ನವದೆಹಲಿ: ಬಿಹಾರದಲ್ಲಿ ಲೋಕಸಭೆ ಚುನಾವಣೆಗೆ ಬಿಜೆಪಿ ಮತ್ತು ಜೆಡಿಯು ಪಕ್ಷಗಳು 50:50 ಸೂತ್ರದೊಂದಿಗೆ ಸೀಟು ಹಂಚಿಕೆ ಮಾಡಿಕೊಂಡಿವೆ. ಬಿಜೆಪಿ ರಾಷ್ಟ್ರೀಯ ಅಧ್ಯಕ್ಷ ಅಮಿತ್ ಶಾ ಅವರೇ ಈ ಸೂತ್ರದ ಮೇರೆಗೆ ಸೀಟು ಹಂಚಿಕೆ ಮಾಡಿದ್ದಾರೆ. ಅಲ್ಲದೇ ಬಿಹಾರದ 40 ಲೋಕಸಭಾ ಕ್ಷೇತ್ರಗಳ ಪೈಕಿ ಬಿಜೆಪಿ ಮತ್ತು ಜೆಡಿಯು ಪಕ್ಷಗಳು ತಲಾ 17 ಸೀಟುಗಳಲ್ಲಿ ಕಣಕ್ಕಿಳಿಯಲಿವೆ. ಇನ್ನುಳಿದ 6 ಕ್ಷೇತ್ರಗಳನ್ನು ಇತರೆ ಎನ್ಡಿಎ ಮಿತ್ರಪಕ್ಷಗಳಿಗೆ ಬಿಟ್ಟುಕೊಟ್ಟಿವೆ ಎನ್ನಲಾಗಿದೆ. ಈ ಬಗ್ಗೆ ಅಮಿತ್ ಶಾ ಅವರೇ ಸುದ್ದಿಗೋಷ್ಠಿ ನಡೆಸಿ ಅಧಿಕೃತವಾಗಿ ಘೋಷಿಸಿದ್ದಾರೆ.
ಕಳೆದ ಲೋಕಸಭಾ ಚುನಾವಣೆಯಲ್ಲಿ ಬಿಜೆಪಿಯು ಬಿಹಾರದ 30 ಕ್ಷೇತ್ರಗಳ ಪೈಕಿ 29ರಲ್ಲಿ ಕಣಕ್ಕಿಳಿದು ಬರೋಬ್ಬರಿ 22 ಸ್ಥಾನಗಳನ್ನ ಜಯಿಸಿತ್ತು. ಅದಾದ ನಂತರ ಬಿಹಾರದಲ್ಲಿ ಜೆಡಿಯುಗಿಂತಲೂ ತಾನೇ ದೊಡ್ಡಣ್ಣನೆಂದು ಬಿಜೆಪಿ ಬೀಗುತ್ತಾ ಬಂದಿತ್ತು. ಈ ಹಿನ್ನೆಲೆಯಲ್ಲಿ ಇವತ್ತು ಅಮಿತ್ ಶಾ ಅವರು 50-50 ಫಾರ್ಮುಲಾಗೆ ಒಪ್ಪಿಕೊಂಡಿರುವುದು ಜೆಡಿಯು ಪಕ್ಷಕ್ಕೆ ಸಿಕ್ಕ ಚುನಾವಣಾ ಪೂರ್ವ ಗೆಲುವೆಂದು ಬಣ್ಣಿಸಲಾಗುತ್ತಿದೆ.
ಈ ಹಿಂದಿನ ಲೋಕಸಭಾ ಚುನಾವಣೆಯಲ್ಲಿ 3 ಕ್ಷೇತ್ರಗಳನ್ನ ಗೆದ್ದಿದ್ದ ಆರ್ಎಲ್ಎಸ್ಪಿ ಈ ಬಾರಿ ಈ ಬಾರಿ ಕನಿಷ್ಠ 3 ಕ್ಷೇತ್ರಗಳನ್ನಾದರೂ ನಿರೀಕ್ಷಿಸಿತ್ತು. ಬಳಿಕ ಉಪೇಂದ್ರ ಕುಶ್ವಾಹ ಅವರಿಗೆ ಅಮಿತ್ ಶಾ ಅವರ ಫಾರ್ಮುಲಾ ನಿರಾಸೆ ತಂದಿತ್ತು. ಈ ಬಗ್ಗೆ ಬಹಿರಂಗವಾಗಿಯೇ ಅಸಮಾಧಾನ ಹೊರಹಾಕಿದ್ದ ಉಪೇಂದ್ರ ಕುಶ್ವಾಹ ಅವರ ಪಕ್ಷವು ಎನ್ಡಿಎ ಮೈತ್ರಿಕೂಟದಿಂದಲೇ ಹೊರನಡೆಯಿತು.
ಸೈದ್ಧಾಂತಿಕವಾಗಿಯೂ ಬಿಜೆಪಿ ಜೊತೆ ಸಾಮ್ಯತೆ ಇಲ್ಲದ ಅವರ ಪಕ್ಷಕ್ಕೆ ಎನ್ಡಿಎ ಬಿಟ್ಟು ಹೋಗುವುದು ಕಷ್ಟವಾಗಿರಲಿಲ್ಲ. ನಂತರ ಎನ್ಡಿಎ ಸಖ್ಯ ತೊರೆದ ಉಪೇಂದ್ರ ಕುಶ್ವಾಹ ಪಕ್ಷ ಇದೀಗ ಕಾಂಗ್ರೆಸ್, ಆರ್ಜೆಡಿ ಜತೆಗೆ ಮೈತ್ರಿ ಮಾಡಿಕೊಂಡಿದೆ. ಹೀಗಾಗಿ ಈ ಬಾರಿ ಬಿಹಾರದಲ್ಲಿನ ಲೋಕಸಭಾ ಕದನ ಭಾರೀ ಕುತೂಹಲ ಮೂಡಿಸಿದೆ. ಅಲ್ಲದೇ ಬಿಜೆಪಿ-ಜೆಡಿಯು ಮೈತ್ರಿಗೆ ಕಾಂಗ್ರೆಸ್ ಮತ್ತು ಆರ್ಜೆಡಿ ಮೈತ್ರಿ ಸೆಡ್ಡು ಹೊಡೆಯಲಿದೆಯಾ? ಕಾದು ನೋಡಬೇಕಿದೆ.
Comments are closed.