ಏಕಕಾಲಕ್ಕೆ ಶೇ.100ರಷ್ಟು ಮೆಸ್​ ಶುಲ್ಕ ಏರಿಸಿದ ಜೆಎನ್​ಯು

ನವದೆಹಲಿ: ಮೆಸ್​ ಶುಲ್ಕವನ್ನು ಏಕಕಾಲಕ್ಕೆ ಶೇ.100ರಷ್ಟು ಹೆಚ್ಚಿಸುವ ಮೂಲಕ ಜವಾಹರ್​ಲಾಲ್​ ನೆಹರು ವಿಶ್ವವಿದ್ಯಾಲಯ(ಜೆಎನ್​ಯು) ವಿದ್ಯಾರ್ಥಿಗಳ ಕೆಂಗಣ್ಣಿಗೆ ಗುರಿಯಾಗಿದೆ.

ಮೆಸ್​ ಪ್ರವೇಶ ಶುಲ್ಕ ವಿಭಾಗದ ಅಡಿಯಲ್ಲಿ, ಒಂದು ಸೆಮಿಸ್ಟರ್​ನ ಸ್ಥಾಪನಾ ಶುಲ್ಕವನ್ನು 550 ರೂ.ಯಿಂದ 1,100 ರೂ.ಗೆ, ಮೆಸ್​ ಭದ್ರತಾ ಠೇವಣಿಯನ್ನು 2,700 ರೂ.ಯಿಂದ 4,500 ರೂ.ಗೆ ಹೆಚ್ಚಿಸಲಾಗಿದೆ. ವಾರ್ಷಿಕ ಪಾತ್ರೆ ಸಾಮಾನುಗಳ ಶುಲ್ಕವನ್ನು 50 ರೂ.ಯಿಂದ 200 ರೂ. ಮತ್ತು ವಾರ್ಷಿಕ ದಿನಪತ್ರಿಕಾ ಶುಲ್ಕವು 15ರೂ.ಯಿಂದ 50 ರೂ.ಯಷ್ಟು ಪರಿಷ್ಕರಣೆಗೊಂಡಿದೆ.

ಫೆ.27ರಂದು ಜೆಎನ್​ಯುವಿನ ವಿದ್ಯಾರ್ಥಿ ಡೀನ್​ ಕಚೇರಿ ಈ ಅಧಿಸೂಚನೆ ಹೊರಡಿಸಿದ್ದು, ಮೆಸ್​ ಶುಲ್ಕ​, ಅತಿಥಿ ಊಟದ ದರ, ತಡ ಪಾವತಿಗೆ ದಂಡ ಹಾಗೂ ಹೆಚ್ಚುವರಿ ಆಹಾರ ಪದಾರ್ಥಗಳ ಶುಲ್ಕ ಪರಿಷ್ಕರಣಾ ಪಟ್ಟಿಯನ್ನು ಬಿಡುಗಡೆ ಮಾಡಿದ್ದು, ಈ ನೂತನ ನಿಯಮ ಜನವರಿ 1ರಿಂದ ಪೂರ್ವಾನ್ವಯಿಸಲ್ಪಡುತ್ತದೆ.