ಲಂಡನ್: ಕ್ಯಾನ್ಸರ್ ಮೂಲವನ್ನು ಪತ್ತೆ ಹಚ್ಚುವ ತಾಂತ್ರಿಕತೆಯಲ್ಲಿ ಮಹತ್ವದ ಸಂಶೋಧನೆಯೊಂದು ಹೊರಬಿದ್ದಿದ್ದು, ಡೆನ್ಮಾರ್ಕ್ನ ಸಂಶೋಧಕರು ಕ್ಯಾನ್ಸ್ರ್ನ ಮೂಲವನ್ನು 2 ದಿನಗಳಲ್ಲಿ ಪತ್ತೆ ಹಚ್ಚುವ ಸಾಫ್ಟ್ವೇರ್ ಅಭಿವೃದ್ಧಿ ಪಡಿಸಿರುವುದಾಗಿ ತಿಳಿಸಿದ್ದಾರೆ.
ಈ ಹೊಸ ತಂತ್ರಜ್ಞಾನದಿಂದ ವೈದ್ಯರು ಶೀಘ್ರವಾಗಿ ಕ್ಯಾನ್ಸರ್ನ ಮೂಲವನ್ನು ಪತ್ತೆ ಹಚ್ಚಲು ಸಾಧ್ಯವಾಗಲಿದೆ. ಪಿತ್ತಜನಕಾಂಗ, ಶ್ವಾಸಕೋಶ ಮತ್ತಿತರ ಕ್ಯಾನ್ಸರ್ಗಳ ಮೂಲವನ್ನು ತ್ವರಿತವಾಗಿ ಶೋಧಿಸಲು ಅನುಕೂಲವಾಗಲಿದೆ. ಪ್ರಸ್ತುತ ವೈದ್ಯರು ಕ್ಯಾನ್ಸರ್ ಇರುವುದನ್ನು ಪತ್ತೆ ಹಚ್ಚಲು ಸಾಧ್ಯವಾಗುತ್ತಿದೆ. ಆದರೆ ಹಲವು ರೋಗಿಗಳಲ್ಲಿ ತ್ವರಿತವಾಗಿ ಕ್ಯಾನ್ಸರ್ ಮೂಲ ಪತ್ತೆ ಹಚ್ಚಲು ಸಾಧ್ಯವಾಗುವುದಿಲ್ಲ. ಈ ರೋಗಿಗಳು ಹಲವು ಪರೀಕ್ಷೆಗಳನ್ನು ನಡೆಸಿ ಮೂಲವನ್ನು ನಿಖರವಾಗಿ ಪತ್ತೆ ಹಚ್ಚುವವರೆಗೂ ಕಾಯಬೇಕಾಗುತ್ತದೆ.
ಡೆನ್ಮಾರ್ಕ್ ತಾಂತ್ರಿಕ ವಿಶ್ವವಿದ್ಯಾಲಯವು ಹೊಸ ಕಂಪ್ಯೂಟರ್ ಸಾಫ್ಟ್ವೇರ್ ಅಭಿವೃದ್ಧಿ ಪಡಿಸಿದ್ದು, ಈ ತಂತ್ರಾಂಶವು 85% ನಿಖರವಾಗಿ ಕ್ಯಾನ್ಸರ್ನ ಮೂಲವನ್ನು ಪತ್ತೆ ಮಾಡಲಿದೆ. ಕ್ಯಾನ್ಸರ್ನ ಮೂಲ ಬೇಗ ಪತ್ತೆಯಾಗುವುದರಿಂದ ಚಿಕಿತ್ಸೆಯನ್ನು ಕೇಂದ್ರೀಕರಿಸಲು ನೆರವಾಗಲಿದೆ. ಇದರಿಂದ ರೋಗ ಬೇಗ ವಾಸಿಯಾಗಲು ಸಾಧ್ಯವಾಗಲಿದೆ. ಈ ತಂತ್ರಾಂಶವು ರೋಗಿಯ ಡಿಎನ್ಎ ಪರೀಕ್ಷಿಸಿ ರೋಗದ ಮೂಲವನ್ನು ಪತ್ತೆ ಮಾಡಲಿದೆ. ಈ ತಂತ್ರಾಂಶವನ್ನು ಸಾವಿರಾರು ಸ್ಯಾಂಪಲ್ಗಳಲ್ಲಿ ಪರೀಕ್ಷೆಗೆ ಒಳಪಡಿಸಿದ್ದು, ಎಲ್ಲಾ ಪರೀಕ್ಷೆಗಳಲ್ಲೂ ಬಹುತೇಕ ನಿಖರವಾಗಿ ಕ್ಯಾನ್ಸರ್ ಮೂಲವನ್ನು ಪತ್ತೆ ಹಚ್ಚಿದೆ ಎಂದು ಸಂಶೋಧಕರು ತಿಳಿಸಿದ್ದಾರೆ.
ಪ್ರಸ್ತುತ ಈ ತಂತ್ರಾಂಶವು ಕ್ಯಾನ್ಸರ್ ಮೂಲವನ್ನು ಪತ್ತೆ ಹಚ್ಚಲು 2 ದಿನಗಳ ಸಮಯ ತೆಗೆದುಕೊಳ್ಳುತ್ತಿದ್ದು, ತಂತ್ರಾಂಶವನ್ನು ಅಭಿವೃದ್ಧಿ ಪಡಿಸಲಾಗುತ್ತಿದೆ. ಮುಂದಿನ ದಿನಗಳಲ್ಲಿ ರೋಗ ಪತ್ತೆಗೆ ಇನ್ನೂ ಕಡಿಮೆ ಅವಧಿ ತೆಗೆದುಕೊಳ್ಳುವಂತೆ ಅಭಿವೃದ್ಧಿ ಪಡಿಸಲಾಗುವುದು ಎಂದು ಸಂಶೋಧಕರು ತಿಳಿಸಿದ್ದಾರೆ.
