ಟರ್ಕಿ: ಮಕ್ಕಳಿಗೆ ಗೊಂಬೆ ಎಂದರೆ ಏನೋ ಆಕರ್ಷಣೆ. ಗೊಂಬೆಯೊಂದಿಗೆ ಕತ್ತಿಯೊಂದನ್ನು ನೀಡಿದರೆ? ಅಷ್ಟೇ ಅಲ್ಲ ಆ ಕತ್ತಿಯಿಂದ ಗೊಂಬೆಯ ತಲೆ ಕಡಿ ಎಂದು ಆದೇಶಿಸಿದರೆ? ವಿಫಲವಾದರೆ ತಲೆ ಕಡಿಯೋದು ಹೇಗೆಂಬ ತರಬೇತಿಯನ್ನೂ ನೀಡಿದರೆ?
ಆಗ ಸಹಜವಾಗಿಯೇ ಮಕ್ಕಳ ಮುಗ್ಧ ಮನಸ್ಸು ವಿಕೃತವಾಗುತ್ತದೆ. ಇಂಥ ವಿಕೃತತೆಯನ್ನು ಎಳೆ ಮನಸ್ಸಲ್ಲಿ ತುಂಬಿದ್ದರಿಂದಲೇ 13 ವರ್ಷದ ಬಾಲಕನೊಬ್ಬ ಸಿರಿಯಾ ಸೇನಾ ಮುಖ್ಯಸ್ಥನ ತಲೆ ಕಡಿಯುವ ಮನಸ್ಸನ್ನು ಬೆಳೆಸಿಕೊಳ್ಳುತ್ತಾನೆ. ಹೀಗೆ ಮುಗ್ಧ ಮನಸ್ಸಿನ ಮಕ್ಕಳನ್ನು ಆತ್ಮಾಹುತಿ ದಾಳಿಗೂ ಇಸ್ಲಾಮಿಕ್ ಸ್ಟೇಟ್ (ಐಎಸ್) ಗ್ರೂಪ್ ಹೇಗೆ ಬಳಸಿಕೊಳ್ಳುತ್ತದೆ ಎಂಬ ಸತ್ಯವೀಗ ಬೆಳಕಿಗೆ ಬಂದಿದೆ.
ಐಎಸ್ ಸಂಘಟನೆ ತಮ್ಮ ಉದ್ದೇಶ ಈಡೇರಿಸಿಕೊಳ್ಳಲು ಮಕ್ಕಳನ್ನು ಹೇಗೆ ಬಳಸಿಕೊಳ್ಳುತ್ತಿದೆ ಎಂಬ ವಿಷಯವನ್ನು ತರಬೇತಿ ಕೇಂದ್ರದಿಂದ ಇತ್ತೀಚೆಗೆ ತಪ್ಪಿಸಿಕೊಂಡು ಬಂದ 14 ವರ್ಷದ ಬಾಲಕ ಯಾಹ್ಯಾ ಸಂದರ್ಶನವೊಂದರಲ್ಲಿ ತೆರೆದಿಟ್ಟಿದ್ದಾನೆ.
ಇರಾಕ್‌ನ ಎಝ್ಡಿ ಪಟ್ಟಣ ಮತ್ತು ಹಳ್ಳಿಗಳಲ್ಲಿ ಕಳೆದ ವರ್ಷ ವೃದ್ಧರು, ಮಹಿಳೆಯರು ಹಾಗೂ ಬಾಲಕಿಯರನ್ನು ಐಸಿಸ್ ಸಂಘಟನೆ ನಿಷ್ಕರುಣೆಯಿಂದ ನಡೆಸಿಕೊಂಡಿತ್ತು. ಬಂಧಿಸಿದ ಅನೇಕ ಮಹಿಳೆಯರು ಹಾಗೂ ಬಾಲಕಿಯರನ್ನು ಸಂಘಟನೆಯ ಹಿತೈಷಿಗಳಿಗೆ ಲೈಂಗಿಕ ಗುಲಾಮರನ್ನಾಗಿ ನೀಡಲಾಗಿತ್ತು. ಆದರೆ, ಯಾಹ್ಯಾರಂಥ ಎಳೆ ಮನಸ್ಸಿನ ಬಾಲಕರಿಗೆ ಮರು ಶಿಕ್ಷಣ ನೀಡಿದ ಐಎಸ್ ತಂಡ, ಅವರನ್ನು ಇಸ್ಲಾಂಗೆ ಮತಾಂತರಗೊಳ್ಳಲು ಒತ್ತಾಯಿಸುತ್ತಿತ್ತು. ಅಲ್ಲದೇ ಅವರ ಹಳೆಯ ನಂಬಿಕೆಗಳು ಹಾಗೂ ಪದ್ಧತಿಗಳನ್ನು ತ್ಯಜಿಸಿ, ಜಿಹಾದಿ ಉಗ್ರ ಹೋರಾಟಗಾರರನ್ನಾಗಿಸಲು ಯತ್ನಿಸುತ್ತಿತ್ತು.
ಮುಂದಿನದೊಂದು ಜನಾಂಗವನ್ನು ಭಯೋತ್ಪಾದಕರನ್ನಾಗಿ ಪರಿವರ್ತಿಸಲು ಈ ಉಗ್ರ ಸಂಘಟನೆ ಶತಾಯ ಗತಾಯ ಯತ್ನಿಸುತ್ತಿದೆ ಎಂದು ಸಿರಿಯಾ ಮತ್ತು ಇರಾಕ್‌ನಿಂದ ಓಡಿ ಹೋದ ಅಥವಾ ಸಂಘಟನೆ ಅಡಿಯಲ್ಲಿ ಬದುಕುತ್ತಿರುವ ಅನೇಕರು ಸಂದರ್ಶನದಲ್ಲಿ ಹೇಳಿಕೊಂಡಿದ್ದಾರೆ. ಯುವಕರು ಹಾಗೂ ಮಕ್ಕಳನ್ನು ದುಡ್ಡು, ಉಡುಗೊರೆ ನೀಡಿ ಅಥವಾ ಬೆದರಿಕೆ ಒಡ್ಡಿ ಇಲ್ಲವೇ ಬ್ರೈನ್‌ವಾಷ್ ಮಾಡಿ ಈ ಸಂಘಟನೆಗೆ ನೇಮಿಸಿಕೊಳ್ಳಲಾಗುತ್ತದೆ. ಮಕ್ಕಳು ಉಗ್ರವಾದವನ್ನು ಕಲಿತುಕೊಳ್ಳುತ್ತಾರೆ. ಯುವಕರನ್ನು ಕೊಲೆಗಾರರನ್ನಾಗಿ ಪರಿವರ್ತಿಸಲಾಗುತ್ತದೆ. ಹಾಗಾಗಿಯೇ ಆಟವಾಡಿಕೊಂಡಿರಬೇಕಾದ 13-14 ವರ್ಷದ ಮಕ್ಕಳೂ ಇನ್ನೊಬ್ಬರ ತಲೆ ಕಡಿಯುವಂಥ ಮನಸ್ಥಿತಿ ಬೆಳೆಯಿಸಿಕೊಳ್ಳುತ್ತಿದ್ದಾರೆ ಎಂಬ ಸತ್ಯ ಬಹಿರಂಗಗೊಂಡಿದೆ.
