ಪುಲ್ವಾಮ ಉಗ್ರರ ದಾಳಿಗೆ ಪ್ರತ್ಯುತ್ತರವಾಗಿ ಭಾರತ ನೆನ್ನೆ ಬಾಲ್ಕೋಟ್ನಲ್ಲಿ ವಾಯು ದಾಳಿ ನಡೆಸಿ, ಜೈಶ್-ಇ-ಮೊಹಮ್ಮದ್ ಉಗ್ರ ಸಂಘಟನೆಯ ಶಿಬಿರವನ್ನು ನಾಮಾವಶೇಷ ಮಾಡಿತ್ತು. ಪ್ರಸ್ತುತ ಭಾರತ ಮತ್ತು ಪಾಕಿಸ್ತಾನದ ನಡುವೆ ಪ್ರಕ್ಷುಬ್ಧ ಪರಿಸ್ಥಿತಿ ನಿರ್ಮಾಣವಾಗಿದೆ.
ಎರಡು ದೇಶಗಳ ನಡುವೆ ಯಾವ ಸಂದರ್ಭದಲ್ಲಿ ಬೇಕಾದರೂ ಯುದ್ಧ ನಡೆಯುವಂತಹ ಪರಿಸ್ಥಿತಿ ನಿರ್ಮಾಣವಾಗಿದೆ. ಎರಡು ದೇಶಗಳು ಅಣು ಬಾಂಬ್ಗಳನ್ನು ಹೊಂದಿದ್ದು, ಯಾವ ದೇಶದ ಬಳಿ ಸೇನಾ ಬಲ ಹೇಗಿದೆ? ಆಯಾ ದೇಶಗಳು ಸೇನೆಗೆ ವಾರ್ಷಿಕವಾಗಿ ಮೀಸಲಿರಿಸುವ ಹಣ ಎಷ್ಟು ಎಂಬುದನ್ನು ಕುರಿತು ‘ಅಲ್ಜಜೀರಾ’ ವಿಶೇಷ ವರದಿ ಪ್ರಕಟಿಸಿದೆ.
ಮಿಲಿಟರಿ ಬಜೆಟ್
2018ರ ಬಜೆಟ್ನಲ್ಲಿ ಭಾರತ ಸರ್ಕಾರ ಸೇನೆಗೆ 4 ಲಕ್ಷ ಕೋಟಿಯನ್ನು (58 ಬಿಲಿಯನ್ ಡಾಲರ್) ಮೀಸಲಿರಿಸಿದೆ. ಇದು ದೇಶದ ಜಿಡಿಪಿಯ ಶೇ.2.1 ಭಾಗವಾಗಿದೆ. ಭಾರತೀಯ ಸೇನೆ ಒಟ್ಟು 14 ಲಕ್ಷ ಕ್ಷಿಪ್ರ ಪಡೆಯನ್ನು ಹೊಂದಿದೆ ಎಂದು ಇಂಟರ್ನ್ಯಾಷನಲ್ ಇನ್ಸ್ಟಿಟ್ಯೂಟ್ ಫಾರ್ ಸ್ಟ್ರಾಟರ್ಜಿ ಸ್ಟಡೀಸ್ (ಐಐಎಸ್ಎಸ್) ವರದಿ ಮಾಡಿದೆ.
ಕಳೆದ ವರ್ಷ ಪಾಕಿಸ್ತಾನ 1.26 ಲಕ್ಷ ಕೋಟಿಯನ್ನು (11 ಬಿಲಿಯನ್ ಡಾಲರ್) ಸೇನೆಗೆ ಮೀಸಲಿರಿಸಿದೆ. ಇದು ಪಾಕಿಸ್ತಾನದ ಜಿಡಿಪಿಯ ಶೇ.3.6ರಷ್ಟು ಭಾಗವಾಗಿದೆ. ಪಾಕ್ ಸೇನೆ 6,53,800 ಪಡೆಯನ್ನು ಹೊಂದಿದೆ. ಪಾಕಿಸ್ತಾನ 100 ಮಿಲಿಯನ್ ಡಾಲರ್ಅನ್ನು ವಿದೇಶಿ ಸೇನಾ ಸಹಾಯಧನವನ್ನು ಪಡೆದುಕೊಳ್ಳುತ್ತಿದೆ.
