ಮೇರಿಲ್ಯಾಂಡ್: ವಿಶ್ವದ ಬಾಹ್ಯಾಕಾಶ ಕ್ಷೇತ್ರದಲ್ಲಿ ಇಂದು ಹೊಸ ಇತಿಹಾಸ ಸೃಷ್ಟಿಯಾಗಲಿದೆ. ಸೂರ್ಯಮಂಡಲದ ಹೊರ ಅಂಚಿನಲ್ಲಿರುವ ಕುಬ್ಜ ಗ್ರಹಗಳ ಅಧ್ಯಯನಕ್ಕಾಗಿ ಒಂಬತ್ತೂವರೆ ವರ್ಷಗಳ ಹಿಂದೆ ಉಡಾವಣೆ ಮಾಡಿದ ‘ನ್ಯೂ ಹೊರೈಜಾನ್ಸ್’ ಗಗನನೌಕೆ ಇಂದು ಪ್ಲೂಟೋವನ್ನು ಅತ್ಯಂತ ಸಮೀಪ ಬಿಂದುವಿನಲ್ಲಿ ಹಾದುಹೋಗಲಿದ್ದು, ಈ ವೇಳೆ ಅತಿ ಸನಿಹದಿಂದ ಕುಬ್ಜಗ್ರಹದ ಅಧ್ಯಯನಕ್ಕೆ ನೆರವಾಗಲಿದೆ. ಪ್ಲೂಟೋ ಹಾಗೂ ಅದರ ಉಪಗ್ರಹಗಳ ಭೌಗೋಳಿಕ ರಚನೆ, ವಾತಾವರಣ, ಅಲ್ಲಿನ ಕಪ್ಪು ಪಟ್ಟಿಗಳು ಸೇರಿದಂತೆ ಇದುವರೆಗೂ ವಿಜ್ಞಾನಿಗಳಿಗೆ ಯಕ್ಷಪ್ರಶ್ನೆಯಾಗಿ ಕಾಡುತ್ತಿರುವ ಹಲವು ವಿಷಯಗಳ ಬಗ್ಗೆ ನಿಖರ ಮಾಹಿತಿಯನ್ನು ಭೂಮಿಗೆ ರವಾನಿಸಲಿದೆ.
2006ರ ಜನವರಿ 19ರಂದು ಅಮೆರಿಕದ ಫ್ಲೋರಿಡಾದ ಬಾಹ್ಯಾಕಾಶ ಕೇಂದ್ರಿಂದ ಉಡಾವಣೆಗೊಂಡ ‘ನ್ಯೂ ಹೊರೈಜಾನ್ಸ್’ ಗಗನನೌಕೆ ಬರೋಬ್ಬರಿ 4.76 ಶತಕೋಟಿ ಕಿಲೋಮೀಟರ್ ಕ್ರಮಿಸಿದ್ದು, ಮಂಗಳವಾರ ಪ್ಲೂಟೋ ಕುಬ್ಜಗ್ರಹವನ್ನು ಸುಮಾರು 8000 ಕಿಲೋಮೀಟರ್‌ಗಳ ಅತ್ಯಂತ ಸನಿಹ ಬಿಂದುವಿನಿಂದ ಹಾದುಹೋಗಲಿದೆ. ನಿಮಿಷಕ್ಕೆ 31,000 ಮೈಲಿ ವೇಗದಲ್ಲಿ ಚಲಿಸುತ್ತಿರುವ ನೌಕೆ, ಅದೇ ವೇಗದಲ್ಲೇ ಆಕಾಶಕಾಯವನ್ನು ಹಾದುಹೋಗಲಿದ್ದು ಕೇವಲ 8 ನಿಮಿಷಗಳಷ್ಟೇ ಈ ಸಮೀಪ ಬಿಂದುವಿನಲ್ಲಿ ಇರಲಿದೆ. ಆದರೆ ಇದಕ್ಕೂ ಕೆಲ ನಿಮಿಷಗಳ ಮುಂಚಿನಿಂದಲೇ ನೌಕೆಯಲ್ಲಿರುವ ಅತ್ಯಾಧುನಿಕ ಕ್ಯಾಮೆರಾಗಳು ಸೇರಿದಂತೆ 7 ಉಪಕರಣಗಳು ಕಾರ್ಯಾರಂಭ ಮಾಡಲಿವೆ. ಪ್ಲೂಟೋಗೆ ಸಂಬಂಧಿಸಿದ ಚಿತ್ರ ಹಾಗೂ ಮಾಹಿತಿಯನ್ನು ಭೂಮಿಗೆ ರವಾನಿಸಲಿವೆ.
