ಮುಂಬೈ: ಭಾರತ ಕ್ರಿಕೆಟ್ ತಂಡದ ವೇಗಿ ಮೊಹಮದ್ ಶಮಿ ವಿರುದ್ಧ ಕಿರುಕುಳದ ಆರೋಪ ಮಾಡಿ ಸುದ್ದಿಗೆ ಗ್ರಾಸವಾಗಿದ್ದ ಅವರ ಪತ್ನಿ ಹಸೀನ್ ಜಹಾನ್ ಕಾಂಗ್ರೆಸ್ ಪಕ್ಷಕ್ಕೆ ಸೇರ್ಪಡೆಯಾಗಿದ್ದಾರೆ.
ಮುಂಬೈನ ಕಾಂಗ್ರೆಸ್ ಪಕ್ಷದ ಅಧ್ಯಕ್ಷ ಸಂಜಯ್ ನಿರುಪಮ್ ಅವರ ಸಮ್ಮುಖದಲ್ಲಿ ಮಹಮದ್ ಶಮಿ ಪತ್ನಿ ಹಸಿನ್ ಜಹಾನ್ ಮಂಗಳವಾರ ಕಾಂಗ್ರೆಸ್ ಪಕ್ಷದ ಶಾಲು ಸ್ವೀಕರಿಸುವ ಮೂಲಕ ಪಕ್ಷಕ್ಕೆ ಸೇರ್ಪಡೆಯಾಗಿದ್ದಾರೆ.
ವೃತ್ತಿಯಲ್ಲಿ ಮೂಲತಃ ಮಾಡೆಲ್ ಆಗಿದ್ದ ಜಹಾನ್, ಐಪಿಎಲ್ ನಲ್ಲಿ ಶಮಿಯನ್ನು ಪ್ರೀತಿಸಿ ವಿವಾಹವಾಗಿದ್ದರು. ಹಸೀನ್ ಜಹಾನ್ ಮತ್ತು ಶಮಿ ದಂಪತಿಗೆ ಓರ್ವ ಪುತ್ರಿ ಇದ್ದು, ಇತ್ತೀಚೆಗೆ ಜಹಾನ್ ಶಮಿ ವಿರುದ್ಧ ಕಿರುಕುಳ ಮತ್ತು ವಿವಾಹೇತರ ಸಂಬಂಧದಂತಹ ಗಂಭೀರ ಆರೋಪ ಮಾಡಿದ್ದರು. ಕೌಟುಂಬಿಕ ದೌರ್ಜನ್ಯವಲ್ಲದೆ ಶಮಿ ಮ್ಯಾಚ್ ಫಿಕ್ಸರ್ ಎಂದೂ ಆರೋಪಿಸಿದ್ದರು. ಅಲ್ಲದೆ, ಫಿಕ್ಸಿಂಗ್ ಸಲುವಾಗಿ ಪಾಕಿಸ್ತಾನದ ಮಹಿಳೆಯಿಂದ ಹಣ ಪಡೆದುಕೊಂಡಿದ್ದಾರೆ. ಅವರು ನನಗೆ ಮಾತ್ರವಲ್ಲ ದೇಶಕ್ಕೂ ದ್ರೋಹ ಮಾಡಿದ್ದಾರೆ. ಈ ಎಲ್ಲದಕ್ಕೂ ನನ್ನಲ್ಲಿ ಸಾಕ್ಷ್ಯಗಳಿವೆ ಎಂದು ಹೇಳಿ ಕೊಂಡಿದ್ದರು.
ಈ ಕುರಿತು ಏಪ್ರಿಲ್ 10 ರಂದು ಜಹಾನ್ ಮಹಮದ್ ಶಮಿ ವಿರುದ್ಧ ಕೋಲ್ಕತಾ ಅಲಿಪೊರ್ ನ್ಯಾಯಾಲಯದಲ್ಲಿ ಕೌಟುಂಬಿಕ ದೌರ್ಜನ್ಯದ ದೂರನ್ನು ದಾಖಲಿಸಿ, ಪತಿಯಿಂದ ಕುಟುಂಬ ನಿರ್ವಹಣಾ ವೆಚ್ಚವನ್ನು ಕೇಳಿದ್ದರು. ಆದರೆ ಶಮಿ ತಮ್ಮ ಪತ್ನಿಯ ಎಲ್ಲ ಆರೋಪಗಳನ್ನೂ ಅಲ್ಲಗೆಳೆದಿದ್ದರು.
Comments are closed.