ಬೆಂಗಳೂರು: ಕೇರಳ ಭೀಕರ ಪ್ರವಾಹಕ್ಕೆ ಸಿಲುಕಿ ನಲುಗುತ್ತಿರುವಾಗ ದೇಶದ ಮೂಲೆ ಮೂಲೆಯಿಂದ ಸಹಾಯ ಹರಿದುಬಂತು. ತಮ್ಮ ನೆರೆಯ ರಾಜ್ಯದ ಜನರ ಕಷ್ಟಕ್ಕೆ ಸ್ಪಂದಿಸಲು ಬೆಂಗಳೂರಿನವರು ಸಹ ಹಿಂದೇಟು ಹಾಕಲಿಲ್ಲ. ಉಳ್ಳವರು ಕೊಡುವುದರಲ್ಲಿ ಅಂತಹ ವಿಶೇಷ ಕಾಣುವುದಿಲ್ಲ. ಆದರೆ ಕಷ್ಟಪಟ್ಟು ದುಡಿದ್ದದ್ದು ಎರಡು ಹೊತ್ತಿನ ಊಟಕ್ಕ ಸಾಕು ಎಂಬ ತೃಪ್ತಿಯಲ್ಲಿ ಬದುಕುತ್ತಿರುವ, ತಮ್ಮ ಕಷ್ಟಕ್ಕಾಗಲಿ ಎಂದು ಒಂದೊಂದು ರೂಪಾಯಿ ಕೂಡಿಟ್ಟ ಹಣವನ್ನು ತಮಗಿಂತ ಕೆಟ್ಟ ಸ್ಥಿತಿಯಲ್ಲಿದ್ದವರಿಗೆ ಮಾಡಿದ ದಾನ ನಿಜಕ್ಕೂ ಹೆಚ್ಚು ತೂಕದ್ದೆನಿಸುತ್ತದೆ.
ಹೌದು, ಕೇರಳದ ಜನರ ಪರದಾಟ ಈ 20ರ ಎಳೆಯ ವಯಸ್ಸಿನ ಹುಡುಗನ ಹೃದಯವನ್ನು ಹಿಂಡಿ ಬಿಟ್ಟಿತ್ತು. ಮಹಾತ್ಮಾ ಗಾಂಧಿ ರಸ್ತೆಯಲ್ಲಿರುವ ಟೈಮ್ಸ್ ಇಂಟರ್‌ನೆಟ್ ಕಚೇರಿಯ ಕೆಫೆಟೇರಿಯಾದಲ್ಲಿ ಕೆಲಸ ಮಾಡುವ ಪ್ರದೀಪ್ ಕೇರಳಿಗರಿಗೆ ತನ್ನಿಂದಾದಷ್ಟಲ್ಲ, ಅದಕ್ಕೂ ಮೀರಿ ಸಹಾಯ ಮಾಡಿದ್ದಾನೆ. ಕೇರಳದ ನಿರಾಶ್ರಿತರಿಗೆ ಟೈಮ್ಸ್ ಇಂಟರ್‌ನೆಟ್ ಕಚೇರಿ ಸಿಬ್ಬಂದಿ ಪರಿಹಾರ ಸಾಮಗ್ರಿಗಳನ್ನು ರವಾನಿಸಲು ನಿರ್ಧರಿಸಿದಾಗ ಪ್ರದೀಪ್ ಕೂಡ ಕೈ ಜೋಡಿಸಿದ್ದಾನೆ. 5,000 ರೂಪಾಯಿ ವ್ಯಯಿಸಿ ಸಂತ್ರಸ್ತರಿಗೆ ಅಗತ್ಯವಾದ ವಸ್ತುಗಳನ್ನಾತ ದಾನ ಮಾಡಿದ್ದಾನೆ.
