ನಪುಂಸಕ ಪದದಿಂದ ಮಾನಹಾನಿ: ಬಾಂಬೆ ಹೈಕೋರ್ಟ್

ನಾಗ್ಪುರ್: ವ್ಯಕ್ತಿಯನ್ನು ‘ನಪುಂಸಕ’ ಎಂದು ಕರೆಯುವುದು ಮಾನಹಾನಿಯಾಗುತ್ತದೆ ಎಂದು ಬಾಂಬೆ ಹೈಕೋರ್ಟ್‌ನ ನಾಗ್ಪುರ್ ಪೀಠ ಮಹತ್ವದ ತೀರ್ಪು ನೀಡಿದೆ.

ಪತಿ ನೀಡಿದ ದೂರಿನ ಅನ್ವಯ ವಿಚಾರಣೆ ಪ್ರಕ್ರಿಯೆ ಆರಂಭಿಸಿರುವುದನ್ನು ತಿರಸ್ಕರಿಸುವಂತೆ ಕೋರಿ ಮಹಿಳೆಯೊಬ್ಬರು ಸಲ್ಲಿಸಿದ್ದ ಮನವಿಯನ್ನು ತಿರಸ್ಕರಿಸಿರುವ ನ್ಯಾಯಾಲಯ, ‘ನಪುಂಸಕ ಪದ ಬಳಕೆ ಮಾನಹಾನಿಯಾಗುತ್ತದೆ ಹಾಗೂ ವ್ಯಕ್ತಿಯ ಪುರುಷತ್ವಕ್ಕೆ ಧಕ್ಕೆ ತಂದಂತಾಗುತ್ತದೆ’ ಎಂದು ತಿಳಿಸಿದೆ.

ವರದಕ್ಷಿಣೆ, ಗೃಹ ಹಿಂಸೆ ಹಾಗೂ ಕಿರುಕುಳ ಸೇರಿದಂತೆ ಪತಿಯ ಪುರುಷತ್ವದ ಬಗ್ಗೆ ಶಂಕೆ ವ್ಯಕ್ತಪಡಿಸಿ ವಿಚ್ಛೇದನ ಪಡೆಯಲು ಇಚ್ಛಿಸುವ ಮಹಿಳೆಯರ ವಿರುದ್ಧ ಕಾನೂನು ಹೋರಾಟ ನಡೆಸುವ ಪುರುಷರಿಗೆ ಬಾಂಬೆ ಹೈಕೋರ್ಟ್‌ನ ನಾಗ್ಪುರ್ ಪೀಠ ನೀಡಿರುವ ತೀರ್ಪು ಅನುಕೂಲವಾಗಲಿದೆ.

ಸಾಮಾನ್ಯವಾಗಿ ಪುರುಷರರಲ್ಲಿ ಪುರುಷತ್ವ ಇಲ್ಲದಿರುವುದರ ಪರ್ಯಾಯ ಪದವಾಗಿ ನಪುಂಸಕ ಪದ ಬಳಕೆ ಮಾಡಲಾಗುತ್ತದೆ. ಇದು ಪುರುಷರನ್ನು ಭಿನ್ನವಾಗಿ ನೋಡಲು ಕಾರಣವಾಗುತ್ತದೆ. ಹೀಗಾಗಿ ಈ ರೀತಿಯ ಪದ ಬಳಕೆ ಐಪಿಸಿ ಸೆಕ್ಷನ್ 499ರ ಅಡಿಯಲ್ಲಿ ಮಾನಹಾನಿಯಾಗುತ್ತದೆ ಹಾಗೂ ಸೆಕ್ಷನ್ 500ರ ಪ್ರಕಾರ ಶಿಕ್ಷೆ ವಿಧಿಸುವ ಅವಕಾಶ ಇದೆ ಎಂದು ನ್ಯಾಯಮೂರ್ತಿಗಳಾದ ಸುನೀಲ್ ಶುರ್ಕೆ ತಿಳಿಸಿದ್ದಾರೆ.