ನವದೆಹಲಿ: ಹಸಿರು ಸೀರೆ ಉಟ್ಟು, ಕಿರುನಗೆ ಬೀರುವ ಫೋಟೋವನ್ನು ಫೇಸ್ಬುಕ್ಗೆ ಅಪ್ಲೋಡ್ ಮಾಡಿದ್ದ ಅನಿಕಾ ಛೋಪ್ರಾ ಎಂಬ ಹೆಸರಿನ ಸುಂದರ ಯುವತಿ ತಾನು ಭಾರತೀಯ ಸೇನೆಯಲ್ಲಿ ನರ್ಸ್ ಎಂಬ ಅಡಿಬರೆಹ ಬರೆದುಕೊಂಡಿದ್ದಳು.
ಈ ಕಿರುನಗೆಯ ಫೋಟೋಗೆ ಭಾರತದ 50 ಸೈನಿಕರು ಮನಸೋತು, ಹನಿಟ್ರ್ಯಾಪ್ ಬಲೆಗೆ ಸಿಲುಕಿರುವ ವಿಷಯ ಇಂಟಲಿಜೆನ್ಸ್ ಏಜೆನ್ಸಿಯಿಂದ ತಿಳಿದುಬಂದಿದೆ. ಈ ಸಂಬಂಧ ಒಬ್ಬ ಸೈನಿಕನನ್ನು ಬಂಧಿಸಲಾಗಿದೆ. 50 ಮಂದಿ ಹನಿಟ್ರ್ಯಾಪ್ಗೆ ಒಳಗಾಗಿರುವುದು ಭಾರತೀಯ ಸೇನೆಗೆ ಈಗ ದೊಡ್ಡ ತಲೆನೋವಾಗಿದೆ.
ಸೇನೆಯ ಮಹತ್ವದ ಸೂಕ್ಷ್ಮ ವಿಷಯಗಳನ್ನು ಮತ್ತು ಸೇನಾ ಚಟುವಟಿಕೆ ಸ್ಥಳಗಳ ಚಿತ್ರಗಳನ್ನು ಅನಿಕಾ ಛೋಪ್ರಾ ಜೊತೆಗೆ ಹಂಚಿಕೊಂಡ ಆರೋಪದ ಮೇಲೆ ಸೋಮವೀರ್ ಸಿಂಗ್ ಎಂಬ ಯೋಧನನ್ನು ಬಂಧಿಸಲಾಗಿದೆ.
ಎರಡು ಸೇನೆಯ ಇಂಟಲಿಜೆನ್ಸಿ ಮತ್ತು ರಾಜಸ್ಥಾನದ ಎಟಿಎಸ್ ಪ್ರಕಾರ, ಛೋಪ್ರಾ ಪಾಕಿಸ್ತಾನದ ಏಜೆಂಟ್. ಆಕೆ ಕೇವಲ ಒಬ್ಬ ಸೈನಿಕನನ್ನು ಮಾತ್ರ ಹನಿಟ್ರ್ಯಾಪ್ಗೆ ಕೆಡವಿಲ್ಲ. ಬದಲಾಗಿ ಹಲವು ಸೈನಿಕರೊಂದಿಗೆ ಸಂಬಂಧ ಸಾಧಿಸಿದ್ದಾಳೆ. ಆದರೆ, ಆಕೆ ಬ್ಲಾಕ್ಮೇಲ್ ಮಾಡುವವರೆಗೂ ಛೋಪ್ರಾ ಪೂರ್ವಾಪರ ನನಗೆ ಗೊತ್ತಿರಲಿಲ್ಲ ಎಂದು ಬಂಧಿತ ಸೈನಿಕ ಸಿಂಗ್ ಹೇಳುತ್ತಿದ್ದಾನೆ.
ಸೋಮವೀರ್ ಸಿಂಗ್ ಮತ್ತು ಅನಿಕಾ ಛೋಪ್ರಾ ನಡುವೆ 2016ರಂದು ಫೇಸ್ಬುಕ್ನಲ್ಲಿ ಪರಿಚಯವಾಗಿದೆ. ಇದಾದ ಬಳಿಕೆ ಇಬ್ಬರ ನಡುವೆ ಅತಿಯಾದ ಸಲುಗೆ ಬೆಳೆದಿತ್ತು. ಅನಿಕಾ ಬಗ್ಗೆ ಅತಿಯಾದ ಒಲವು ಬೆಳೆಸಿಕೊಂಡ ಸಿಂಗ್ ಕೊನೆಗೆ ತನ್ನ ಹೆಂಡತಿಗೆ ವಿಚ್ಛೇದನ ನೀಡಿ, ಅನಿಕಾಳನ್ನು ಮದುವೆಯಾಗಲು ಮನಸ್ಸು ಮಾಡಿದ್ದ.
Comments are closed.