ರಾಷ್ಟ್ರೀಯ

ಅತ್ಯಾಚಾರಕ್ಕೆ ಕಾರಣವಾಗುತ್ತಿದೆ ಬ್ಲ್ಯೂ ಫಿಲ್ಮ್

Pinterest LinkedIn Tumblr


ಭೋಪಾಲ್: ರಾಜ್ಯದಲ್ಲಿ ಅತ್ಯಾಚಾರ ಪ್ರಕರಣಗಳು ಹೆಚ್ಚಲು ನೀಲಿ ಚಿತ್ರಗಳೇ ಪ್ರಮುಖ ಕಾರಣ ಎಂದಿರುವ ಮಧ್ಯ ಪ್ರದೇಶ ಗೃಹ ಸಚಿವ ಭೂಪೇಂದ್ರ ಸಿಂಗ್ ಎಲ್ಲ ಪೋರ್ನ್ ಸೈಟ್‌ಗಳ ಮೇಲೆ ನಿಷೇಧ ಹೇರುವಂತೆ ಸೋಮವಾರ ಕೇಂದ್ರ ಸರ್ಕಾರಕ್ಕೆ ಲಿಖಿತ ಮನವಿ ಸಲ್ಲಿಸಿದ್ದಾರೆ.

ಮಧ್ಯಪ್ರದೇಶದ ಬಿಜೆಪಿ ಸರಕಾರವು 25 ಅಶ್ಲೀಲ ತಾಣಗಳನ್ನು ನಿರ್ಬಂಧಿಸಿದೆ. ಆದರೆ ಅದು ಸಾಕಾಗುವುದಿಲ್ಲ. ಇಂತಹ ಜಾಲತಾಣಗಳನ್ನು ಸಂಪೂರ್ಣವಾಗಿ ನಿಷೇಧಿಸಬೇಕು ಎಂದು ಸಿಂಗ್ ಹೇಳಿದ್ದಾರೆ.

ತಮ್ಮ ಕಾರ್ಯಾಲಯದಲ್ಲಿ ವರದಿಗಾರರ ಜತೆ ಮಾತನ್ನಾಡುತ್ತಿದ್ದ ಸಿಂಗ್, ನೀಲಿ ಚಿತ್ರಗಳು ಬಾಲ್ಯದ ಮೇಲೆ ಪ್ರತಿಕೂಲ ಪರಿಣಾಮ ಬೀರುತ್ತವೆ. ಪ್ರೌಢ ಬಾಲಕ ಮತ್ತು ಬಾಲಕಿಯರು ಇಂತಹ ಸೈಟ್‌ಗಳಿಗೆ ಸುಲಭವಾಗಿ ಪ್ರವೇಶಿಸಬಹುದು, ಎಂಬುದು ರಾಜ್ಯದ ಗೃಹ ಸಚಿವಾಲಯ ಕೈಗೊಂಡ ಅಧ್ಯಯನದಿಂದ ಬಹಿರಂಗಗೊಂಡಿದೆ. ಇವುಗಳ ವೀಕ್ಷಣೆ ಪರಿಣಾಮವೇ ಅತ್ಯಾಚಾರ ಮತ್ತು ಲೈಂಗಿಕ ದೌರ್ಜನ್ಯ ಪ್ರಕರಣಗಳು ಹೆಚ್ಚುತ್ತಿರುವುದು, ಎಂದಿದ್ದಾರೆ. ಆದರೆ ತಮ್ಮ ಇಲಾಖೆ ಕೈಗೊಂಡಿರುವ ಅಧ್ಯಯನದ ಬಗ್ಗೆ ಹೆಚ್ಚಿನ ವಿವರ ಬಹಿರಂಗ ಪಡಿಸಲು ಅವರು ನಿರಾಕರಿಸಿದ್ದಾರೆ.

ಪೋರ್ನ್ ಸೈಟ್ ನಿಯಂತ್ರಣಕ್ಕೆ ಬೇಕಿದೆ ಕಠಿಣ ಕಾನೂನು

ರಾಜ್ಯದಲ್ಲಿ 25ಕ್ಕೂ ಹೆಚ್ಚು ಪೋರ್ನ್ ಸೈಟ್‌ಗಳ ಮೇಲೆ ನಿರ್ಬಂಧ ಹೇರಲಾಗಿದೆ. ಆದರೆ ಇಂತಹ ಸೈಟ್‌ಗಳ ಮೇಲೆ ನಮಗೆ ನೇರ ನಿಯಂತ್ರಣವಿಲ್ಲ. ಹೀಗಾಗಿ ಎಲ್ಲ ಪೋರ್ನ್ ಸೈಟ್‌ಗಳ ಮೇಲೆ ನಿಷೇಧ ಹೇರುವಂತೆ ಮತ್ತು ಇವುಗಳ ನಿಯಂತ್ರಣಕ್ಕೆ ಕಠಿಣ ಕಾನೂನು ಜಾರಿಗೆ ತರುವಂತೆ ಕೇಂದ್ರ ಸರ್ಕಾರಕ್ಕೆ ಮನವಿ ಸಲ್ಲಿಸಿದ್ದೇವೆ ಎಂದು ಸಿಂಗ್ ಹೇಳಿದ್ದಾರೆ.

12 ವರ್ಷದೊಳಗಿನ ಬಾಲಕಿಯರ ಮೇಲೆ ಅತ್ಯಾಚಾರ ಎಸಗಿದವರನ್ನು ಗಲ್ಲುಶಿಕ್ಷೆಗೊಳಪಡಿಸುವ ಕಾನೂನು ಜಾರಿ ತರುವ ನಿರ್ಧಾರಕ್ಕೆ ಸಂಬಂಧಿಸಿದಂತೆ ಪ್ರಧಾನಿ ನರೇಂದ್ರ ಮೋದಿಯನ್ನವರು ಪ್ರಶಂಸಿಸಿದ್ದಾರೆ.

Comments are closed.