ಸ್ಪಷ್ಟ ಚಿತ್ರಣ: ಅತಿ ದೂರದ ಹಿನ್ನೆಲೆಯಲ್ಲಿ 1930ರಲ್ಲೇ ಪ್ಲೂಟೋ ಪತ್ತೆಯಾದಿಂದಿನಿಂದಲೂ ಇದುವರೆಗೂ ಈ ಕುಬ್ಜಗ್ರಹದ ಸ್ಪಷ್ಟ ಅಧ್ಯಯನ ಸಾಧ್ಯವಾಗಿರಲಿಲ್ಲ. ಇದರ ಸ್ಪಷ್ಟ ಚಿತ್ರವೂ ಸಿಕ್ಕಿರಲಿಲ್ಲ. ಆದರೆ ‘ನ್ಯೂ ಹೊರೈಜಾನ್ಸ್’ ಕಳುಹಿಸಲಿರುವ ಪ್ಲೂಟೋ ಚಿತ್ರಗಳು ಹಾಗೂ ಮಾಹಿತಿ ಕುಬ್ಜ ಗ್ರಹದ ಬಗ್ಗೆ ಸ್ಪಷ್ಟ ಚಿತ್ರಣ ಪಡೆಯಲು ನೆರವಾಗಲಿದೆ. ಪ್ಲೂಟೋ ಬಳಿಕ 2020ರವರೆಗೂ ‘ನ್ಯೂ ಹೊರೈಜಾನ್ಸ್’ ನೌಕೆ ತನ್ನ ಪ್ರಯಾಣ ಮುಂದುವರೆಸಲಿದೆ. ಸೌರಮಂಡಲದ ಹುಟ್ಟಿನ ವೇಳೆ ರಚನೆಯಾದ, ಇದುವರೆಗೂ ಯಾವುದರ ಪ್ರಭಾವಕ್ಕೂ ಒಳಗಾಗದೆ ಯಥಾಸ್ಥಿತಿಯಲ್ಲಿ ಮುಂದುವರೆದಿರುವ ಹಲವು ಆಕಾಶಕಾಯಗಳನ್ನು ಈ ಗಗನನೌಕೆ ಸನಿಹದಿಂದ ಅಧ್ಯಯನ ನಡೆಸಲಿದೆ.
ಮೊದಲ ಕುಬ್ಜಗ್ರಹ ಯಾನ 2005ರಲ್ಲಿ ಕುಬ್ಜಗ್ರಹವೆಂದು ಪರಿಗಣಿಸಲಾದ ಪ್ಲೂಟೋ ಸೂರ್ಯ ಮಂಡಲದ ಹೊರ ಅಂಚಿನಲ್ಲಿದ್ದು, ಭೂಮಿಯಿಂದ 4.67 ಶತಕೋಟಿ ಮೈಲುಗಳ ದೂರದಲ್ಲಿದೆ. ನಾಸಾ ಕುಬ್ಜಗ್ರಹವೊಂದಕ್ಕೆ ಕೈಗೊಂಡ ಮೊದಲ ಗಗನಯಾನ ಯೋಜನೆ ಇದಾಗಿದೆ. ಸೂರ್ಯನಿಂದ ಇಷ್ಟು ದೂರದಲ್ಲಿರುವ ಆಕಾಶಕಾಯವೊಂದಕ್ಕೆ ಕೈಗೊಂಡ ವಿಶ್ವದ ಮೊದಲ ಅತಿ ದೂರದ ಗಗನಯಾನವೂ ಇದಾಗಿದೆ.