1993 ಮತ್ತು 2006ರ ಮಧ್ಯೆ ಪಾಕಿಸ್ತಾನ ಸರ್ಕಾರದ ವಾರ್ಷಿಕ ಆದಾಯದಲ್ಲಿ ಶೇ.20 ನಷ್ಟು ಸೇನೆಗೆ ಮೀಸಲಿರಿಸಿತ್ತು ಎಂದು ಸ್ಟಾಕ್ಹೋಮ್ ಇಂಟರ್ನ್ಯಾಷನಲ್ ಪೀಸ್ ರೀಸರ್ಚ್ ಇನ್ಸ್ಟಿಟ್ಯೂಟ್ ಹೇಳಿದೆ.
ಕ್ಷಿಪಣಿ ಮತ್ತು ಅಣು ಬಾಂಬ್ಗಳು
ಎರಡು ದೇಶಗಳು ಅಣುಬಾಂಬ್ಅನ್ನು ಸಿಡಿಸಬಲ್ಲ ಕ್ಷಿಪಣಿಗಳನ್ನು ಹೊಂದಿವೆ.
ಭಾರತದ ಬಳಿ 3 ಸಾವಿರದಿಂದ 5 ಸಾವಿರ ಕಿ.ಮೀ. ವರೆಗೆ ಸಾಗಬಲ್ಲ ಅಗ್ನಿ-3 ಕ್ಷಿಪಣಿ ಒಳಗೊಂಡಂತೆ 9 ವಿಧದಲ್ಲಿ ಕಾರ್ಯಾಚರಣೆ ನಡೆಸಬಲ್ಲ ಕ್ಷಿಪಣಿಗಳು ಇವೆ ಎಂದು ವಾಷಿಂಗ್ಟನ್ನ ಸೆಂಟರ್ ಫಾರ್ ಸ್ಟ್ರಾಟರ್ಜಿಕ್ ಆ್ಯಂಡ್ ಇಂಟರ್ನ್ಯಾಷನಲ್ ಸ್ಟಡೀಸ್ ತಿಳಿಸಿದೆ.
ಚೀನಾದ ಸಹಾಯದೊಂದಿಗೆ ಪಾಕಿಸ್ತಾನ ಸಣ್ಣ ಮತ್ತು ಮಧ್ಯಮ ಗುರಿಯೊಂದಿಗೆ ಭಾರತದ ಯಾವುದೇ ಭಾಗವನ್ನು ತಲುಪಬಲ್ಲ ಕ್ಷಿಪಣಿಯನ್ನು ತಯಾರಿಸಿದೆ ಎಂದು ಸಿಎಸ್ಐಎಸ್ ಹೇಳಿದೆ. ಅವರ ಬಳಿ ಇರುವ ಶಾಹೀನ್-2 ಕ್ಷಿಪಣಿ ಅತಿಹೆಚ್ಚು ದೂರ ಕ್ರಮಿಸಬಲ್ಲ ಕ್ಷಿಪಣಿಯಾಗಿದ್ದು, ಇದರ ಸಾಮರ್ಥ್ಯ 2 ಸಾವಿರ ಕಿ.ಮೀ. ಪಾಕಿಸ್ತಾನದ ಬಳಿ 140ರಿಂದ 150 ಸಿಡಿತಲೆಯ ಕ್ಷಿಪಣಿಗಳಿದ್ದರೆ ಭಾರತದ ಬಳಿ 130ರಿಂದ 140 ಸಿಡಿತಲೆಯ ಕ್ಷಿಪಣಿಗಳಿವೆ ಎಂದು ಎಸ್ಐಪಿಆರ್ಐ ಹೇಳಿದೆ.
ಸೇನೆಯ ಬಲಾಬಲ
ಭಾರತದ ಬಳಿ 12 ಲಕ್ಷ ಬಲಿಷ್ಠ ಸೇನೆ ಪಡೆ ಇದ್ದು, 3,565 ಯುದ್ಧ ಟ್ಯಾಂಕರ್ಗಳಿವೆ. 3,100 ಕಾಲಾಳು ಪಡೆಯ ಯುದ್ಧ ವಾಹನಗಳು, 336 ಶಸ್ತ್ರಸಜ್ಜಿತ ಸಿಬ್ಬಂದಿ ಮತ್ತು 9,719 ಫಿರಂಗಿಗಳು ಇವೆ ಎಂದು ಐಐಎಸ್ಎಸ್ ತನ್ನ ವರದಿಯಲ್ಲಿ ಉಲ್ಲೇಖಿಸಿದೆ.
