ಕುವೈತ್​ನಲ್ಲಿ ವಿದೇಶೀ ಉದ್ಯೋಗಿಗಳ ಸಂಖ್ಯೆ ಕಡಿತಕ್ಕೆ ನಿರ್ಧಾರ; ಕೆಲಸ ಕಳೆದುಕೊಳ್ಳುವ ಭೀತಿಯಲ್ಲಿ 7 ಲಕ್ಷ ಭಾರತೀಯರು!

ನವದೆಹಲಿ (ಜು. 6): ಒಳ್ಳೆಯ ಉದ್ಯೋಗದ ಕನಸಿನೊಂದಿಗೆ ಸೌದಿ ರಾಷ್ಟ್ರಗಳಿಗೆ ವಲಸೆ ಹೋಗಿರುವ ಭಾರತೀಯರಿಗೆ ಇದೀಗ ಅಭದ್ರತೆ ಶುರುವಾಗಿದೆ. ಕುವೈತ್ ಸರ್ಕಾರ ತನ್ನ ದೇಶದಲ್ಲಿರುವ ವಿದೇಶೀ ಉದ್ಯೋಗಿಗಳ ಸಂಖ್ಯೆಯನ್ನು ಕಡಿತಗೊಳಿಸಲು ನಿರ್ಧರಿಸಿದೆ. ಈ ಹಿನ್ನೆಲೆಯಲ್ಲಿ ನೂತನ ಕಾನೂನು ಜಾರಿಗೊಳಿಸಲು ಮುಂದಾಗಿದೆ. ಈ ಕಾನೂನು ಜಾರಿಯಾದರೆ ಕುವೈತ್​ನಲ್ಲಿರುವ ಭಾರತದ 7 ಲಕ್ಷ ಉದ್ಯೋಗಿಗಳು ದೇಶ ಬಿಡಬೇಕಾಗುತ್ತದೆ.

ವಿದೇಶಗಳಿಂದ ಉದ್ಯೋಗಕ್ಕಾಗಿ ವಲಸೆ ಬಂದವರಿಗೆ ಸಂಬಂಧಪಟ್ಟ ಕಾನೂನು ಜಾರಿಗೊಳಿಸಲು ಕುವೈತ್ ಸರ್ಕಾರ‌ ನಿರ್ಧರಿಸಿದೆ. ಇದಕ್ಕಾಗಿ ಈಗಾಗಲೇ ಒಂದು ಸಮಿತಿಯನ್ನು ರಚಿಸಲಾಗಿದ್ದು, ಆ ಸಮಿತಿ ತನ್ನ ಶಿಫಾರಸುಗಳನ್ನು ಕೂಡ ಸರ್ಕಾರದ ಮುಂದಿಟ್ಟಿದೆ. ಈ ಹೊಸ ಕಾನೂನಿನ ಪ್ರಕಾರ ಭಾರತೀಯರ ಸಂಖ್ಯೆ ದೇಶದ ಜನಸಂಖ್ಯೆಗಿಂತ ಶೇ. 15 ಮೀರಬಾರದು. ಈಗ ಕುವೈತ್‌ನಲ್ಲಿ ಭಾರತೀಯ ವಲಸಿಗರೇ ಹೆಚ್ಚಾಗಿದ್ದಾರೆ. ಹೀಗಾಗಿ, ಹೊಸ ಕಾನೂನಿನಿಂದ ಬೇರೆ ದೇಶದವರಿಗಿಂತ ಭಾರತೀಯರ ಮೇಲೇ ಹೊಡೆತ ಜಾಸ್ತಿ.

ಹೊಸ ಕಾನೂನಿನ ಪ್ರಕಾರ ಕುವೈತ್​ನಲ್ಲಿರುವ 7ರಿಂದ 8 ಲಕ್ಷ ಭಾರತೀಯರು ದೇಶ ಬಿಟ್ಟು ಭಾರತಕ್ಕೆ ವಾಪಾಸಾಗುವ ಸಾಧ್ಯತೆಯಿದೆ. ತಮ್ಮ ದೇಶದಲ್ಲಿ ಕುವೈತ್​ನವರಿಗೇ ಉದ್ಯೋಗ ಸಿಗದ ಪರಿಸ್ಥಿತಿ ಎದುರಾಗಿದೆ. ಕುವೈತ್​ನ ಹೊಸ ಕಾನೂನಿನ ಕುರಿತು ಭಾರತ ಇನ್ನೂ ಯಾವುದೇ ಹೇಳಿಕೆಯನ್ನೂ ನೀಡಿಲ್ಲ. ಕುವೈತ್​ನಲ್ಲಿರುವ ವಲಸಿಗರ ಪೈಕಿ ಭಾರತ ಮೊದಲ ಸ್ಥಾನದಲ್ಲಿದ್ದರೆ, ಎರಡನೇ ಸ್ಥಾನದಲ್ಲಿ ಈಜಿಪ್ಟ್​ ಇದೆ. ಹೀಗಾಗಿ, ಈ ಕಾನೂನು ಜಾರಿಯಾದರೆ ಈಜಿಪ್ಟ್​ ಪ್ರಜೆಗಳ ಮೇಲೂ ಪರಿಣಾಮ ಬೀರಲಿದೆ. ಕೊರೋನಾದಿಂದಾಗಿ ಕುವೈತ್​ನಲ್ಲೂ ಆರ್ಥಿಕ ಬಿಕ್ಕಟ್ಟು ಎದುರಾಗಿರುವುದರಿಂದ ವಲಸಿಗರನ್ನು ಅವರ ದೇಶಕ್ಕೆ ಕಳುಹಿಸಿ, ತಮ್ಮ ದೇಶದ ಜನರಿಗೆ ಹೆಚ್ಚಿನ ಉದ್ಯೋಗಾವಕಾಶ ನೀಡಲು ಸರ್ಕಾರ ಚಿಂತಿಸಿದೆ ಎನ್ನಲಾಗಿದೆ.