ಮರಿ ರಕ್ಷಣೆಗೆ ಹುಲಿಯೊಂದಿಗೆ ಸೆಣೆಸಿ ಗೆದ್ದ ಹೆಣ್ಣು ಕರಡಿ

ಹುಲಿ ಮತ್ತು ಕರಡಿ ಸೆಣೆಸಾಡಿದರೆ ಕಡೆಗೆ ಯಾವುದು ಗೆಲ್ಲುತ್ತದೆ? ಸಾಮಾನ್ಯವಾಗಿ ಹುಲಿಯೇ ಗೆಲ್ಲುತ್ತದೆ. ಬೇಟೆಯಾಡುವುದರಲ್ಲಿ ಹುಲಿಯನ್ನು ಮೀರಿದ ಪ್ರಾಣಿ ಇನ್ನೊಂದಿಲ್ಲ. ಹುಲಿ ಮತ್ತು ಕರಡಿ ನಡುವೆ ನಡೆದ ಭೀಕರ ಕಾಳಗದಲ್ಲಿ ಕಡೆಗೆ ಹುಲಿ ಸೋತು ಸುಣ್ಣವಾಗಿ ಓಡಿಹೋಗಿರುವ ದೃಶ್ಯಗಳು ಕ್ಯಾಮೆರಾದಲ್ಲಿ ಸೆರೆಯಾಗಿವೆ.

ಮಹಾರಾಷ್ಟ್ರದ ತಡೋಬಾ ರಾಷ್ಟ್ರೀಯ ಉದ್ಯಾನವನದಲ್ಲಿ ಈ ಘಟನೆ ನಡೆದಿದ್ದು, ಇದಕ್ಕೆ ಸಂಬಂಧಿಸಿದ ವೀಡಿಯೋ ಅಂತರ್ಜಾಲದಲ್ಲಿ ಗಮನಸೆಳೆದಿದೆ. ಈ ಕಾಳಗದ ಸನ್ನಿವೇಶವನ್ನು ಬ್ಯಾಂಬೂ ಸಫಾರಿ ಲಾಡ್ಜ್‌ನ ಪ್ರಕೃತಿ ಶಾಸ್ತ್ರಜ್ಞ ಅಕ್ಷಯ್ ಕುಮಾರ್ ಸೆರೆಹಿಡಿದಿದ್ದು ಫೇಸ್‌ಬುಕ್‌ನಲ್ಲಿ ಹಂಚಿಕೊಂಡಿದ್ದಾರೆ.

ತನ್ನ ಮರಿಯ ಜತೆಗೆ ನೀರನ್ನು ಹರಸಿ ಹೊರಟಿದ್ದ ಕರಡಿಗೆ 7 ವರ್ಷ ವಯಸ್ಸಿನ ‘ಮಟ್ಕಾಸುರ್’ ಹೆಸರಿನ ಹುಲಿ ಎದುರಾಯಿತು. ಮರಿಯನ್ನು ರಕ್ಷಿಸಿಕೊಳ್ಳಲು ತಾಯಿ ಕರಡಿ ಹುಲಿಯ ಜತೆಗೆ ಸೆಣೆಸಾಟಕ್ಕೆ ಇಳಿಯಿತು. ಸುಮಾರು 15 ನಿಮಿಷಗಳ ಕಾದಾಟದಲ್ಲಿ ಹುಲಿ ಮತ್ತು ಕರಡಿಗೆ ಸಾಕಷ್ಟು ಗಾಯಗಳಾಗಿವೆ. ಈ ಕಾದಾಟ ನೋಡುತ್ತಿದ್ದ ಮರಿ ಕರಡಿ ಭಯಬಿದ್ದು ಅಲ್ಲಿಂದ ಪರಾರಿಯಾಗಿದೆ. ಕಡೆಗೆ ಗೆದ್ದದ್ದು ಮಾತ್ರ ಕರಡಿ.