ಅಪ್ರಾಪ್ತರ ಒಪ್ಪಿಗೆ ಇದ್ದರೂ ಅದು ಸಮ್ಮತಿಯ ಸೆಕ್ಸ್ ಅಲ್ಲ

ಜಬಲ್ಪುರ್/ಭೋಪಾಲ್: ಅಪ್ರಾಪ್ತರು ಲೈಂಗಿಕ ಕ್ರಿಯೆಗೆ ಸಮ್ಮತಿ ಸೂಚಿಸಿದರೂ, ಅದನ್ನು ಪರಿಗಣಿಸುವಂತಿಲ್ಲ ಎಂದು ಮಧ್ಯಪ್ರದೇಶ ಹೈಕೋರ್ಟ್ ಐತಿಹಾಸಿಕ ತೀರ್ಪು ಪ್ರಕಟಿಸಿದೆ.

ಅಪ್ರಾಪ್ತ ಬಾಲಕಿಯೊಬ್ಬಳ ಮೇಲೆ ನಡೆದ ಅತ್ಯಾಚಾರ ಪ್ರಕರಣದಲ್ಲಿ ಸಮ್ಮತಿಯ ಸೆಕ್ಸ್ ಆಧಾರದಲ್ಲಿ ಆರೋಪಿಯನ್ನು ದೋಷ ಮುಕ್ತಗೊಳಿಸಿ ಸಿಯೋನಿ ಸೆಷನ್ಸ್ ನ್ಯಾಯಾಲಯ ನೀಡಿದ ತೀರ್ಪನ್ನು ಮಧ್ಯಪ್ರದೇಶ ಹೈಕೋರ್ಟ್ ತಿರಸ್ಕರಿಸಿದೆ.

ಸಿಯೋನಿ ಸೆಷನ್ಸ್ ನ್ಯಾಯಾಲಯ 2016ರ ಏಪ್ರಿಲ್ 16 ರಂದು ತೀರ್ಪ ಪ್ರಕಟಿಸಿ, ಸೂರಜ್ ಪ್ರಸಾದ್ ದೆಹಾರಿಯಾ ಎಂಬ ಆರೋಪಿಯನ್ನು ಅತ್ಯಾಚಾರ ಪ್ರಕರಣ ಹಾಗೂ ಪೋಕ್ಸೊ ಕಾಯಿದೆ ಅಡಿಯ ಆರೋಪವನ್ನು ರದ್ದುಗೊಳಿಸಿದ್ದರು.

ವೈದ್ಯಕೀಯ ವರದಿ ಆಧಾರದ ಮೇಲೆ ತೀರ್ಪು ಪ್ರಕಟಿಸಿದ್ದ ನ್ಯಾಯಾಲಯ, ಸಂತ್ರಸ್ತೆ ದೇಹದ ಮೇಲೆ ಯಾವುದೇ ತರಹದ ಗಾಯದ ಗುರುತುಗಳು ಪತ್ತೆಯಾಗಿಲ್ಲ. ಅತ್ಯಾಚಾರ ನಡೆದ ಸಂದರ್ಭದಲ್ಲಿ ಬಾಲಕಿ ಕಿರುಚಾಡಿಲ್ಲ. ಹೀಗಾಗಿ, ಇದು ಇಬ್ಬರ ಸಮ್ಮತಿ ಮೇಲೆ ನಡೆದ ಸೆಕ್ಸ್ ಎಂದು ಪರಿಗಣಿಸಬೇಕೆಂದು ತಿಳಿಸಿತ್ತು.

ಮಧ್ಯ ಪ್ರದೇಶ ಸರಕಾರ ಸಲ್ಲಿಸಿದ್ದ ಮೇಲ್ಮನವಿಯನ್ನು ಪರಿಗಣಿಸಿದ ಹೈಕೋರ್ಟ್ ಮುಖ್ಯ ನ್ಯಾಯಮೂರ್ತಿ ಹೆಮಂತ್ ಗುಪ್ತ ಹಾಗೂ ನ್ಯಾಯಮೂರ್ತಿ ವಿ.ಕೆ.ಶುಕ್ಲ ನೇತೃತ್ವದ ವಿಭಾಗೀಯ ಪೀಠ ಈ ಮಹತ್ವದ ತೀರ್ಪು ಪ್ರಕಟಿಸಿದೆ.