ಈ ಕುರಿತು ಕೇಳಿದರೆ ನಿಮಗೂ ಗೊತ್ತಾಯಿತಾ ಎಂದು ಮುಗ್ಧತೆ ತುಂಬಿದ ಮುಜುಗರದಿಂದ ಪ್ರತಿಕ್ರಿಯಿಸುವ ಪ್ರದೀಪ, ಕಷ್ಟದಲ್ಲಿದ್ದವರಿಗೆ ಸಹಾಯ ಮಾಡುವುದು ನಮ್ಮ ಕರ್ತವ್ಯ. ಕೇರಳಿಗರಿಗೆ ನನ್ನಿಂದಾದಷ್ಟು ಸಹಾಯ ಮಾಡಿದ್ದೇನೆ. ನಾನು ಉಳಿತಾಯ ಮಾಡಿದ ಹಣದಿಂದ ಅಲ್ಪ ನೆರವು ನೀಡಿದ್ದೇನೆ, ಇದು ನಿಜಕ್ಕೂ ಖುಷಿ ಕೊಟ್ಟಿದೆ ಎನ್ನುತ್ತಾನೆ.
ಅಷ್ಟೇ ಅಲ್ಲ ನನ್ನ ಈ ದೇಣಿಗೆ ವಿಚಾರ ಮನೆಯವರಿಗೂ ಸಹ ಗೊತ್ತಿಲ್ಲ. ನಾವು ಬಲಗೈಯಿಂದ ಮಾಡಿದ ದಾನ ಎಡಗೈಗೆ ಗೊತ್ತಾಗಬಾರದು. ನಾನು ಇದೇ ಮೊದಲ ಬಾರಿಗೆ ಈ ರೀತಿ ನೆರವು ನೀಡಿದ್ದು. ನನಗಿಂತ ಕಷ್ಟದಲ್ಲಿದ್ದವರಿಗೆ ಕಿರುಕಾಣಿಕೆ ಕೊಟ್ಟಿದ್ದೇನಷ್ಟೇ. ಇದರಲ್ಲಿ ದೊಡ್ಡತನವೇನಿದೆ? ಬ್ಯಾಂಕ್‌ನಲ್ಲಿ ಕೂಡಿಡುವುದಕ್ಕಿಂತ ದೀನ ಜನರಿಗೆ ಹಂಚುವುದರಲ್ಲೇ ಸಾರ್ಥಕತೆ ಸಿಗುತ್ತದೆ ಎಂಬ ಭಾವನೆ ನನ್ನದು,ಎಂದು ನಗುತ್ತ ನುಡಿಯುತ್ತಾನೆ ಹುಡುಗ.
ಪಾಂಡಿಚೇರಿ ಮೂಲದ ಈ ಹುಡುಗ ಕಳೆದ ಒಂದು ವರ್ಷದಿಂದೀಚೆಗೆ ಬೆಂಗಳೂರಿಗೆ ಬಂದಿದ್ದು, ಮೊದಲು ರಿಟೇಲ್ ಕಂಪನಿಯಲ್ಲಿ ಕೆಲಸ ಮಾಡುತ್ತಿದ್ದ. ಕಳೆದ ಮೂರು ತಿಂಗಳಿಂದ ಟೈಮ್ಸ್ ಇಂಟರ್‌ನೆಟ್‌ನ ಕ್ಯಾಂಟೀನ್‌ನಲ್ಲಿ ಕೆಲಸ ಮಾಡುತ್ತಿದ್ದಾನೆ. ಕಿತ್ತು ತಿನ್ನುವ ಬಡತನದಲ್ಲಿರುವ ಕುಟುಂಬ ನಿರ್ವಹಣೆಯ ಹೊಣೆ ಹೊತ್ತಿರುವ ಪ್ರದೀಪ್ ದೂರ ಶಿಕ್ಷಣದಲ್ಲಿ ಬಿ.ಕಾಂ ಓದುತ್ತಿದ್ದಾನೆ.
ನಾಚಿಕೆ ಸ್ವಭಾವದ ಪ್ರದೀಪ್ ಚಿನಕುರಳಿಯಂತೆ ಓಡಾಡುತ್ತ, ತನ್ನ ನಿಷ್ಕಲ್ಮಶ ನಗುವಿನಿಂದ ಕಚೇರಿಯವರೆಲ್ಲರ ಪ್ರೀತಿ ವಿಶ್ವಾಸ ಗಳಿಸಿದ್ದಾನೆ. ಇಂತಹ ಪರೋಪಕಾರಿಗಳನ್ನು ನೋಡಿದರೆ ಅರ್ಥವಾಗುವುದು ಮನಸ್ಸಿಂದ ಶ್ರೀಮಂತರು ಅಂದರೆ ಇಂತವರೇ ಎಂದು… ಅಲ್ಲವೇ.
Comments are closed.