ನವದೆಹಲಿ: ಲೋಕಸಭೆ ಚುನಾವಣೆಗೆ ಇನ್ನು ಕೆಲವು ತಿಂಗಳು ಬಾಕಿಯಿರುವಂತೆ ರಾಜಕೀಯ ಪಕ್ಷಗಳು ವಾಟ್ಸಾಪ್ ಅನ್ನು ದುರುಪಯೋಗಪಡಿಸಿಕೊಳ್ಳುತ್ತಿವೆ. ಈ ಬಗ್ಗೆ ಮಾತನಾಡಿರುವ ಕಂಪನಿಯ ಹಿರಿಯ ಅಧಿಕಾರಿ ವಾಟ್ಸಾಪ್ಅನ್ನು ಈ ರೀತಿಯಾಗಿ ದುರುಪಯೋಗಪಡಿಸಿಕೊಳ್ಳಬಾರದು ಎಂದು ಎಚ್ಚರಿಕೆ ನೀಡಿದ್ದಾರೆ.
ಯಾವ ಪಕ್ಷಗಳು ವಾಟ್ಸಾಪ್ನಲ್ಲಿ ಸುಳ್ಳುಸುದ್ದಿ ಹಬ್ಬಿಸುತ್ತಿವೆ ಎಂದು ಹೇಳಲು ಫೇಸ್ಬುಕ್ ಸಹಸಂಸ್ಥೆಯಾದ ವಾಟ್ಸಾಪ್ ನಿರಾಕರಿಸಿದೆ. ಆದರೆ, ಪಕ್ಷಗಳ ಕಾರ್ಯಕರ್ತರು ವಾಟ್ಸಾಪ್ ಮೂಲಕ ಸುಳ್ಳುಸುದ್ದಿಗಳನ್ನು ಮತದಾರರಿಗೆ ಹಬ್ಬಿಸುತ್ತಿದ್ದಾರೆ ಎಂದು ಹೇಳಿದ್ದಾರೆ.
ಆಡಳಿತರೂಢ ಪಕ್ಷವಾದ ಬಿಜೆಪಿ ಮತ್ತು ವಿರೋಧ ಪಕ್ಷವಾದ ಕಾಂಗ್ರೆಸ್ ಕಾರ್ಯಕರ್ತರು ಸುಳ್ಳುಸುದ್ದಿಗಳ ಮೂಲಕ ತಮ್ಮ ಸಿದ್ಧಾಂತ ಪ್ರಚಾರ ಮಾಡಲು ಮೆಸೆಜಿಂಗ್ ಆ್ಯಪ್ಅನ್ನು ಪ್ರಮುಖ ಸಾಧನವಾಗಿ ಬಳಸಿಕೊಳ್ಳುತ್ತಿದ್ದಾರೆ.
ಹಲವು ಪಕ್ಷಗಳು ವಾಸ್ತವವನ್ನು ಮರೆಮಾಚಿ ವಾಟ್ಸಾಪ್ನಲ್ಲಿ ಸುಳ್ಳುಸುದ್ದಿಯನ್ನು ಪ್ರಸಾರ ಮಾಡಲು ಉಪಯೋಗಿಸಿಕೊಳ್ಳುತ್ತಿರುವುದನ್ನು ನಾವು ನೋಡಿದ್ದೇವೆ. ಮುಂದೆ ಇದು ಹೀಗೆಯೇ ಮುಂದುವರೆದರೆ ಇದರ ಪರಿಣಾಮ ನಮ್ಮ ಸೇವೆಯನ್ನು ರದ್ದುಗೊಳಿಸಬೇಕಾಗುತ್ತದೆ ಎಂದು ಕಂಪನಿಯ ಸಂವಹನ ವಿಭಾಗದ ಮುಖ್ಯಸ್ಥ ಕಾರ್ಲ್ ವಾಗ್ ಎಚ್ಚರಿಕೆ ನೀಡಿದ್ದಾರೆ.
ಇದು ಕೇವಲ ಭಾರತದಲ್ಲಿ ಮಾತ್ರವಷ್ಟೇ ಸವಾಲಾಗಿಲ್ಲ. ಮುಂದಿನ ಅಕ್ಟೋಬರ್ನಲ್ಲಿ ಬ್ರೆಜಿಲ್ನಲ್ಲಿ ನಡೆಯುವ ಚುನಾವಣೆಯಲ್ಲೂ ಸುಳ್ಳು ಸುದ್ಧಿ, ಪಕ್ಷಗಳ ಸಿದ್ಧಾಂತಗಳನ್ನು ಹಂಚಲು ವಾಟ್ಸಾಪ್ಅನ್ನು ದುರುಪಯೋಗ ಮಾಡಿಕೊಳ್ಳಲಾಗುತ್ತದೆ. ಇದು ರಾಜಕೀಯ ಚರ್ಚೆಯನ್ನೇ ವಿರೂಪಗೊಳಿಸುತ್ತಿದೆ.
