ಯೋಗಿ ನಿವಾಸದ ಬಳಿ ಸೆಲ್ಫಿ ತೆಗೆದರೆ ಜೈಲಂತೆ!.. ಇದು ಹೊಸ ವರ್ಷದ ಕೊಡುಗೆಯೆಂದ ಅಖಿಲೇಶ್

ಲಖನೌ: ಉತ್ತರ ಪ್ರದೇಶ ಮುಖ್ಯಮಂತ್ರಿ ಯೋಗಿ ಆದಿತ್ಯನಾಥ್ ಅವರ ಅಧಿಕೃತ ನಿವಾಸದ ಬಳಿ ಸೆಲ್ಫೀ ಕ್ಲಿಕ್ಕಿಸಿಕೊಂಡರೆ ಜೈಲಿಗೆ ಹಾಕಲಾಗುವುದು ಎಂದು ಪೊಲೀಸರು ಸೂಚನಾ ಫಲಕವೊಂದನ್ನು ಹಾಕಿದ್ದಾರೆ.

ಲಖನೌದ ಕಾಳಿದಾಸ್ ಮಾರ್ಗದಲ್ಲಿರುವ ಯೋಗಿ ಆದಿತ್ಯನಾಥ್ ಗೃಹ ಕಚೇರಿ ಬಂದೋಬಸ್ತ್ ವಲಯವಾಗಿದ್ದು, ಭದ್ರತೆಯ ದೃಷ್ಟಿಯಿಂದ ಇಲ್ಲಿ ಸೆಲ್ಫೀ ತೆಗೆದುಕೊಳ್ಳುವುದು ನಿಷಿದ್ಧ. ನಿಯಮ ಉಲ್ಲಂಘಿಸಿದರೆ ಜೈಲಿಗೆ ಕಳುಹಿಸುವುದಾಗಿ ಸೂಚನಾ ಫಲಕದಲ್ಲಿ ಎಚ್ಚರಿಸಲಾಗಿದೆ.

ಪೊಲೀಸರ ಈ ಕ್ರಮವನ್ನು ಮಾಜಿ ಮುಖ್ಯಮಂತ್ರಿ ಅಖಿಲೇಶ್ ಯಾದವ್ ಟೀಕಿಸಿದ್ದು, ‘ಹೊಸ ವರ್ಷಕ್ಕೆ ಉತ್ತರ ಪ್ರದೇಶ ಸರಕಾರದ ಉಡುಗೊರೆ. ಸೆಲ್ಫೀ ತೆಗೆದುಕೊಂಡರೆ ಜೈಲು ಶಿಕ್ಷೆ’ ಎಂದು ವ್ಯಂಗ್ಯವಾಗಿ ಟ್ವೀಟ್ ಮಾಡಿದ್ದಾರೆ.

ಉತ್ತರ ಪ್ರದೇಶ ನಿಯಂತ್ರಣ ಸಂಘಟಿತ ಅಪರಾಧ ಕಾಯಿದೆ (ಯುಪಿಸಿಒಸಿಎ) ಮಸೂದೆಯನ್ನು ಉತ್ತರ ಪ್ರದೇಶ ಅಸೆಂಬ್ಲಿ ಬುಧವಾರ ಅಂಗೀಕರಿಸಿತ್ತು.