ಸಂಬಂಧಿಕರು ಮತ್ತು ಸ್ನೇಹಿತರು ಮದುವೆ ಸಮಾರಂಭಗಳಲ್ಲಿ ವಧು-ವರರಿಗೆ ಉಡುಗೊರೆ ಕೊಡುವುದು ಸಾಮಾನ್ಯ. ಏನಾದರೊಂದು ವಿಶೇಷ ಉಡುಗೊರೆಗಳನ್ನು ನೀಡುತ್ತಾರೆ. ನೆನಪುಳಿಯುವಂತಹ ಅಥವಾ ಇಷ್ಟವಾಗುವ ವಿಭಿನ್ನ ಗಿಫ್ಟ್ಗಳನ್ನು ಕೊಡುತ್ತಾರೆ. ಆದರೆ ತಮಿಳುನಾಡಿನಲ್ಲಿ ಮದುವೆಯಾದ ನವ ದಂಪತಿಗೆ ಅವರ ಗೆಳೆಯರು ಈರುಳ್ಳಿ ಇರುವ ಬೊಕ್ಕೆಯನ್ನು ನೀಡಿದ್ಧಾರೆ. ಇದು ವಿಚಿತ್ರ ಎನಿಸಿದರೂ ಸತ್ಯ.
ತಮಿಳುನಾಡಿನ ಕಡಲೂರಿನ ಮಂಜಕುಪ್ಪಂನಲ್ಲಿ ಮದುವೆಯೊಂದು ನೆರವೇರಿತ್ತು. ಈ ಮದುವೆಗೆ ಆಗಮಿಸಿದ್ದ ವರನ ಗೆಳೆಯರು 2.5 ಕೆ.ಜಿ ಈರುಳ್ಳಿಯ ಬೊಕ್ಕೆಯನ್ನು ನವ ದಂಪತಿಗೆ ನೀಡಿದ್ಧಾರೆ. ಹೂವಿನ ಬೊಕ್ಕೆ ಕೊಡುವುದು ಕಾಮನ್, ಆದರೆ ಈರುಳ್ಳಿ ಬೊಕ್ಕೆ ಯಾಕೆ ಅಂತೀರಾ? ಈರುಳ್ಳಿ ಬೆಲೆ ಗಗನಕ್ಕೇರಿದ ಹಿನ್ನೆಲೆ, ಮದುವೆಗೆ ಆಗಮಿಸಿದ ಗೆಳೆಯರು ವಧು-ವರರಿಗೆ ಈರುಳ್ಳಿ ಬೊಕ್ಕೆ ಕೊಟ್ಟು ಮದುವೆ ಶುಭಾಷಯ ತಿಳಿಸಿದ್ದಾರೆ.
ಇದು ಮದುಮಕ್ಕಳಿಗೆ ತೀರಾ ಅನಿರೀಕ್ಷಿತ, ಆಶ್ಚರ್ಯಕರ ಮತ್ತು ವಿಭಿನ್ನ ಗಿಫ್ಟ್ ಆಗಿತ್ತು. ಉಡುಗೊರೆ ಸ್ವೀಕರಿಸಿದ ವಧು ವರರು ಓಪನ್ ಮಾಡಿ ನೋಡಿದಾಗ ಆಶ್ಚರ್ಯ ವ್ಯಕ್ತಪಡಿಸಿದ್ದಾರೆ. ಜೊತೆಗೆ ಉಪಯೋಗವಾಗುವಂತಹ ಗಿಫ್ಟ್ ನೀಡಿದ್ದಾರೆ ಎಂದು ಸಂತಸ ವ್ಯಕ್ತಪಡಿಸಿದ್ದಾರೆ.
ಇತ್ತೀಚಿನ ದಿನಗಳಲ್ಲಿ ದೇಶದೆಲ್ಲೆಡೆ ಈರುಳ್ಳಿ ದರ ಏರಿಕೆಯಾಗಿದೆ. ಕೆ.ಜಿ.ಈರುಳ್ಳಿ ಬೆಲೆ ಗರಿಷ್ಠ 200 ರೂ.ದಾಟಿದೆ. ಸಿಲಿಕಾನ್ ಸಿಟಿ ಬೆಂಗಳೂರಿನಲ್ಲೂ ಈರುಳ್ಳಿ ಬೆಲೆ ಅಧಿಕವಾಗಿದೆ. ಇಂತಹ ಸಂದಿಗ್ಧ ಪರಿಸ್ಥಿತಿಯಲ್ಲಿ ಗೆಳೆಯರ ಗುಂಪೊಂದು ಈರುಳ್ಳಿಯನ್ನು ಉಡುಗೊರೆಯಾಗಿ ನೀಡಿರುವುದು ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ವೈರಲ್ ಆಗಿದೆ.
ಹೆಲ್ಮೆಟ್ ಕಡ್ಡಾಯ ಎಂಬ ಕಾನೂನು ಬಂದಾಗ ಇಂತಹದ್ದೇ ಘಟನೆ ನಡೆದಿತ್ತು. ಮದುವೆಯಾದ ನವದಂಪತಿಗೆ ಹೆಲ್ಮೆಟ್ಗಳನ್ನು ಉಡುಗೊರೆಯಾಗಿ ನೀಡಿದ್ದರು.
Comments are closed.