ಡಾಲರ್ ‌ಎದುರು ರೂಪಾಯಿ ಮೌಲ್ಯ ಮತ್ತಷ್ಟು ಕುಸಿತ

ಹೊಸದಿಲ್ಲಿ: ಕಚ್ಚಾ ತೈಲ ದರ ಇಳಿಕೆ, ಮ್ಯುಚೂವಲ್‌ ಫಂಡ್‌ಗಳಿಗೆ ವಿಶೇಷ ಹಣಕಾಸಿನ ನೆರವಿನ ನಡುವೆಯೂ ಕರೆನ್ಸಿ ವಿನಿಮಯ ಮಾರುಕಟ್ಟೆಯಲ್ಲಿ ಯುಎಸ್‌ ಡಾಲರ್ ‌ಎದುರು ರೂಪಾಯಿ ಮೌಲ್ಯ ಮತ್ತಷ್ಟು ಕುಸಿದಿದೆ. ಮಂಗಳವಾರ ಬೆಳಗ್ಗೆಯೇ ಡಾಲರ್‌ ಎದುರು ರೂಪಾಯಿ 7 ಪೈಸೆಯಷ್ಟು ಇಳಿಕೆ ದಾಖಲಿಸಿದೆ.

ಸದ್ಯ ಯುಎಸ್‌ ಡಾಲರ್‌ಗೆ 76.31 ರೂ. ಇದ್ದು, ಈ ಮೌಲ್ಯ ಸೋಮವಾರ ಸಂಜೆ 76.24 ರೂ. ನಷ್ಟಿತ್ತು. ಸೋಮವಾರ ಬೆಳಗ್ಗೆ 76.14 ರಿಂದ ಪ್ರಾರಂಭವಾದ ರೂಪಾಯಿ ಮೌಲ್ಯ ಮಧ್ಯಾಹ್ನ ಸ್ವಲ್ಪ ಚೇತರಿಕೆ ಕಂಡು 76.05ಗೆ ಬಂದು ನಿಂತಿತ್ತು. ಆದರೆ, ಸಂಜೆ ಮತ್ತೆ ಕುಸಿದು ಡಾಲರ್‌ ಎದುರು 76.24 ರೂ.ಗೆ ನಿಂತಿತ್ತು.

ಅನೇಕ ರಾಷ್ಟ್ರಗಳು ಹಂತ ಹಂತವಾಗಿ ಕೊರೊನಾ ವೈರಸ್‌ ಲಾಕ್‌ಡೌನ್‌ ಹಿಂದಕ್ಕೆ ತೆಗೆದುಕೊಳ್ಳುತ್ತಿರುವುದರಿಂದ ಕರೆನ್ಸಿ ವಿನಿಮಯ ಮಾರುಕಟ್ಟೆಯಲ್ಲಿ ಯುಎಸ್‌ ಡಾಲರ್‌ ದುರ್ಬಲವಾಗುತ್ತಿದೆ. ಆದರೆ, ರೂಪಾಯಿ ಮೌಲ್ಯ ಮಾತ್ರ ಕುಸಿಯುತ್ತಿರುವುದು ನಿಲ್ಲುತ್ತಿಲ್ಲ. ಸೋಮವಾರವಷ್ಟೇ ರಿಸರ್ವ್‌ ಬ್ಯಾಂಕ್‌ ಆಫ್‌ ಇಂಡಿಯಾ ಮ್ಯೂಚುವಲ್‌ ಫಂಡ್‌ಗಳಿಗೆ 50 ಸಾವಿರ ಕೋಟಿ ರೂ. ವಿಶೇಷ ಹಣಕಾಸಿನ ನೆರವು ನೀಡಿತ್ತು. ಆ ಕಾರಣದಿಂದ ರೂಪಾಯಿ ಯುಎಸ್‌ ಡಾಲರ್‌ ಎದುರು ಸ್ವಲ್ಪ ಚೇತರಿಕೆಯನ್ನು ಕಂಡಿತ್ತು.

ಇನ್ನು, ಷೇರು ಮಾರುಕಟ್ಟೆಯಲ್ಲಿ ಮಂಗಳವಾರ ಸ್ವಲ್ಪ ಚೇತರಿಕೆ ಕಂಡುಬಂದಿದೆ. ಸದ್ಯ 34.35 ಅಂಕಗಳ ಚೇತರಿಕೆ ಕಂಡಿರುವ ನಿಫ್ಟಿ 9,312.70 ರಷ್ಟಿದ್ದರೆ, 99.65 ಸೂಚ್ಯಂಕ ಜಿಗಿದಿರುವ ಸೆನ್ಸೆಕ್ಸ್‌ 31,842.73ರಷ್ಟಿದೆ. ಕಚ್ಚಾ ತೈಲ ದರ ಬ್ಯಾರಲ್‌ಗೆ 888 ರೂ. ಇದೆ.