ಸೇನಾ ಕಾರ್ಯಾಚರಣೆಯಲ್ಲಿ ಮಸೂದ್​ ಅಜರ್​ನ ಅಣ್ಣ ಇಬ್ರಾಹಿಂನ ಪುತ್ರನ ಹತ್ಯೆ

ಕಾಶ್ಮೀರ್: ಭಾರತೀಯ ಸೇನೆ ಮಂಗಳವಾರ ನಡೆಸಿದ ಕಾರ್ಯಾಚರಣೆಯಲ್ಲಿ ಜೈಷ್​-ಎ-ಮೊಹಮದ್​ ಉಗ್ರ ಸಂಘಟನೆಯ ಸ್ಥಾಪಕ ಮಸೂದ್​ ಅಜರ್ ಅಳಿಯ ಮೊಹಮದ್​ ಉಸ್ಮಾನ್​ ​​ನನ್ನು ಹತ್ಯೆ ಮಾಡಿದೆ. ಈ ಮೂಲಕ ದೇಶಕ್ಕೆ ಎದುರಾಗಿದ್ದ ಕಂಟಕವನ್ನು ದೂರ ಮಾಡಿದೆ.

ಕಳೆದ 10 ದಿನಗಳಿಂದ ಕಾಶ್ಮೀರದಲ್ಲಿ ಸೇನಾ ಕ್ಯಾಂಪ್​ಗಳ ಮೇಲೆ ನಡೆಯುತ್ತಿದ್ದ ಸ್ನೈಪರ್​ ದಾಳಿಯ ಹಿಂದೆ ಉಸ್ಮಾನ್​​ನ ಕೈವಾಡವಿದೆ ಎನ್ನಲಾಗಿದೆ. ಈ ಹಿನ್ನೆಲೆಯಲ್ಲಿ ಭಾರತೀಯ ಸೇನೆ ಕಳೆದ ಕೆಲ ದಿನಗಳಿಂದ ಉಗ್ರರಿಗಾಗಿ ಹುಡುಕಾಟ ಆರಂಭಿಸಿತ್ತು. ಮಂಗಳವಾರ ನಡೆಸಿದ ಕಾರ್ಯಾಚರಣೆಯಲ್ಲಿ ಉಸ್ಮಾನ್​ ಮೃತಪಟ್ಟಿದ್ದಾನೆ. ಆತನ ಬಳಿ ಸಂಗ್ರಹವಿದ್ದ ಭಾರಿ ಶಸ್ತ್ರಾಸ್ತ್ರಗಳನ್ನು ವಶಪಡಿಸಿಕೊಳ್ಳಲಾಗಿದೆ. ಇದು ಭಾರತೀಯ ಸೇನೆಗೆ ಸಂದ ಜಯ ಎಂದು ಅಧಿಕಾರಿಗಳು ಬಣ್ಣಿಸಿದ್ದಾರೆ.

ಉಸ್ಮಾನ್​​ನನ್ನು ಹತ್ಯೆ ಮಾಡಿದ್ದಕ್ಕೆ ಜೈಷ್ ಸಂಘಟನೆ ಭಾರತೀಯ ಯೋಧರ ಮೇಲೆ ಸೇಡು ತೀರಿಸಿಕೊಳ್ಳಲು ಸಂಚು ರೂಪಿಸುತ್ತಿದೆಯಂತೆ. ಹಾಗಾಗಿ ಸೇನಾ ಶಿಬಿರಗಳಲ್ಲಿ ಅಲರ್ಟ್​​ ಆಗಿರುವಂತೆ ಸೂಚಿಸಲಾಗಿದೆ. ಇನ್ನು, ಉಸ್ಮಾನ್​​ ಸಹೋದರ ಉಮರ್ ಕೂಡ ಜುಲೈ ತಿಂಗಳಿಂದ ಕಾಶ್ಮೀರದಲ್ಲಿ ಬೀಡು ಬಿಟ್ಟಿದ್ದಾನೆ ಎನ್ನುವ ಮಾಹಿತಿ ಲಭ್ಯವಾಗಿದ್ದು ಈತನಿಗಾಗಿ ಹುಡುಕಾಟ ನಡೆಸಲಾಗುತ್ತಿದೆ.

ಯಾರು ಈ ಉಸರ್​?

ಅಜರ್​ನ ಅಣ್ಣ ಇಬ್ರಾಹಿಂನ ಪುತ್ರನೇ ಈ ಉಸ್ಮಾನ್​​. ಮೂಲತಃ ಪಾಕಿಸ್ತಾನದವನಾದ ಈತ 10 ವರ್ಷಗಳ ಹಿಂದೆಯೇ ಕಾಶ್ಮೀರಕ್ಕೆ ಆಗಮಿಸಿದ್ದ. ಜೈಷ್​ ಸಂಘಟನೆಯ ಕಾಶ್ಮೀರದ ಉಸ್ತುವಾರಿಯನ್ನು ಈತನೇ ವಹಿಸಿಕೊಂಡಿದ್ದ. 1999ರಲ್ಲಿ ಜೈಷ್​ ಮುಖ್ಯಸ್ಥ ಅಜರ್​ನನ್ನು ಬಂಧನದಿಂದ ಮುಕ್ತಿಗೊಳಿಸಲು ಐಸಿ-814 ವಿಮಾನವನ್ನು ಹೈಜ್ಯಾಕ್ ಮಾಡಿದ ಪ್ರಕರಣದಲ್ಲಿ ಉಸ್ಮಾನ್​ನ ಕೈವಾಡವೂ ಇತ್ತು.