ದೇಶದಲ್ಲಿ ಮೇ ತಿಂಗಳಲ್ಲೇ 64 ಲಕ್ಷ ಮಂದಿಗೆ ಕೊರೋನಾ ಸೋಂಕು: ಸೆರೋ ಸಮೀಕ್ಷೆ

ನವದೆಹಲಿ: 4 ತಿಂಗಳ ಹಿಂದೆಯೇ ಭಾರತದಲ್ಲಿ 64 ಲಕ್ಷ ಮಂದಿಗೆ ಕೊರೋನಾ ಸೋಂಕು ತಗುಲಿತ್ತು ಎಂದು ಐಸಿಎಂಆರ್ ನಡೆಸಿದ ಸೆರೋ ಸಮೀಕ್ಷೆ ತಿಳಿಸಿದೆ.

ಈ ಸಮೀಕ್ಷೆ ಪ್ರಕಾರ ನಾಲ್ಕು ತಿಂಗಳ ಹಿಂದೆಯೇ ಭಾರತದಲ್ಲಿ 64 ಲಕ್ಷ ಮಂದಿಗೆ ಸೋಂಕು ತಗುಲಿದ್ದಿರಬಹುದು. ಮೇ 11ರಿಂದ ಜೂನ್ 4ರವರೆಗೆ ನಡೆಸಿದ ಸೆರೋ ಸಮೀಕ್ಷೆಯಲ್ಲಿ ಈ ಅಂಶ ಬೆಳಕಿಗೆ ಬಂದಿದೆ. ಕೊರೋನಾ ಪತ್ತೆಗಾಗಿ ನಡೆಸಲಾಗುತ್ತಿದ್ದ ಆರ್​ಟಿ-ಪಿಸಿಆರ್ ಪರೀಕ್ಷೆಯಲ್ಲಿ ಒಂದು ಪ್ರಕರಣ ದೃಢಪಟ್ಟರೆ 82-130 ಮಂದಿಯ ಸೋಂಕು ಗುಪ್ತವಾಗಿಯೇ ಉಳಿದುಹೋಗಿತ್ತು ಎನ್ನಲಾಗುತ್ತಿದೆ.

ಫೆಬ್ರವರಿ ತಿಂಗಳಲ್ಲಿ ಭಾರತದಲ್ಲಿ ಮೊದಲ ಕೊರೋನಾ ಪ್ರಕರಣ ಪತ್ತೆಯಾಗಿದ್ದು. ಅದಾಗಿ 2-3 ತಿಂಗಳಲ್ಲೇ ದೇಶಾದ್ಯಂತ ಬರೋಬ್ಬರಿ 64 ಲಕ್ಷ ಮಂದಿಗೆ ಕೊರೋನಾ ಸೋಂಕು ತಗುಲಿದಂತಾಗಿದೆ. ಮಾರ್ಚ್ ತಿಂಗಳಿಂದ ಕಟ್ಟುನಿಟ್ಟಾಗಿ ಲಾಕ್ ಡೌನ್ ಹಾಕಿದ್ದರೂ ಪ್ರಕರಣಗಳು ಏರುಗತಿಯಲ್ಲಿ ಸಾಗಿರುವುದು ಸ್ಪಷ್ಟವಾಗಿದೆ. ಆದರೂ ಕೂಡ ಈ ಹಂತದಲ್ಲಿ ದೇಶದ ಜನಸಂಖ್ಯೆ ಒಂದು ಪ್ರತಿಶತದಷ್ಟು ಮಂದಿಗೂ ಸೋಂಕು ವ್ಯಾಪಿಸಿರಲಿಲ್ಲ.

ಏನಿದು ಸೆರೋ ಸರ್ವೇ?
ಇದು ಒಂದು ಮಾದರಿಯ ರಕ್ತದ ಪರೀಕ್ಷೆ. ರಕ್ಷದಲ್ಲಿ ಪ್ರತಿಕಾಯಗಳು (Antibodies) ಸೃಷ್ಟಿಯಾಗಿದೆಯಾ ಎಂಬುದನ್ನು ಪತ್ತೆ ಮಾಡಲು IgG(ಇಮ್ಯೂನೋಗ್ಲೋಬುಲಿನ್ ಜಿ) ಪರೀಕ್ಷೆಗೆ ರಕ್ತದ ಸೆರಮ್​ನ ಸಮೀಕ್ಷೆ ಇದಾಗಿದೆ. ದೇಹದಲ್ಲಿ ಪ್ರತಿಕಾಯಗಳನ್ನ ಹೊಂದಿದ್ದರೆ ಆ ವ್ಯಕ್ತಿಗೆ 2 ವಾರಕ್ಕಿಂತ ಮುಂಚೆಯೇ ಸೋಂಕು ಬಂದು ಹೋಗಿದೆ ಎಂದರ್ಥ. ಜೂನ್ 4ರವರೆಗೆ ಸಮೀಕ್ಷೆ ನಡೆಸಲಾಗಿದೆ ಎಂದರೆ ಮೇ 20ಕ್ಕಿಂತ ಮುಂಚಿನ ಸ್ಥಿತಿಯನ್ನು ಇದು ವ್ಯಕ್ತಪಡಿಸುತ್ತದೆ.