ವಾಟ್ಸಾಪ್ ಬಳಕೆದಾರರಲ್ಲಿ ಭಾರತ ಅತಿದೊಡ್ಡ ಮಾರುಕಟ್ಟೆ. ಇಲ್ಲಿ ಸುಮಾರು 20 ಕೋಟಿ ಜನರು ವಾಟ್ಸಾಪ್ ಬಳಕೆದಾರರಿದ್ದಾರೆ. ಕಳೆದ ಡಿಸೆಂಬರ್ನಲ್ಲಿ ನಡೆದ ರಾಜಸ್ಥಾನ, ವಿಧಾನಸಭಾ ಚುನಾವಣೆಗೂ ಮುಂಚಿತವಾಗಿ ಕಾಂಗ್ರೆಸ್ ಮತ್ತು ಬಿಜೆಪಿ ಕಾರ್ಯಕರ್ತರು ರಾಯಿಟರ್ಸ್ ವರದಿಗಾರನನ್ನು 12 ಹೆಚ್ಚು ವಾಟ್ಸಾಪ್ ಪ್ರಚಾರದ ಗ್ರೂಪ್ಗಳಲ್ಲಿ ಸೇರಿಸಿಕೊಂಡಿದ್ದರು.
ಚುನಾವಣೆಯಲ್ಲಿ ವಾಟ್ಸಾಪ್ ದುರುಪಯೋಗ ಆಗುತ್ತಿರುವುದನ್ನು ನಾವು ಒಪ್ಪಿಕೊಳ್ಳುತ್ತಿದ್ದೇವೆ. ಆದರೆ, ಅಂತಹವುಗಳನ್ನು ಪತ್ತೆಹಚ್ಚಲು ಕಾರ್ಯೋನ್ಮುಖರಾಗುತ್ತೇವೆ. ಮತ್ತು ಶೀಘ್ರದಲ್ಲೇ ಸಾಧ್ಯವಾದಷ್ಟು ಮಟ್ಟಿಗೆ ಸಂರಕ್ಷಣಾ ಕ್ರಮಗಳನ್ನು ತೆಗೆದುಕೊಳ್ಳುತ್ತೇವೆ ಎಂದು ವಾಗ್ ಹೇಳಿದ್ದಾರೆ.
ಬಿಜೆಪಿ ಐಟಿ ಮುಖ್ಯಸ್ಥ ಅಮಿತ್ ಮಾಳವಿಯಾ ಮಾತನಾಡಿ, ಅವರು ವಾಟ್ಸಾಪ್ ಪ್ರತಿನಿಧಿಗಳನ್ನು ಭೇಟಿಯಾಗಿಲ್ಲ ಎಂದು ಹೇಳಿ ಹೆಚ್ಚಿನ ವಿಚಾರ ಹೇಳಲು ನಿರಾಕರಿಸಿದರು.
ಕಾಂಗ್ರೆಸ್ ಸಾಮಾಜಿಕ ಜಾಲತಾಣಗಳ ಮುಖ್ಯಸ್ಥೆ ರಮ್ಯಾ ಮಾತನಾಡಿ, ಪಕ್ಷವೂ ವಾಟ್ಸಾಪ್ಅನ್ನು ದುರುಪಯೋಗ ಮಾಡಿಕೊಳ್ಳುತ್ತಿಲ್ಲ ಎಂದು ಹೇಳಿದರು.
ಸುಳ್ಳು ಸಂದೇಶಗಳನ್ನು ಹಬ್ಬಿಸಿದ ಪರಿಣಾಮ ಗುಂಪು ಘರ್ಷಣೆ ಸಂಭವಿಸುತ್ತಿರುವ ಬಗ್ಗೆ ಕಳೆದ ವರ್ಷ ಕೇಂದ್ರದಲ್ಲಿ ಸಾಕಷ್ಟು ವಿವಾದ ಸೃಷ್ಟಿಸಿತ್ತು.
ಜಾಗತಿಕವಾಗಿ 1.5 ಬಿಲಿಯನ್ ವಾಟ್ಸಾಪ್ ಬಳಕೆದಾರರಿದ್ದಾರೆ. ಗುಂಪು ಮತ್ತು ಸ್ವಯಂಚಾಲಿತ ಸಂದೇಶ ಕಳುಹಿಸುವ 20 ಲಕ್ಷ ವಾಟ್ಸಾಪ್ ಗ್ರೂಪ್ಗಳನ್ನು ಪ್ರತಿ ತಿಂಗಳು ರದ್ದು ಮಾಡಲಾಗುತ್ತಿದೆ ಎಂದು ವಾಗ್ ಬುಧವಾರ ತಿಳಿಸಿದರು. ಆದರೆ, ಭಾರತದಲ್ಲಿ ಎಷ್ಟು ಅಕೌಂಟ್ಗಳನ್ನು ರದ್ದು ಮಾಡಲಾಗಿದೆ ಎಂಬುದನ್ನು ಅವರು ಹೇಳಲಿಲ್ಲ.
Comments are closed.