ಅಪ್ಪ ಪುತ್ರಿಯ ಜೀವಕ್ಕೆ ಮುಳುವಾದ ಕಣ್ಣಾಮುಚ್ಚಾಲೆ ಆಟ…..!

ಕೊಯ್‌ಮತ್ತೂರು: ತಂದೆ ಮಗಳು ಆಡುತ್ತಿದ್ದ ಕಣ್ಣಾಮುಚ್ಚಾಲೆ ಆಟ ಬಹುದೊಡ್ಡ ದುರಂತಕ್ಕೆ ಕಾರಣವಾದ ಹೃದಯವಿದ್ರಾವಕ ಘಟನೆ ತಮಿಳುನಾಡಿನಲ್ಲಿ ಗುರುವಾರ ಸಂಜೆ ನಡೆದಿದೆ.

ಆಕಸ್ಮಿಕವಾಗಿ ನೀರಲ್ಲಿ ಮುಳುಗಿ 2 ವರ್ಷದ ಮಗ ಸತ್ತನೆಂದು ಆತನ ತಂದೆ ಕೂಡ ಆತ್ಮಹತ್ಯೆಗೆ ಶರಣಾಗಿದ್ದು ವಿನೋದಕ್ಕಾಗಿ ಆಡಿದ ಆಟ ತಂದೆ ಮಗನ ಬದುಕಿನ ಆಟವನ್ನೇ ಮುಗಿಸಿದೆ. ಕುಟುಂಬದ ಉಳಿದ ಸದಸ್ಯರಾದ ತಾಯಿ ಮಗಳ ಗೋಳು ಹೇಳತೀರದಾಗಿದೆ.

ಮೊಬೈಲ್ ಅಂಗಡಿ ನಡೆಸುತ್ತಿದ್ದ ಮಣಿಕಂದನ್ (32) ಗುರುವಾರ ಸಂಜೆ ತನ್ನ ಮಗಳು ದೇವದರ್ಶಿನಿ (5)ಯೊಂದಿಗೆ ಕಣ್ಣು ಮುಚ್ಚಾಲೆ ಆಟ ಆಡುತ್ತಿದ್ದರು. ಆಗ 2 ವರ್ಷದ ಮಗ ದೇಜಶ್ವಿನ್ ಅಲ್ಲೇ ಸುತ್ತಮುತ್ತಲು ಆಡಿಕೊಂಡಿದ್ದ. ಕೆಲ ದಿನಗಳ ಹಿಂದೆ ಮಕ್ಕಳೊಂದಿಗೆ ಆಟವಾಡುತ್ತಿದ್ದಾಗ ಬಿದ್ದು ಪೆಟ್ಟುಮಾಡಿಕೊಂಡಿದ್ದ ತಾಯಿ ಪೂವಿತ ಬೆಡ್ ರೂಮ್‌ನಲ್ಲಿ ವಿಶ್ರಾಂತಿ ತೆಗೆದುಕೊಳ್ಳುತ್ತಿದ್ದಳು.

ಆಟದಲ್ಲಿ ಮೈಮರೆತಿದ್ದ ಮಣಿಕಂದನ್‌ಗೆ ಸುಮಾರು 1 ಗಂಟೆ ಬಳಿಕ ಮಗ ಕಾಣಿಸದಿರುವುದು ಗಮನಕ್ಕೆ ಬಂದಿದೆ. ಮನೆ ಸುತ್ತಲೂ ಹುಡುಕಾಟ ನಡೆಸಿದ ತಂದೆಗೆ ನೆಲಮಟ್ಟದಲ್ಲಿದ್ದ ತೆರೆದ ನೀರಿನ ಟ್ಯಾಂಕ್‌ನಲ್ಲಿ ಮಗನ ಶವ ತೇಲುತ್ತಿರುವುದು ಕಾಣಿಸಿದೆ. ಇದರಿಂದ ಆಘಾತಕ್ಕೊಳಗಾದ ಮಣಿಕಂದನ್ ದುಃಖ ವ್ಯಕ್ತಪಡಿಸದೆ, ಮಗಳನ್ನು ಕರೆದು ಟೆರೆಸ್ ಮೇಲೆ ಹೋಗು. ನಾನು ಅವಿತುಕೊಂಡು ಸಂಖ್ಯೆ ಎಣಿಸುತ್ತೇನೆ ಎಂದಿದ್ದಾನೆ. ಮೇಲಕ್ಕೆ ಹೋದ ಮಗು ಅಪ್ಪನ ಧ್ವನಿ ಕೇಳದೆ ಕೆಳಕ್ಕಿಳಿದು ಬಂದು ಆತನಿಗಾಗಿ ಹುಡುಕಾಡಿದ್ದಾಳೆ. ಆದರೆ ಕೋಣೆಯೊಂದರಲ್ಲಿ ಒಳಗಡೆಯಿಂದ ಚಿಲಕ ಹಾಕಿರುವುದು ಆಕೆಯ ಗಮನಕ್ಕೆ ಬಂದಿದೆ. ತಕ್ಷಣ ಆಕೆ ತಾಯಿಯನ್ನು ಎಬ್ಬಿಸಿದ್ದಾಳೆ. ತಾಯಿ ಬಾಗಿಲು ತೆಗೆಯಲಾಗದೆ ಕಿಟಕಿಯಿಂದ ನೋಡಿದಾಗ ಪತಿ ನೇಣಿನ ಕುಣಿಕೆಯಲ್ಲಿ ತೂಗುತ್ತಿರುವುದು ಕಾಣಿಸಿದೆ. ತಕ್ಷಣ ಆಕೆ ನೆರೆಹೊರೆಯವರನ್ನು ಕರೆದಿದ್ದಾಳೆ.

ಬಳಿಕ ಮಗುವಿಗಾಗಿ ಹುಡುಕಾಟ ನಡೆಸಿದ್ದು, ಆತ ಕೂಡ ನೀರಿನ ಟ್ಯಾಂಕ್‌ನಲ್ಲಿ ಶವವಾಗಿ ಪತ್ತೆಯಾಗಿದ್ದಾನೆ. ದಂಪತಿಯದು 6 ವರ್ಷಗಳ ದಾಂಪತ್ಯವಾಗಿದ್ದು ಒಂದೇ ಸಲ ಪತಿ ಮತ್ತು ಮಗುವನ್ನು ಕಳೆದುಕೊಂಡಿರುವ ಪೂವಿತಾ ರೋದನೆ ಎಂಥವರ ಕಲ್ಲು ಹೃದಯವನ್ನು ಕರಗಿಸುವಂತಿದೆ.