ಭಾರತದ ಸೇನೆಗೆ ಹೋಲಿಸಿಕೊಂಡರೆ ಪಾಕಿಸ್ತಾನದ ಸೇನೆಯು ಕಡಿಮೆ ಗಾತ್ರವನ್ನು ಹೊಂದಿದೆ. 5,60,000 ಪಡೆಗಳು, 2,496 ಯುದ್ಧ ಟ್ಯಾಂಕರ್ಗಳು, 1,605 ಶಸ್ತ್ರಸಜ್ಜಿತ ಸೈನಿಕರು ಮತ್ತು 4,472 ಫಿರಂಗಿಗಳನ್ನು ಹೊಂದಿದೆ.
ವಾಯು ಸೇನೆಯ ಬಲಾಬಲ
ಭಾರತೀಯ ವಾಯಪಡೆ 1,27,200 ಸಿಬ್ಬಂದಿ ಮತ್ತು 814 ಯುದ್ಧ ವಿಮಾನ, 590 ಫೈಟರ್ ಜೆಟ್ಗಳು, 708 ಸಾಗಣೆ ವಿಮಾನಗಳು, 15 ದಾಳಿ ನಡೆಸುವ ಹೆಲಿಕಾಪ್ಟರ್ಗಳು ಸೇರಿದಂತೆ 720 ಹೆಲಿಕಾಪ್ಟರ್ಗಳನ್ನು ಭಾರತೀಯ ಸೇನೆ ಹೊಂದಿದೆ. ರಷ್ಯಾ ನಿರ್ಮಿತದ ಮಿಗ್-21 ಯುದ್ಧ ವಿಮಾನ ಹಾಗೂ ಫ್ರಾನ್ಸ್ ತಂತ್ರಜ್ಞಾನದ ಮಿರಾಜ್- 2000 ಯುದ್ಧವಿಮಾನಗಳು ಭಾರತೀಯ ವಾಯುಪಡೆಯ ಪ್ರಬಲ ಅಸ್ತ್ರಗಳಾಗಿವೆ.
ಪಾಕಿಸ್ತಾನದ ವಾಯುಪಡೆಯಲ್ಲಿ 70 ಸಾವಿರ ಸಿಬ್ಬಂದಿ, 425 ಯುದ್ಧ ವಿಮಾನಗಳು, 320 ಫೈಟರ್ಜೆಟ್ಗಳು, 49 ದಾಳಿ ಹೆಲಿಕಾಪ್ಟರ್ಗಳು ಸೇರಿ 378 ಹೆಲಿಕಾಪ್ಟರ್ಗಳಿವೆ ಹಾಗೂ ಚೀನಾ ನಿರ್ಮಿತದ ಎಫ್-7ಪಿಜಿ ಮತ್ತು ಅಮೆರಿಕದ ಎಫ್-16 ಯುದ್ಧ ವಿಮಾನವಿದೆ.
ನೌಕಾಪಡೆ
ಭಾರತೀಯ ನೌಕಾಪಡೆಯಲ್ಲಿ 67,700 ಸಿಬ್ಬಂದಿ ಹೊಂದುವ ಮೂಲಕ ಬಲಿಷ್ಠ ನೌಕಾಪಡೆಯನ್ನು ಹೊಂದಿದೆ. ಯುದ್ಧ ವಿಮಾನ ವಾಹಕ ವಿಕ್ರಮಾಧಿತ್ಯ ಪ್ರಬಲ ಅಸ್ತ್ರವಾಗಿದೆ. 16 ಸಬ್ಮರಿನ್, 14 ಡೆಸ್ಟ್ರಾಯರ್ಗಳು, 13 ಫ್ರಿಗ್ರೆಟ್ಸ್, 106 ಕರಾವಳಿ ಯುದ್ಧ ವಾಹಕ ನೌಕೆಗಳು ಮತ್ತು 75 ಯುದ್ಧ ಸಾಮರ್ಥ್ಯ ನೌಕೆಗಳನ್ನು ಹೊಂದಿದೆ.
ಪಾಕಿಸ್ತಾನದಲ್ಲಿ ಕಡಿಮೆ ಕರಾವಳಿ ಪ್ರದೇಶವನ್ನು ಹೊಂದಿದೆ. ಹೀಗಾಗಿ ಪಾಕಿಸ್ತಾನದ ನೌಕಾಪಡೆ ಸಣ್ಣ ಪಡೆಯನ್ನು ಹೊಂದಿದೆ. 9 ಫ್ರಿಗೆಟ್ಸ್, 8 ಸಬ್ಮರಿನ್, 17 ಪೆಟ್ರೋಲ್ ಮತ್ತು ಕರಾವಳಿ ನೌಕೆಗಳು ಹಾಗೂ 8 ಯುದ್ಧ ಸಾಮರ್ಥ್ಯ ವಿಮಾನಗಳು ಇವೆ.
Comments are closed.