ಬಿಹಾರದ ಸಾರ್ವಜನಿಕ ಆರೋಗ್ಯ ಇಂಜಿನಿಯರಿಂಗ್ ವಿಭಾಗ (ಪಿಎಚ್ಇಡಿ) ನಡೆಸಿದ ಜೂನಿಯರ್ ಸಿವಿಲ್ ಇಂಜಿನಿಯರಿಂಗ್ ಪರೀಕ್ಷೆಯ ತಾತ್ಕಾಲಿಕ ಫಲಿತಾಂಶ ಪಟ್ಟಿಯನ್ನು ಮಂಗಳವಾರ ಬಿಡುಗಡೆ ಮಾಡಿದೆ. ಈ ಪಟ್ಟಿಯಲ್ಲಿ ಅತೀ ಹೆಚ್ಚು ಅಂಕ ಪಡೆಯುವ ಮೂಲಕ ಟಾಪರ್ ಆಗಿ ಸನ್ನಿ ಲಿಯೊನ್ ಹೊರಹೊಮ್ಮಿದ್ದಾರೆ.
ಆಶ್ಚರ್ಯವಾದರೂ ಇದು ಸತ್ಯ. ಆದರೆ, ನೀವು ಭಾವಿಸುವಂತೆ ಪಿಎಚ್ಇಡಿ ನಡೆಸಿದ ಜೂನಿಯರ್ ಸಿವಿಲ್ ಇಂಜಿನಿಯರಿಂಗ್ ಪರೀಕ್ಷೆಯಲ್ಲಿ ಪಾಸಾದ ಸನ್ನಿ ಲಿಯೊನ್ ನೀಲಿಚಿತ್ರಗಳ ಮಾಜಿ ತಾರೆ ಹಾಗೂ ಬಾಲಿವುಡ್ ನಟಿ ಸನ್ನಿ ಲಿಯೊನ್ ಅಲ್ಲ. ಲಿಯೊನ್ ಲಿಯೊನ್ ಎಂಬುವರ ಮಗಳು 27 ವರ್ಷದ ಸನ್ನಿ ಲಿಯೊನ್!
ಪಿಎಚ್ಇಡಿ ಅಧಿಕೃತ ವೆಬ್ಸೈಟ್ (phed.bih.nic.in) ನಲ್ಲಿ ಆಯ್ಕೆಯಾದ ಅಭ್ಯರ್ಥಿಗಳ ಪಟ್ಟಿಯನ್ನು ಪ್ರಕಟಿಸಲಾಗಿದೆ. ವೆಬ್ಸೈಟ್ ಬಿಡುಗಡೆ ಮಾಡಿರುವ ಮಾಹಿತಿ ಪ್ರಕಾರ, ಸನ್ನಿ ಲಿಯೊನ್ 98.50 ಅಂಕಗಳ ಜೊತೆಗೆ ಶೇ.73.50 ಶೈಕ್ಷಣಿಕ ಅಂಕ ಗಳಿಸಿದ್ದಾರೆ. ಈ ಮೂಲಕ ವೃತ್ತಿಪರ ಅನುಭವಕ್ಕೆ ಬೇಕಾದ ನಿಖರ 25 ಅಂಕಗಳನ್ನು ಪಡೆದುಕೊಂಡಿದ್ದಾರೆ.
ಆದಾಗ್ಯೂ, ಕೆಲ ಪತ್ರಿಕೆಗಳು, ತಮಾಷೆಗಾಗಿ ಹೀಗೆ ಮಾಡಿರಬಹುದು ಎಂದು ವರದಿ ಮಾಡಿದ್ದವು. ಈ ಬಗ್ಗೆ ಸ್ಪಷ್ಟನೆ ನೀಡಿರುವ ಪಿಎಚ್ಇಡಿ ಜಂಟಿ ಕಾರ್ಯದರ್ಶಿ, ಅಭ್ಯರ್ಥಿಗಳು ನೀಡಿದ ಹೆಸರನ್ನು ಇಲಾಖೆ ಬದಲಿಸಿಲ್ಲ ಎಂದು ಹೇಳಿದ್ದಾರೆ. ಅಭ್ಯರ್ಥಿಗಳ ಹೆಸರು ಮತ್ತು ತಂದೆಯ ಹೆಸರನ್ನು ನಮೂದಿಸುವಾಗ ಯಾರೋ ಹೀಗೆ ದಾರಿ ತಪ್ಪಿಸಿರಬಹುದು ಎಂದು ವೆಬ್ಸೈಟ್ ಹೇಳಿದೆ.
ಕೇವಲ ಲಿಯೊನ್ ಅವರ ಒಬ್ಬರ ಹೆಸರು ಮಾತ್ರ ಹೀಗೆ ಆಶ್ಚರ್ಯಕರವಾಗಿಲ್ಲ. ಇದೇ ಪಟ್ಟಿಯಲ್ಲಿ ಮೂರನೇ ಸ್ಥಾನದಲ್ಲಿರುವ ಅಭ್ಯರ್ಥಿಯ ಹೆಸರು ‘bvcxzbnnb’ ಎಂದು ಇದೆ. ಇವರ ತಂದೆ ಹೆಸರು ಕೂಡ ಹೀಗೆ ಅಸಂಬದ್ಧ ಅಕ್ಷರಗಳಿಂದ ಕೂಡಿದೆ.
214 ಜೂನಿಯರ್ ಸಿವಿಲ್ ಇಂಜಿನಿಯರಿಂಗ್ ಪೋಸ್ಟ್ಗಳಿಗೆ ಕರೆಯಲಾಗಿದ್ದ ಪರೀಕ್ಷೆಗೆ ಒಟ್ಟು 17,911 ಅಭ್ಯರ್ಥಿಗಳು ಅರ್ಜಿ ಹಾಕಿದ್ದರು. ಇವರಲ್ಲಿ 643 ಮಂದಿ ತಾತ್ಕಾಲಿಕ ಪಟ್ಟಿಯಲ್ಲಿ ಆಯ್ಕೆಯಾಗಿದ್ದಾರೆ. ಇವರಲ್ಲಿ ಸನ್ನಿ ಲಿಯೊನ್ ಎಂಬುವವರು ಮೊದಲ ಸ್ಥಾನ ಪಡೆದಿದ್ದಾರೆ. ಸನ್ನಿ ಲಿಯೊನ್ ಸೇರಿದಂತೆ ಆಯ್ಕೆಯಾಗಿರುವ ಅಭ್ಯರ್ಥಿಗಳು ತಮ್ಮ ಗುರುತಿನ ಮಾಹಿತಿಯನ್ನು ವಿಭಾಗಕ್ಕೆ ಒದಗಿಸಬೇಕಿದೆ. ವಿಭಾಗವು ಅಭ್ಯರ್ಥಿಗಳಿಗೆ ಫೆ.24ರವರೆಗೆ ಕಾಲಾವಕಾಶ ನೀಡಿದ್ದು, ಅಷ್ಟರಲ್ಲಿ ಪಟ್ಟಿಯಲ್ಲಿ ತಪ್ಪಾದ ಮಾಹಿತಿಯನ್ನು ನವೀಕರಿಸಲು ಹಾಗೂ ತಮ್ಮ ಗುರುತನ್ನು ಸಾಬೀತುಪಡಿಸಬೇಕಿದೆ. ಇಲ್ಲವಾದಲ್ಲಿ ಅವರು ಅನರ್ಹರಾಗುತ್ತಾರೆ.
Comments are closed.