಿ ಉಳಿಯುವ ಅವಕಾಶವಿದೆ.
Comments are closed.