ಹೊಸದಿಲ್ಲಿ: ಅರಬ್ಬಿ ಸಮುದ್ರದಲ್ಲಿ ಉಂಟಾಗಿದ್ದ ವಾಯುಭಾರ ಕುಸಿತ ಕ್ರಮೇಣ ಚಂಡಮಾರುತವಾಗಿ (ಕ್ಯಾರ್‌ ಸೈಕ್ಲೋನ್‌) ರೂಪುಗೊಂಡಿತ್ತು. ಇದೇನೋ ಅರಬ್ಬಿ ಸಮುದ್ರ ಹಾದು ಒಮಾನ್‌ ಕಡೆ ಸಾಗಿದೆ. ಆದರೀಗ ಕ್ಯಾರ್‌ನಷ್ಟೇ ಉಗ್ರ ರೂಪದ ಮತ್ತೊಂದು ಚಂಡಮಾರುತ ಭಾರತದ ಪಶ್ಚಿಮ ಕರಾವಳಿಗೆ ಅಪ್ಪಳಿಸಲಿದೆ. ಮತ್ತೆ ಭಾರೀ ಮಳೆಯಾಗಲಿದ್ದು, ಮತ್ತಷ್ಟು ಹಾನಿ ಮಾಡಲಿದೆ.
ಕ್ಯಾರ್‌ ಚಂಡಮಾರುತವೇನೋ ಭಾರತದ ತೀರದಿಂದ ದೂರ ಸರಿದು ಒಮಾನ್‌ನತ್ತ ಸಾಗಿದೆ. ಇನ್ನೇನು ಮಳೆ ತೆರವಾಗಲಿದೆ ಎಂದು ನಿಟ್ಟುಸಿರು ಬಿಟ್ಟಿದ್ದ ಕರಾವಳಿ ಇದೀಗ ಮತ್ತೊಂದು ಸಂಕಷ್ಟ ಎದುರಾಗಿದೆ. ಇದೀಗ ಮತ್ತೊಂದು ಚಂಡಮಾರುತ ಕರಾವಳಿಗೆ ಅಪ್ಪಳಿಸಲು ತಯಾರಾಗುತ್ತಿದೆ. ಅರಬ್ಬಿ ಸಮುದ್ರದಲ್ಲಿ ಮತ್ತೆ ಚಂಡಮಾರುತದ ಮುನ್ಸೂಚನೆ ಸಿಕ್ಕಿದೆ. ಎರಡು ದಿನಗಳಲ್ಲಿ ‘ಮಹಾ’ ಹೆಸರಿನ ಚಂಡಮಾರುತ ಅಪ್ಪಳಿಸಲಿದೆ ಎಂದು ಹವಾಮಾನ ಇಲಾಖೆ ತಿಳಿಸಿದೆ.
12 ವರ್ಷಗಳಲ್ಲೇ ಪ್ರಬಲ ಕ್ಯಾರ್‌ ಚಂಡಮಾರುತ: ಕ್ಯಾರ್‌ ಚಂಡಮಾರು ಭಾರತದಿಂದ ದೂರ ಸರಿದೆಯಾದರೂ ತನ್ನ ರಭಸವನ್ನು ಮತ್ತಷ್ಟು ಹೆಚ್ಚಿಸಿದೆ. ಕಳೆದ 12 ವರ್ಷಗಳಲ್ಲೇ ಅತ್ಯಂತ ಪ್ರಬಲ ಚಂಡಮಾರುತ ಎಂಬ ಕುಖ್ಯಾತಿಗೆ ಕ್ಯಾರ್‌ ಚಂಡಮಾರುತ ಪಾತ್ರವಾಗಿದೆ. ಒಮಾನ್‌ ತೀರದದತ್ತ ಸಾಗಿರುವ ಕ್ಯಾರ್‌ ಗಂಟೆಗೆ 250 ಕಿಮೀಗಳಷ್ಟು ಪ್ರಚಂಡ ವೇಗದಲ್ಲಿ ಚಲಿಸುತ್ತಿದೆ. ಅರಬ್ಬಿ ಸಮುದ್ರ ಚಂಡಮಾರುತಗಳು ಉಂಟಾಗುವುದು ಸಹಜ. ವರ್ಷದಲ್ಲಿ ಕನಿಷ್ಠ ಎರಡು ಚಂಡಮಾರುತಗಳಾದರೂ ಉಂಟಾಗುತ್ತವೆ. ಆದರೆ, ಇಷ್ಟು ಪ್ರಬಲ ಚಂಡಮಾರುತಗಳು ವಿರಳ. ಶಾಂತ ಸಾಗರದಲ್ಲಿ (ಪೆಸಿಫಿಕ್‌) ವಿಶ್ವದಲ್ಲೇ ಅತ್ಯಂತ ಪ್ರಬಲ ಚಂಡಮಾರುತಗಳು ಉಂಟಾಗುತ್ತವೆ. ಅಂತಹ ಚಂಡಮಾರುತಗಳ ವೇಗಕ್ಕೆ ಸರಿಸಾಟಿಯಾಗಿದೆ ಕ್ಯಾರ್‌ ಚಂಡಮಾರುತ.
2007ರಲ್ಲಿ ಉಂಟಾಗಿದ್ದ ಗೊನು ಚಂಡಮಾರುತ ಇಷ್ಟೇ ಪ್ರಬಲವಾಗಿತ್ತು. ಗೊನು ಚಂಡಮಾರುತದ ಗರಿಷ್ಠ ವೇಗ ಗಂಟೆಗೆ 270 ಕಿಮೀ ಆಗಿತ್ತು.
Comments are closed.