ಮೆಲ್ಬೋರ್ನ್: ಡೇಟಿಂಗ್ ಸೈಟ್ ಮೂಲಕ ಪರಿಚಯವಾಗಿದ್ದ ಯುವತಿಯ ಭೇಟಿಯ ನಂತರ ಭಾರತೀಯ ಮೂಲದ ವಿದ್ಯಾರ್ಥಿಯೊಬ್ಬ ಕೊಲೆಯಾಗಿರುವ ಘಟನೆ ಆಸ್ಟ್ರೇಲಿಯಾದ ಮೆಲ್ಬೋರ್ನ್ನಲ್ಲಿ ನಡೆದಿದೆ.
ಮೌಲಿನ್ ರಾಥೋಡ್ ಮೃತ ದುರ್ದೈವಿ, ಅಕೌಂಟಿಂಗ್ ವಿದ್ಯಾರ್ಥಿಯಾಗಿರುವ ಈತ ತೀವ್ರ ಹಲ್ಲೆಗೊಳಗಾಗಿ ಕಳೆದ ರಾತ್ರಿ ಸ್ಥಳೀಯ ಆಸ್ಪತ್ರೆಯಲ್ಲಿ ಕೊನೆಯುಸಿರೆಳೆದಿದ್ದಾನೆ. ಸೋಮವಾರ ರಾತ್ರಿ ಯುವತಿಯ ಮನೆಯ ಬಳಿ ಗಂಭೀರವಾಗಿ ಗಾಯಗೊಂಡಿದ್ದ ಸ್ಥಿತಿಯಲ್ಲಿ ಮೌಲಿನ್ ಪತ್ತೆಯಾಗಿದ್ದ.
ಪಶ್ಚಿಮ ಮೆಲ್ಬೋರ್ನ್ನ ಸನ್ಬರಿ ಸಬರ್ಬ್ನಲ್ಲಿರುವ 19 ವರ್ಷದ ಯುವತಿಯ ಮನೆಗೆ ಮೌಲಿನ್ ಸೋಮವಾರ ರಾತ್ರಿ ಸುಮಾರು 9 ಗಂಟೆ ಸಮಯದಲ್ಲಿ ಭೇಟಿ ನೀಡಿದ್ದ. ಈ ವೇಳೆ ತುರ್ತು ಸೇವೆಗೆ ಕರೆ ಬಂದಾಗ ಸ್ಥಳಕ್ಕೆ ಹೋಗಿ ನೋಡಿದಾಗ ಮೌಲಿನ್ ಗಂಭೀರ ಗಾಯಗೊಂಡಿರುವ ಸ್ಥಿತಿಯಲ್ಲಿದ್ದ.
ಮನೆಯಲ್ಲಿ ಏಕಾಂಗಿಯಾಗಿ ವಾಸಿಸುತ್ತಿದ್ದ ಯುವತಿಯ ವಿರುದ್ಧ ಸ್ವಯಂಪ್ರೇರಿತ ಪ್ರಕರಣ ದಾಖಲಿಸಿ ಬಂಧಿಸಲಾಗಿದ್ದು, ನರಮೇಧ ಅಥವಾ ಕೊಲೆ ಆರೋಪದ ಮೇಲೆ ಪ್ರಕರಣ ದಾಖಲಿಸಲಾಗುವುದು ಎಂದು ವರದಿಗಳು ತಿಳಿಸಿವೆ.
ಕಳೆದ ರಾತ್ರಿ ಯುವತಿಯು ಮೆಲ್ಬೋರ್ನ್ ಮ್ಯಾಜಿಸ್ಟ್ರೇಟ್ ನ್ಯಾಯಾಲಯದಲ್ಲಿ ವಿಚಾರಣೆ ಎದುರಿಸಿದ್ದು, ಮತ್ತಷ್ಟು ವಿಚಾರಣೆಗಾಗಿ ಪೊಲೀಸ್ ಕಸ್ಟಡಿಯಲ್ಲಿ ಇರಿಸಿದ್ದಾರೆ.
ಸ್ನೇಹಿತ ಲವ್ಪ್ರೀತ್ ಸಿಂಗ್ ಪ್ರಕಾರ ಮೃತ ರಾಥೋಡ್ ಒಬ್ಬನೇ ಮಗನಾಗಿದ್ದ. ವಿದ್ಯಾಭ್ಯಾಸಕ್ಕಾಗಿ ನಾಲ್ಕು ವರ್ಷದ ಹಿಂದೆಯೇ ಆಸ್ಟ್ರೇಲಿಯಾಕ್ಕೆ ಬಂದು ನೆಲೆಸಿದ್ದ. ಈ ಘಟನೆ ತಿಳಿದ ನಂತರ ಪಾಲಕರು ದಿಗ್ಭ್ರಮೆಗೆ ಒಳಗಾಗಿದ್ದಾರೆ.
ಆತ ಒಳ್ಳೆಯ ವ್ಯಕ್ತಿ, ಕ್ರಿಕೆಟ್ ಪ್ರೇಮಿ ಹಾಗೂ ಸದಾ ಸಂತೋಷದಿಂದ ಇರುವ ಪ್ರವೃತ್ತಿ ಉಳ್ಳವನಾಗಿದ್ದ. ವಿನಮ್ರ ಸ್ವಭಾವ ಹೊಂದಿದ್ದ ಆತ ವಿದ್ಯಾಭ್ಯಾಸದಲ್ಲಿ ಕಠಿಣ ಶ್ರಮ ಪಡುತ್ತಿದ್ದ ಎಂದು ಲವ್ಪ್ರೀತ್ ತಿಳಿಸಿದ್ದಾರೆ.
Comments are closed.