ಲಕ್ನೋ: ಉತ್ತರ ಪ್ರದೇಶದ ಅಮ್ರೋಹಾದಲ್ಲಿ ಬಿಜೆಪಿ ನಾಯಕರಿಗೆ ರೈತರು ತಮ್ಮ ಊರಿಗೆ ಬರದಂತೆ ನಿರ್ಬಂಧ ಹೇರಿದ್ದಾರೆ. ದೆಹಲಿಯಲ್ಲಿ ರೈತರ ಮೇಲೆ ನಡೆದ ಲಾಠಿಚಾರ್ಜ್ನಿಂದ ಆಕ್ರೋಶಗೊಂಡ ರಸೂಲ್ಪುರ್ ಮಾಫಿ ಎಂಬ ಹಳ್ಳಿಯ ಜನರು ಬಿಜೆಪಿ ನಾಯಕರು ಪ್ರವೇಶಿಸದಂತೆ ಎಚ್ಚರಿಸುವ ಬೋರ್ಡ್ ಕೂಡಾ ಹಾಕಿದ್ದಾರೆ. ಇದರಿಂದ ಬಿಜೆಪಿಗರಲ್ಲಿ ಆತಂಕ ಮೂಡಿದೆ. ಕೆಲ ದಿನಗಳ ಹಿಂದೆ ಹರಿದ್ವಾರದಿಂದ ದೆಹಯ ಕಿಸಾನ್ ಘಾಟ್ಗೆ ಹೊರಟಿದ್ದ ಕಿಸಾನ್ ಕ್ರಾಂತಿ ಯಾತ್ರೆಯಲ್ಲಿ ಪಾಲ್ಗೊಂಡಿದ್ದ ರೈತರನ್ನು ಗಾಜಿಯಾಬಾದ್ನಲ್ಲಿ ಪೊಲೀಸರು ತಡೆದಿದ್ದರು. ಇಲ್ಲಿ ರೈತರ ಮೇಲೆ ಲಾಠಿಚಾರ್ಜ್ ನಡಸುವುದರೊಂದಿಗೆ ಅಶ್ರುವಾಯು ಕೂಡಾ ಸಿಡಿಸಲಾಗಿತ್ತು.
ಅಮ್ರೋಹಾ ಜಿಲ್ಲೆಯ ಧನೌರಾ ತಹಸೀಲ್ನಲ್ಲಿ ಬರುವ ರಸೂಲ್ಪುರ್ ಮಾಫಿ ಹಳ್ಳಿಯ ಹೊರಗೆ ಬೋರ್ಡ್ ಒಂದನ್ನು ಹಾಕಿದ್ದು, ಇದರಲ್ಲಿ “ರೈತರ ಒಗ್ಗಟ್ಟಿಗೆ ಜಯವಾಗಲಿ. ಬಿಜೆಪಿಗರು ಹಳ್ಳಿಗೆ ಪ್ರವೇಶಿಸುವುದನ್ನು ನಿರ್ಭಂಧಿಸಲಾಗಿದೆ. ಪ್ರವೇಶಿಸುವವರು ನಿಮ್ಮ ಪ್ರಾಣಕ್ಕೆ ನೀವೇ ಹೊಣೆಯಾಗಿರುತ್ತೀರಿ. ಪ್ರೀತಿಯ ರೈತರಿಂದ, ರಸೂಲ್ಪುರ್ ಮಾಫಿ, ಅಮ್ರೋಹ್” ಇದರ ಬೆನ್ನಲ್ಲೇ ಹತ್ತಿರದ ಕೆಲವು ಹಳ್ಳಿಗಳೂ ಒಂದಾಗಿ ಇಂತಹುದೇ ಬೋರ್ಡ್ ಹಾಕಲು ನಿರ್ಧರಿಸಿವೆ.
ರೈತರ ಮೇಲೆ ನಡೆದ ದಾಳಿಯಿಂದ ಬೇಸತ್ತ ಸ್ಥಳೀಯ ರೈತ ಧರ್ಮಪಾಲ ಎಂಬವರು ಮಾತನಾಡುತ್ತಾ ತಾನೂ ಕಿಸಾನ್ ಕ್ರಾಂತಿ ಯಾತ್ರೆಯಲ್ಲಿ ಪಾಲ್ಗೊಂಡಿದ್ದೆ. ತನ್ನನ್ನು ಸೇರಿದಂತೆ ಸಾವಿರಾರು ರೈತರನ್ನು ದೆಹಲಿಗೆ ತೆರಳಲು ಬಿಟ್ಟಿರಲಿಲ್ಲ. ಯಾವುದೇ ತಪ್ಪು ಮಾಡದ ಹಾಗೂ ಅಸಹಾಯಕ ರೈತರ ಮೇಲೆ ಲಾಠಿ ಚಾರ್ಜ್ ಹಾಗೂ ಅಶ್ರುವಾಯು ಪ್ರಯೋಗ ನಡೆಸಿದ್ದರು. ತನಗೂ ಗಾಯಗಳಾಗಿತ್ತು. ರೈತರ ಬಗ್ಗೆ ಕಾಳಜಿ ಎಂದು ಕೇವಲ ತೋರಿಕೆಗಷ್ಟೇ ಹೇಳಿಕೊಳ್ಳುವ ಬಿಜೆಪಿ ಸರ್ಕಾರ ತನಗಿಷ್ಟವಿಲ್ಲ ಎಂದಿದ್ದಾರೆ.
ಮತ್ತೊಬ್ಬ ರೈತ ಮಾತನಾಡುತ್ತಾ ಬೋರ್ಡ್ ಹಾಕಿರುವ ಹಿಂದಿನ ಉದ್ದೇಶ ಒಂದೇ ಅದು ಬಿಜೆಪಿಗರನ್ನು ವಿರೋಧಿಸುವುದು. ಇಡೀ ಹಳ್ಳಿ ಅವರನ್ನು ವಿರೋಧಿಸುತ್ತದೆ. ಒಂದು ವೇಳೆ ಬಿಜೆಪಿಯ ಒಬ್ಬ ನಾಯಕನೂ ನಮ್ಮೂರಿಗೆ ಪ್ರವೇಶಿಸಿದರೆ ದೆಹಲಿಗೆ ಪ್ರವೇಶಿಸಿದಾಗ ನಮಗಾದ ಸ್ಥಿತಿಯೇ ಅವರಿಗೂ ಆಗುತ್ತದೆ. ಹೀಗಾದರೆ ನಮ್ಮನ್ನು ದೂಷಿಸಬೇಡಿ. ಈಗಾಗಲೇ ಬೋರ್ಡ್ ಹಾಲಿ ಎಚ್ಚರಿಕೆ ನೀಡಿದ್ದೇವೆ ಎಂದಿದ್ಧಾರೆ.
ಗ್ರಾಮೀಣ ಭಾಗದ ರೈತರು ಹೀಗೆ ಸಾರ್ವಜನಿಕವಾಗಿ ಆಕ್ರೋಶ ವ್ಯಕ್ತಪಡಿಸುತ್ತಿರುವುದು ಸ್ಥಳೀಯ ಬಿಜೆಪಿ ನಾಯಕರಿಗೆ ನುಂಗಲಾಗದ ತುತ್ತಾಗಿದೆ. ಆದರೆ ಈ ಕುರಿತಾಗಿ ಬಜೆಪಿ ನಾಯಕರು ಈವರೆಗೆ ಯಾವುದೇ ಪ್ರತಿಕ್ರಿಯೆ ನೀಡಿಲ್ಲ.
Comments are closed.