ಬೆಂಗಳೂರಿನಿಂದ ಮಂಗಳೂರಿಗೆ 1512 ರೂ.ಗೆ ವಿಮಾನಯಾನ!

ಹೊಸದಿಲ್ಲಿ: 12ನೇ ವರ್ಷಕ್ಕೆ ಕಾಲಿರಿಸುತ್ತಿರುವ ದೇಶೀಯ ವಿಮಾನಯಾನ ಸಂಸ್ಥೆ ಇಂಡಿಗೊ, ನಾಲ್ಕು ದಿನಗಳ ಮೆಗಾ ಸೇಲ್ಸ್‌ ಆಫರ್ ಪ್ರಕಟಿಸಿದೆ. ಇದರಂತೆ ಬರಿ 1212 ರೂ.ಗಳಿಗೆ ವಿಮಾನಯಾನ ಸೇವೆ ಆರಂಭವಾಗಲಿದೆ.

ಜುಲೈ 10ರಿಂದ 13ರ ವರೆಗಿನ ಅವಧಿಯಲ್ಲಿ ಮುಂಗಡವಾಗಿ ಟಿಕೆಟ್ ಕಾಯ್ದಿರಿಸುವ ಗ್ರಾಹಕರಿಗೆ ವಿಶೇಷ ಆಫರ್ ಲಭ್ಯವಾಗಲಿದೆ. ಅಲ್ಲದೆ ಅಂತರಾಷ್ಟ್ರೀಯ ಹಾರಾಟ ಸೇರಿದಂತೆ ಪ್ರಯಾಣ ಅವಧಿಯು 2018 ಜುಲೈ 25ರಿಂದ 2019 ಮಾರ್ಚ್ 30ರ ವರೆಗೆ ಆಯ್ಕೆ ಮಾಡಬಹುದಾಗಿದೆ.

57 ಪ್ರಮುಖ ನಗರಗಳಲ್ಲಾಗಿ 12 ಲಕ್ಷ ಸೀಟುಗಳ ಆಫರ್‌ನ್ನು ಇಂಡಿಗೊ ಪ್ರಕಟಿಸಿದ್ದು, ಬುಕ್ಕಿಂಗ್ ವೇಳೆ ಶೇಕಡಾ 25ರಷ್ಟು ಡಿಸ್ಕೌಂಟ್ ಲಭ್ಯವಾಗಲಿದೆ. ಇದರ ಜತೆಗೆ ಎಸ್‌ಬಿಐ ಕಾರ್ಡ್ ಮುಖಾಂತರ ಕನಿಷ್ಠ 3000 ರೂ.ಗಳ ವಹಿವಾಟು ನಡೆಸಿದರೆ ಶೇಕಡಾ 5ರಷ್ಟು ಹಾಗೂ ಗರಿಷ್ಠ 500 ರೂ.ಗಳ ಕ್ಯಾಶ್‌ಬ್ಯಾಕ್ ಸಹ ಲಭ್ಯವಾಗಲಿದೆ.

ಇದರಂತೆ ಬೆಂಗಳೂರಿನಿಂದ ಮಂಗಳೂರಿಗೆ ಪ್ರಯಾಣ ದರ 1512 ರೂ.ಗಳಿಗೆ ಇಳಿಕೆಗೊಂಡಿದೆ.