ಲಾಕ್​ಡೌನ್​ನಲ್ಲಿ ಮಾವನ ಮನೆಯಲ್ಲಿದ್ದ ಅಳಿಯನಿಗೆ ನಾದಿನಿ ಮೇಲೆ ಪ್ರೀತಿ; ಸಹೋದರಿಯೊಂದಿಗೆ ಪತಿ ಪರಾರಿ

ಭೋಪಾಲ್​: ಲಾಕ್​ಡೌನ್​ನಲ್ಲಿ ಮಾವನ ಮನೆಯಲ್ಲಿದ್ದ ಅಳಿಯನಿಗೆ ನಾದಿನಿ ಮೇಲೆ ಪ್ರೀತಿ ಹುಟ್ಟಿ, ಆಕೆಯೊಂದಿಗೆ ಪರಾರಿಯಾಗಿರುವ ಘಟನೆ ಮಧ್ಯಪ್ರದೇಶದ ಭೋಪಾಲ್​ನ ಪಮರಿಯಾ ಗ್ರಾಮದಲ್ಲಿ ನಡೆದಿದೆ.

ರಿಂಕಿ ಹೆಸರಿನ ಮಹಿಳೆ ಬ್ರಿಜೇಶ್​ ಹೆಸರಿನ ವ್ಯಕ್ತಿಗೆ ಐದು ವರ್ಷದ ಹಿಂದೆಯೇ ಮದುವೆಯಾಗಿದ್ದಳು. ಅವರಿಗೆ ಇಬ್ಬರು ಮಕ್ಕಳಿವೆ. ಬ್ರಿಜೇಶ್​ ಲಾಕ್​ಡೌನ್​ ಸಮಯದಲ್ಲಿ ಕೆಲಸ ಕಳೆದುಕೊಂಡಿದ್ದಾನೆ. ಕೆಲಸ ಕಳೆದುಕೊಂಡು ಮಾನಸಿಕ ನೋವಿನಲ್ಲಿದ್ದ ಆತನನ್ನು ರಿಂಕಿ ತನ್ನ ತವರು ಮನೆಗೆ ಕರೆದುಕೊಂಡು ಹೋಗಿದ್ದಾಳೆ. ತವರು ಮನೆಯಲ್ಲಿ ಎರಡು ತಿಂಗಳ ಕಾಲ ಅವರು ಸಂಸಾರ ನಡೆಸಿದ್ದಾರೆ. ಈ ಸಮಯದಲ್ಲಿ ಬ್ರಿಜೇಶ್​ಗೆ ರಿಂಕಿಯ ತಂಗಿ ಸಲಿ(17) ಜತೆ ಪ್ರೀತಿ ಹುಟ್ಟಿದೆ. ತಂಗಿ ಜತೆ ಗಂಡ ಹೆಚ್ಚು ಸ್ನೇಹದಿಂದ ಇರುವುದನ್ನು ಕಂಡು ರಿಂಕಿ ಪ್ರಶ್ನಿಸಿದ್ದಕ್ಕೆ, ಸಲಿ ನನ್ನ ತಂಗಿಯಿದ್ದಂತೆ ಎಂದು ಸಮಜಾಯಿಷಿ ಕೊಟ್ಟಿದ್ದಾನೆ.

ಈ ರೀತಿ ನಾದಿನಿ ಜತೆ ಪ್ರೀತಿ ಬೆಳೆಸಿಕೊಂಡ ಬ್ರಿಜೇಶ್​ ಕಳೆದ ಶನಿವಾರ ಸಲಿ ಜತೆ ಬೈಕ್​ನಲ್ಲಿ ಪರಾರಿಯಾಗಿದ್ದಾನೆ. ಕುಟುಂಬಸ್ಥರು ಕಾಣೆಯಾಗಿರುವ ದೂರನ್ನು ದಾಖಲಿಸಿದ್ದಾರೆ. ಇಬ್ಬರನ್ನು ಹುಡುಕಿದ ಪೊಲೀಸರು ಮೂರು ದಿನಗಳ ಹಿಂದೆ ಬ್ರಿಜೇಶ್​​ನನ್ನು ರಿಂಕಿ ಜತೆ ಅವರ ಮನೆಗೆ ಕಳುಹಿಸಿದ್ದು, ಸಲಿಯನ್ನು ಆಕೆಯ ಮನೆಗೆ ಕಳುಹಿಸಿ ಕೊಟ್ಟಿದ್ದಾರೆ. ಆದರೆ ಪ್ರೀತಿಯಿಂದ ದೂರಾದ ನೋವಿನಿಂದ ಸಲಿ ಶುಕ್ರವಾರ ವಿಷ ಸೇವಿಸಿದ್ದಾಳೆ. ತಕ್ಷಣ ಕುಟುಂಬಸ್ಥರ ಗಮನಕ್ಕೆ ಬಂದಿದ್ದು ಆಕೆಯನ್ನು ಆಸ್ಪತ್ರೆಗೆ ದಾಖಲಿಸಿ, ಚಿಕಿತ್ಸೆ ಕೊಡಿಸಲಾಗುತ್ತಿದೆ.