ರಾಷ್ಟ್ರೀಯ

ಪಾಕ್​ನ 20 ವಿಮಾನಗಳಿಂದ ಭಾರತದ ವಾಯು ಗಡಿರೇಖೆ ಉಲ್ಲಂಘನೆ; ಉತ್ತರಿಸಲು ಸಿದ್ಧವಾದ ಸೇನೆ

Pinterest LinkedIn Tumblr


ನವದೆಹಲಿ: ಬುಧವಾರ ಬೆಳಗ್ಗೆ ಪಾಕಿಸ್ತಾನ ಭಾರತದ ವಾಯು ಗಡಿರೇಖೆಯನ್ನು ಉಲ್ಲಂಘಿಸಿದೆ ಎಂಬ ಮಾಹಿತಿ ಸರ್ಕಾರದ ಉನ್ನತ ಮೂಲಗಳು ನ್ಯೂಸ್​ 18ಗೆ ತಿಳಿದುಬಂದಿದೆ. ಪಾಕಿಸ್ತಾನದ 20ಕ್ಕೂ ಹೆಚ್ಚು ವಿಮಾನಗಳು ಬುಧವಾರ ಬೆಳಗ್ಗೆ 9.45ರ ವೇಳೆ ಭಾರತೀಯ ವಾಯು ವಲಯ ಪ್ರದೇಶದ ಗಡಿರೇಖೆಯನ್ನು ಉಲ್ಲಂಘಿಸಿವೆ ಮತ್ತು ಹತ್ತು ಕಿ.ಮೀ. ಒಳಗೆ ಬಂದಿವೆ. ಭಾರತೀಯ ಸೇನೆಯನ್ನು ಗುರಿಯಾಗಿಸಿಕೊಂಡು, ಲೇಸರ್​ ಗೈಡೆಡ್​ಗಳನ್ನು ಸ್ಪೋಟಿಸಿವೆ.

ಆದರೆ, ಕ್ಷಿಪಣೆಗಳ ಗುರಿ ತಪ್ಪಿದೆ ಎಂದು ರಕ್ಷಣಾ ಸಚಿವಾಲಯದ ಮೂಲಗಳು ತಿಳಿಸಿವೆ. ಆದರೆ, ತಾವು ಭಾರತೀಯ ಸೇನೆಯನ್ನು ಗುರಿಯನ್ನಾಗಿಸಿಕೊಂಡು ದಾಳಿ ನಡೆಸಿಲ್ಲ ಎಂದು ಪಾಕಿಸ್ತಾನ ಸುಳ್ಳು ಹೇಳಿಕೊಳ್ಳುತ್ತಿರುವುದಾಗಿ ಮೂಲಗಳು ಹೇಳಿವೆ. ಮೂಲಗಳ ಪ್ರಕಾರ, ಆ ಸ್ಥಳದಲ್ಲಿ ಭದ್ರತಾ ಪಡೆಯನ್ನು ರದ್ದು ಮಾಡಲಾಗಿಲ್ಲ. ಪ್ರಮುಖ ಸ್ಥಾನಗಳನ್ನು ಹೊಂದಿರುವ ಸಿಬ್ಬಂದಿಯನ್ನು ಕಡಿತಗೊಳಿಸಲಾಗಿದೆ. ಗಡಿರೇಖೆ ಉಲ್ಲಂಘನೆ ಸಂಬಂಧ ಕೆಲ ಪಡೆಗಳು ತತ್​ಕ್ಷಣದ ನೋಟಿಸ್​ ನೀಡಲು ಸಿದ್ಧವಾಗುತ್ತಿರುವುದಾಗಿ ಮೂಲಗಳು ತಿಳಿಸಿವೆ.

ಬುಧವಾರ ಬೆಳಗ್ಗೆ ಪಾಕಿಸ್ತಾನದ ಜೆಟ್​ ಎಫ್​-16 ಯುದ್ಧವಿಮಾನ ಭಾರತ ವಾಯು ವಲಯ ಗಡಿಯನ್ನು ದಾಟಿದಾಗ ಭಾರತದ ಮಿಗ್​-21 ವಿಮಾನವು ಅದನ್ನು ಹಿಮ್ಮೆಟ್ಟಿಸಿತ್ತು. ಈ ವೇಳೆ ಮಿಗ್​-21 ವಿಮಾನ ಪತನಗೊಂಡಿತ್ತು. ವಿಮಾನದಿಂದ ಪ್ಯಾರಾಚೂಟ್​ ಮೂಲಕ ಕೆಳಗಿಳಿದ ಅಭಿನಂದನ್​ ಅವರನ್ನು ಪಾಕಿಸ್ತಾನ ಸೈನಿಕರು ಬಂಧಿಸಿದ್ದರು. 1971ರ ನಂತರ ಭಾರತ ಮತ್ತು ಪಾಕಿಸ್ತಾನದ ನಡುವೆ ವಾಯು ಯುದ್ಧ ನಡೆದಿದ್ದು ಇದೇ ಮೊದಲು.

ನೆನ್ನೆಯ ವಾಯು ಯುದ್ಧದಲ್ಲಿ ಪಾಕಿಸ್ತಾನದ ಎಫ್​-1 ವಿಮಾನವನ್ನು ಹೊಡೆದುರುಳಿಸಿದ್ದಾಗಿ ಭಾರತ ಹೇಳಿಕೊಳ್ಳುತ್ತಿದೆ. ಇದೇ ಸಂದರ್ಭದಲ್ಲಿ ನಾವು ಭಾರತದ ಮಿಗ್​-21 ವಿಮಾನವನ್ನು ನೆಲಕ್ಕುರುಳಿಸಿದ್ದೇವೆ ಎಂದು ಪಾಕಿಸ್ತಾನ ಹೇಳಿಕೊಳ್ಳುತ್ತಿದೆ.

Comments are closed.