ಭಾರತಕ್ಕೆ ಬಂದ ಎನ್‌ಆರ್‌ಗಳಿಗೆ ಅಮೆರಿಕದಲ್ಲಿ ಕೆಲಸ ಕಳೆದುಕೊಳ್ಳುವ ಭೀತಿ..!

ಹೈದರಾಬಾದ್‌: ಲಾಕ್‌ಡೌನ್‌ ಮೊದಲು ತಾಯ್ನಾಡಿಗೆ ಬಂದು ಅಮೆರಿಕಕ್ಕೆ ತೆರಳಲಾಗದ ಸಾಕಷ್ಟು ವೃತ್ತಿಪರರಿಗೆ ಉದ್ಯೋಗ ಕಳೆದುಕೊಳ್ಳುವ ಭೀತಿ ಎದುರಾಗಿದೆ. ಹೀಗಾಗಿ ಸಾಮಾಜಿಕ ಜಾಲತಾಣಗಳ ಮೂಲಕ ಸಂಪರ್ಕ ಸಾಧಿಸಿ ಖಾಸಗಿ ವಿಮಾನವೊಂದರ ಮೂಲಕ ಮರಳುವ ಯತ್ನ ನಡೆಸುತ್ತಿದ್ದಾರೆ. ಆದರೆ, ಒಂದು ವಿಮಾನಕ್ಕೆ ಸರಿ ಸುಮಾರು 7 ಕೋಟಿ ರೂ. ಪಾವತಿ ಮಾಡಬೇಕಾಗಿದ್ದು, ಎಲ್ಲರೂ ಸೇರಿ ಆ ಮೊತ್ತವನ್ನು ಹಂಚಿಕೊಳ್ಳಬೇಕಾಗಿದೆ.

283 ಸೀಟ್‌ಗಳಿರುವ ಏರ್‌ಬಸ್‌ ಎ330 ವಿಮಾನವೊಂದಕ್ಕೆ 7 ಕೋಟಿ ರೂಪಾಯಿ ಹಾಗೂ 278 ಆಸನ ವ್ಯವಸ್ಥೆಗಳಿರುವ ಬೋಯಿಂಗ್‌ 767 ವಿಮಾನಕ್ಕೆ 6.7 ಕೋಟಿ ರೂ. ಪಾವತಿಸಬೇಕು. ಆದರೆ, ಸಾಮಾಜಿಕ ಅಂತರ ಕಾಪಾಡಿಕೊಳ್ಳಬೇಕಾದ ಕಾರಣ ಒಂದು ವಿಮಾನದಲ್ಲಿ 100 ಮಂದಿಗೆ ಮಾತ್ರ ಪ್ರಯಾಣ ಮಾಡಲು ಸಾಧ್ಯ. ಹೀಗಾಗಿ ಪ್ರತಿಯೊಬ್ಬರು ಸರಾಸರಿ 7 ಲಕ್ಷ ರೂ. ಖರ್ಚು ಮಾಡಬೇಕಾದ ಅನಿವಾರ್ಯತೆಯಲ್ಲಿದ್ದಾರೆ.

ಇದು ಸಾಮಾನ್ಯ ಪ್ರಯಾಣದ ದರದ 10ರಿಂದ 15 ಪಟ್ಟು ಹೆಚ್ಚಾಗುತ್ತದೆ. ಎಚ್‌1ಬಿ ವೀಸಾ ಹೊಂದಿರುವವರು ಅಮೆರಿಕದ ಪ್ರಜೆಗಳಲ್ಲ. ಹೀಗಾಗಿ ಅವರನ್ನು ಅಮೆರಿಕ ಸರಕಾರ ವಾಪಸ್‌ ಕರೆಸಿಕೊಳ್ಳುವುದಿಲ್ಲ. ಇವರೆಲ್ಲರೂ ಈಗಾಗಲೇ ಒಂದು ತಿಂಗಳು ವರ್ಕ್ ಫ್ರಮ್‌ ಹೋಮ್‌ ಮಾಡಿಯೂ ಆಗಿದೆ. ಆದರೆ, ಉದ್ಯೋಗದಾತರು ಇನ್ನಷ್ಟು ದಿನ ಅದೇ ಸ್ಥಿತಿ ಮುಂದುವರಿಸಲು ಸಿದ್ಧರಿಲ್ಲ. ಅಲ್ಲದೆ, ಆರ್ಥಿಕತೆ ಕುಸಿಯುತ್ತಿರುವ ಪ್ರಸ್ತುತ ಸಂದರ್ಭದಲ್ಲಿ ಉದ್ಯೋಗ ನಷ್ಟ ಅವರನ್ನು ಭೂತದಂತೆ ಕಾಡುತ್ತಿದೆ.

ಒಂದು ವೇಳೆ ಕೆಲಸ ಕಳೆದುಕೊಂಡರೆ ಅವರ ವೀಸಾ ಕೂಡ ರದ್ದಾಗುತ್ತದೆ. ಹೀಗಾಗಿ ವಾಪಸ್‌ ಆ ದೇಶಕ್ಕೆ ತೆರಳಲು ಶತಪ್ರಯತ್ನಗಳು ನಡೆಯುತ್ತಿವೆ.