ಕೊಲ್ಕತ್ತಾ: ಕೊರೊನಾ ಪಾಸಿಟಿವ್ ಆಗಿದ್ದ ವ್ಯಕ್ತಿಯನ್ನು ನೆಗೆಟಿವ್ ಎಂದು ಆಸ್ಪತ್ರೆಯಿಂದ ಬಿಡುಗಡೆಗೊಳಿಸಿ, 24 ಗಂಟೆಗಳ ನಂತರ ಪಾಸಿಟಿವ್ ಆಗಿದ್ದ ವ್ಯಕ್ತಿ ಮತ್ತೆ ಆಸ್ಪತ್ರೆಗೆ ದಾಖಲಾಗಿ 12 ಗಂಟೆಯಲ್ಲಿ ಕೊರೊನಾ ವೈರಸ್ನಿಂದ ಸಾವನ್ನಪ್ಪಿರುವ ಘಟನೆ ಕೊಲ್ಕತ್ತಾದಲ್ಲಿ ನಡೆದಿದೆ. 68 ವರ್ಷದ ಓಂ ಪ್ರಕಾಶ್ ಮೃತಪಟ್ಟವರು.
ಭಾನುವಾರವಷ್ಟೇ ವ್ಯಕ್ತಿಯನ್ನು ಕೊರೊನಾ ವೈರಸ್ ನೆಗೆಟಿವ್ ಎಂದು ಆಸ್ಪತ್ರೆಯಿಂದ ಬಿಡುಗಡೆಗೊಳಿಸಿದ್ದರು. ನಂತರ ಸೋಮವಾರ ಅದೇ ವ್ಯಕ್ತಿಯನ್ನು ಪಾಸಿಟಿವ್ ಎಂದು ಆಸ್ಪತ್ರೆಯವರು ವಾಪಸ್ ಕರೆಸಿಕೊಂಡಿದ್ದರು. ಎರಡನೇ ಬಾರಿ ಆಸ್ಪತ್ರೆಗೆ ಸೇರಿದ 12 ಗಂಟೆಗಳಲ್ಲಿಯೇ ಓಂ ಪ್ರಕಾಶ್ ಸಾವನ್ನಪ್ಪಿದ್ದಾರೆ.
ಈ ಬಗ್ಗೆ ಓಂ ಪ್ರಕಾಶ್ ಅವರ ಮಗ ರಾಜ್ ಗುಪ್ತಾ, ನನ್ನ ತಂದೆ ಬಾಂಗೂರ್ಗೆ ದಾಖಲಾಗಿದ್ದರು. ವೈದ್ಯರು ತಂದೆಗೆ ಕೊರೊನಾ ಇರುವುದು ದೃಢಪಡಿಸಿದ್ದರು. ನಂತರ ನಮ್ಮನ್ನು ಹೋಮ್ ಕ್ವಾರಂಟೈನ್ನಲ್ಲಿಟ್ಟಿದ್ದರು. ಮರುದಿನವೇ ಆಸ್ಪತ್ರೆಯಿಂದ ಕರೆ ಮಾಡಿ ನಿಮ್ಮ ತಂದೆಗೆ ಕೊರೊನಾ ಇಲ್ಲ ಎಂದು ಹೇಳಿ ಕೋವಿಡ್-19 ನೆಗೆಟಿವ್ ಎಂಬ ಪ್ರಮಾಣ ಪತ್ರ ನೀಡಿದ್ದರು. ಅದಾದ ನಂತರ ಮತ್ತೆ ಆರೋಗ್ಯ ಇಲಾಖೆ ತಂದೆಗೆ ಪಾಸಿಟಿವ್ ಎಂದು ತಿಳಿಸಿತ್ತು ಎಂದರು.
ಇದು ಆರೋಗ್ಯ ಇಲಾಖೆಯ ನಿರ್ಲಕ್ಷ್ಯ. ನನ್ನ ತಂದೆಯನ್ನು ಕೊಲೆ ಮಾಡಲಾಗಿದೆ. ಬಾಂಗೂರ್ ಆಸ್ಪತ್ರೆ ಮತ್ತು ಆರೋಗ್ಯ ಇಲಾಖೆಯ ಉನ್ನತ ಅಧಿಕಾರಿಗಳು ನಮಗೆ ಉತ್ತರ ನೀಡಬೇಕು ಎಂದು ಆಗ್ರಹಿಸಿದ್ದಾರೆ. ನಮ್ಮ ಕುಟುಂಬಕ್ಕೆ ಪರಿಹಾರ ನೀಡಬೇಕು ಎಂದು ರಾಜ್ ಗುಪ್ತಾ ಹೇಳಿದ್ದಾರೆ.
ಆರೋಗ್ಯ ಇಲಾಖೆಯು ಓಂ ಪ್ರಕಾಶ್ ಪ್ರಕರಣವನ್ನು ತನಿಖೆಗೆ ಆರೋಗ್ಯ ಇಲಾಖೆ ಆದೇಶಿಸಿದೆ. ಮೇ 3ರಂದು ಓಂ ಪ್ರಕಾಶ್ ಪತ್ನಿ, ಮಗ, ಸೊಸೆ ಮತ್ತು ಎರಡು ಮೊಮ್ಮಕ್ಕಳಿಗೆ ಕೊರೊನಾ ಪರೀಕ್ಷೆ ನಡೆಸಲಾಗುವುದು ಎಂದು ಸರಕಾರ ಹೇಳಿದೆ.
Comments are closed.