ಚೆನ್ನೈ: ತಮಿಳುನಾಡಿನ ಮಾಜಿ ಮುಖ್ಯಮಂತ್ರಿ ಜೆ. ಜಯಲಲಿತಾ ಅವರ ದೇಹದ ಯಾವುದೇ ಜೈವಿಕ ಮಾದರಿಯನ್ನು ಸಂಗ್ರಹಿಸಿಲ್ಲ. ನಮ್ಮ ಬಳಿ ಇಲ್ಲ ಎಂದು ಮದ್ರಾಸ್‌ ಹೈಕೋರ್ಟ್‌ಗೆ ಅಪೋಲೊ ಆಸ್ಪತ್ರೆ ಹೇಳಿದೆ.
ಜಯಲಲಿತಾ ಪುತ್ರಿ ಎಂದು ಹೇಳಿಕೊಂಡಿರುವ ಬೆಂಗಳೂರು ಮೂಲದ ಅಮೃತಾ ಜಯಾ ಮಗಳು ತಾನೆಂದು ಸಾಬೀತುಪಡಿಸಲು ಡಿಎನ್‌ಎ ಪರೀಕ್ಷೆ ನಡೆಸಬೇಕು ಎಂದು ನ್ಯಾಯಾಲಯವನ್ನು ಕೋರಿದ್ದರು.
ಅದರಂತೆ ನ್ಯಾಯಾಧೀಶ ಎಸ್‌. ವೈದ್ಯನಾಥನ್ ಅವರು ಜಯಲಲಿತಾ ದೇಹದ ಯಾವುದಾದರೂ ಮಾದರಿ ಲಭ್ಯವಿದೆಯೇ ಎಂದು ತಿಳಿಸುವಂತೆ ಅಪೋಲೊ ಆಸ್ಪತ್ರೆಗೆ ಸೂಚಿಸಿದ್ದರು. ಜ್ವರ ಮತ್ತು ನಿರ್ಜಲೀಕರಣದ ಸಮಸ್ಯೆಗೆ ತುತ್ತಾಗಿದ್ದ ಜಯಲಲಿತಾ ಸೆ. 22, 2016ರಂದು ಚೆನ್ನೈನ ಅಪೋಲೊ ಆಸ್ಪತ್ರೆಗೆ ದಾಖಲಾಗಿದ್ದು, ಡಿ. 5, 2016ರಂದು ಕೊನೆಯುಸಿರೆಳೆದಿದ್ದರು.
ಅಮೃತಾ ತಾನು ಜಯಾ ಪುತ್ರಿ ಎಂದು ಹೇಳಿಕೊಂಡಿದ್ದರೂ, ಅದನ್ನು ಸಾಬೀತುಪಡಿಸುವ ಯಾವುದೇ ಪುರಾವೆ ಒದಗಿಸಿಲ್ಲ. ಅಲ್ಲದೆ ಈ ಹಿಂದಿನ ವಿಚಾರಣೆಯ ಸಂದರ್ಭ ಜಯಲಲಿತಾ ಸೋದರಳಿಯ ದೀಪಕ್ ಮತ್ತು ಸೋದರ ಸೊಸೆ ದೀಪಾ ಕೂಡ ಅಮೃತಾ ಹೇಳಿಕೆಗೆ ವಿರೋಧ ವ್ಯಕ್ತಪಡಿಸಿದ್ದರು.
ಜತೆಗೆ ಅಮೃತಾ ವಾದವನ್ನು ಪುರಸ್ಕರಿಸುವ ಯಾವುದೇ ಸಾಕ್ಷ್ಯಗಳು ಸರಕಾರದ ಬಳಿ ಇಲ್ಲ ಎಂದು ತಮಿಳುನಾಡು ಸರಕಾರ ಈಗಾಗಲೇ ಹೈಕೋರ್ಟ್‌ಗೆ ಅಫಿಡವಿಟ್ ಸಲ್ಲಿಸಿದೆ. ಪ್ರಕರಣದ ಮುಂದಿನ ವಿಚಾರಣೆ ಜೂನ್ 4ರಂದು ನಡೆಯಲಿದೆ.
Comments are closed.